बुंगःद्यःयात रथय् बिज्याके माःगु माग

यल– बुंगद्यःया जात्रा लिसे सम्बन्धितपिं लिसें यलया जनप्रतिनिधिपिंसं बुंगद्यःया जात्रा यायेगु सम्भव मदुनिसां म्होतिं नं रथ जक दयेकाःसां बुंगद्यःयात रथय् बिज्याकेमाःगु खँ धाःगु दु । मेखे गुथि संस्थानं धाःसा आःया अवस्थाय् रथ हे दयेके मफइगु खँ धाःगु दु ।

परम्परा कथं बुंगद्यःयात आः वइगु शुक्रवाः वैशाख १२ गते (मांया ख्वाः स्वयेगुयां कन्हय् कुन्हु) रथय् बिज्याकेमाः । तर सरकारं तयातःगु लकडाउनया कारणं रथ दयेकेगु ज्या धाःसा अझं न्ह्याकेफुगु मदुनि । जात्रालिसे सम्बन्धितपिंसं छुं नं हालतय् द्यःयात रथय् तयेमाःगु खँ धयाच्वंगु दु ।

ज्योतिष दैवज्ञ कीर्तिमदन जोशीं रथ पूवंक हे दयेकेमफुसां बुंगद्यःयात बिज्याकेगु थाय् जक दयेकाःसां परम्परायात निरन्तरता बीमाःगु खँ धयादीगु दु । सरकारया निर्णय कथं सामाजिक दूरी कायम यानाःसां रथ दयेकेमाःगु खँ नं वय्कलं धयादीगु दु । द्यःतय्गु थाय् जक दयेकेफुसां विधि कथं वइगु १२ गते द्यःयात रथय् बिज्याकेफइगु वय्कःया धापू दु । द्यःयात रथय् बिज्याकेधुंकाः लकडाउन लिपा जनजीवन सामान्य जुल धायेवं रथ जात्रा यायेफइगु वय्कःया सुझाव दु । वय्कलं धयादिल, ‘संकटया इलय् रथ जात्रा लिपा नं याकेफइ ।’

झिंखुदँ न्ह्यव निसें बुंगद्यःया मू पुजारी जुयाच्वनादीम्ह ७० दँया कपिल वज्राचार्य नं जात्रा न्ह्याकेत तयारी मजूगु खँय् दुःखी जुयाच्वनादीगु दु । वय्कः थः नीनिदँ दुबलय् निसें हे बुंगद्यःया सेवा याना वयाच्वनादीम्ह खः । न्हापा नं थीथी इलय् मछिंगु अवस्था वःसां जात्रा गुबलें नं मदिउगु वय्कःया अनुभव दु । आःया महामारीया इलय् सहकालया द्यःया जात्राया झन हे अप्वः महत्व दुगु वय्कःया धापू दु ।

२०७२ सालय् भुखाचं यानाः छेँ दुंगु व रथ नं क्षति जूगु इलय् नं जात्रा अन्योल जूगु खः, तर उबलय् नं जात्रा जूगु खः । आः नं आवश्यक सावधानी नालाः हुलमूल मयासे जात्रा यायेफइगु वय्कःया धापू दु ।
वय्कःया धापू दु, ‘पानेजु प्यम्ह व जजमान यानाः मुक्कं झिम्ह जक दःसा रथारोहण याकेफइ ।’

यल महानगरपालिका वडा नंं. १०या अध्यक्ष नरसिंह ब्यञ्जनकारं नं सकसियां धार्मिक आस्थाया रुपय् दुम्ह बुंगद्यःया जात्रा दिकेमजिउगु खँ धयादी । जात्राया निंतिं मदयेक मगाःपिं निम्ह प्यम्ह जक च्वनाः द्यःयात रथय् बिज्याकेफइगु वय्कःया धापू दु । वय्कलं धयादिल, ‘जात्रा हे दिइगु खं यक्वसिया नुगःस्याःगु दु ।’

यल महानगरपालिकाया प्रवक्ता राजु महर्जनं जात्रा नियमित जुइमाःगु खःसां लकडाउनया कारणं जात्रा संचालनय् समस्या वयाच्वंगु खँ धयादिल । रथ दयेकेत यक्व जनशक्ति माःगुलिं नं जात्रा सञ्चालन यायेत थाकुयाच्वंगु वय्कःया धापू दु । वय्कलं धयादिल, ‘कोभिड १९ न्यनेफुगुलिं नं यक्व भीडभाड यायेमजिउ ।’

गुथि संस्थान यलया प्रमुख राजन भुजुं लकडाउनया इलय् रथ दयेकेमफइगु खँ धयादिल । रथ दयेकेत यक्व जनशक्ति माःगुलिं रथ दयेके सम्भव मदुगु धापु वय्कःया दु । वय्कलं धयादिल, ‘लकडाउन लिपा जक रथ दयेकेगु व रथय् द्यः बिज्याकेगु ज्या यायेफइ ।’