ख्वनाय् वा पिउथाय् हवाइ फायर, मचासहित न्याम्ह घाःपाः

नेपालभाषा टाइम्स
११४० दिल्लाथ्व चतुर्दशी
किपा-साभार -श्रीकृष्ण महर्जन, लक्ष्मीकुमार ङाखुसीऽ श्रीजन श्रेष्ठया फेसबुक

यल- सरकारं फास्ट ट्य्राक दयेकेगु धकाः जबरजस्ती कब्जा यानातःगु ख्वना सुदोलय् वाःपीगु झ्वलय् स्थानीय जनता व प्रहरी दथुइ झडप जूगु दु । झडपया झ्वलय् प्रहरी हवाइ फायरया लिसें टियर ग्याँस कयेकेगु, लाठीचार्ज यायेगु याःगु खः । झडपय् लानाः छम्ह मचा लिसें न्याम्ह घाःपाः जूगु दु ।

झडपय् लानाः उज्वल महर्जन नांया मचा लिसें सतक विस्तार पीडित संघर्ष समितिया अभियन्ता विद्या श्रेष्ठ लिसें स्थानीय दुर्गाराम महर्जन, रामकुमार महर्जन, मनोज महर्जन घाःपाः जूगु दु । घाःपाः जूपिंत यलया अल्का अस्पताय वासः यायेत यंकूगु दु । घाःपाः जूपिं मध्ये गुलिसिया छ्यं तज्याःगु व गुलिसियां न्हाय् त्वःधूगु खँ स्थानीय कृष्ण डंगोलं कनादीगु दु ।

थुगु जग्गा लाःगु वडा यल महानगरपालिका २१ वडाया अध्यक्ष कृष्णभक्त महर्जनं बियादीगु जानकारी कथं प्रहरीं बिना चेतावनी लाठीचार्ज याःगु खः । उकियात स्थानीय लिसें स्वनिगः थीथी थासं वःपिं जनतां प्रतिकार याःगु खः । प्रहरी वाः प्यूवःपिंत दमन यायेगु झ्वलय् झिंगुंगः टियर ग्याँस कयेकूगु व स्वक्वः हवाई फायर याःगु खः ।

ख्वनाया लाछिं बाजं थानाः सुदोलय् वाः पीगु निंतिं मंकाःज्या याःवंगु खः । वंगु असार १५ गते नं थन वा प्यूगु खःसा उबलय् ल्यं दुगु थासय् शनिवाः हाकनं वाः पीवंगु खः । शनिवाः वाः पीत वइगु अनुमान यानाः प्रहरी न्हापा हे च्वनाच्वंगु खःसा स्थानीय जनतां न्हापा वा पिउगु थाय् स्वयां १०० मिटर उत्तरपाखे वाः प्यू वंबलय् प्रहरीं अन नं पंवःगु खः ।

स्थानीय जनता वाः पीत तयारी यानाच्वंथासय् पनेगु निंतिं प्रहरी वनेत स्वःगु इलय् वाः पीगु ज्याया समर्थनया निंतिं थीथी थासं अन वयाः मुनाच्वंपिं द्वःछिं मल्याक आन्दोलनकारीतय्सं प्रहरीयात वाः पिनाच्वंगु थासय् मछ्वयेगु निंतिं नाराबाजी यानाः पनेगु कुतः याःगु खः । थ्व इलय् आकाझाकां प्रहरीं लाठीचार्ज याःगु खः ।

लाठीचार्ज जूसां वा पीगु ज्या धाःसा निरन्तर जुयाच्वंगु खः । आन्दोलनकारीतय्त लिनाछ्वयः वाः पिनाच्वंगु थासय् पं वंगु खःसां अन नं वा पीनाच्वंपिं स्थानीतय्सं प्रहरीया प्रतिकार यानाः वा पीगु ज्या न्ह्याकूगु खः । लिनाछ्वःपिं आन्दोलनकारीत नं हाकनं वयाः प्रहरीयात पंवंगु खः ।

वा पिउवने न्ह्यः लाछि शुरु जूगु जुलुसय् उर्वर भूमिइ डोजर छ्यलेगु मखु कू छ्यलेगु खः, कर्मशील किसानयात बन्दुक क्यनेगु मखु, सीमा मिचे याःपिंत क्यनेगु खः, किसानया भूमि लित ब्यु, भूमि लाकेगु बन्द याः, नेपाली सेना ख्वना त्वःति, फुसा सीमाय् हुँ, जिमिसं प्यारा ड्रोपिङया निंतिं जग्गा बियागु खः, सेनाया क्याम्प तयेत मखु, जिमिगु जग्गा लित बिउ’ धइगु नारा थ्वयेकाः प्लेकार्ड ब्वयेगु ज्या जूगु खः ।

म्हिगः ख्वनाया स्थानीय जनतायात तिबः बीगु निंतिं येँया तोखा, थक्वाः, येँ, यल, ख्वपया जनता अन थ्यंकः वःगु खः ।