विदेशं लिहांवःपिंत सम्पर्कय् वयेत कामपाया इनाप

विश्वन्यंक महामारी न्यनाच्वंगु कोरोना भाइरसया संक्रमण म्हो यायेगु निंतिं येँ महानगरपालिकां थीथी ज्याझ्वः यानाच्वंगु दु । छुं न्हि न्ह्यः निंतिं येँया थीथी थासय् वासः छ्वाकेगु ज्या याःगु खःसा कोराेनाया आशंका जूसाः महानगरपालिकाया फोन ल्याः ११८०लय् स्वापु तयेत इनाप याःगु खः ।

थ्वहे झ्वलय् महानगरपालिकां विदेशं लिहांवःपिं सुं दुसा थःथःगु वडाया वडा अध्यक्षतय्त सम्पर्क यायेत इनाप याःगु दु । छुं ई थुके विदेशं वःपिं नेपाःमितय्त कोरोनाया संक्रमण खनेदयेवं महानगरं थज्याःगु इनाप याःगु खः ।

नेपालभाषा टाईम्स नाप खँल्हाबंला यानादिसें कामपा १८ वडाया अध्यक्ष न्हुच्छेकाजि महर्जनं विदेशं लिहांवःपिंत थःथःगु वडाया अध्यक्षयात स्वापु तयेत इनाप यानादिल । वय्कलं धयादिल, ‘विदेशं लिहांवपिनि अवस्था स्वयाः वय्कःपिंत क्वारेन्टाइनय् तकं तयेगु व्यवस्था कामपां याःगु दु ।’