डब्लुएनओया हलिं नेवाः न्ह्यसः लिसः कासा
येँ- वल्र्ड नेवाः अर्गनाइजेसन (डब्लुएनओ)या ग्वसालय् हलिंन्यंकंया नेवाःतय् दथुइ न्ह्यसः लिसः कासा याइगु जूगु दु । डब्लुएनओ छगू दशक क्यनेत्यंगु लसताय् झिंनिगू तगिं तकया ब्वँमिपिनि दथुइ उगु न्ह्यसः लिसः कासा यायेत्यंगु खः ।
हलिं नेवाः न्ह्यसः लिसः कासा ११४१या नामं जुइत्यंगु कासाय् नेपाःलिसें विदेशय् च्वनाच्वंपिं नेवाः नापं नेवाः भाय् सःपिं व नेवाः भाय्यात मतिना याइपिं न्ह्याम्हेसिनं नं ब्वति काये फइगु ग्वसाः खलकं जानकारी बिउगु दु । कोरोना संक्रमणया जोखिमयात ध्यानय् तयाः भर्चुअल माध्यमं जूम प्रविधिपाखें जुइगु कासाय् स्वम्हेसिया छगू पुचः जुइमाःगु व प्रत्येक पुचलय् छम्ह मिसा अनिवार्य दयेमाःगु प्रावधान दुगु न्ह्यसः लिसः कासा ग्वसाः पुचःया कजि विमलमान श्रेष्ठं जानकारी बियादीगु दु ।
कासाय् ब्वति कायेत नेपाःपाखें ब्वति काइगु पुचलं १,०००÷– (द्वःछि तका) व विदेशय् च्वंपिंत २५ अमेरिकी डलर शुल्क पुलेमाःगु व्यवस्था यानातःगु दु । कासाय् ब्वति कायेत डब्लुएनओया वेब पेजय् वनाः फाराम जायेके फइगु नं वय्कलं कनादिल । वइगु गुंलाथ्व खस्थि (साउन ३० गते) निसें न्ह्याइगु न्ह्यसः लिसः कासाय् ब्वति काइपिंसं दिल्लागा सप्तमि (साउन १७ गते) तकया दुने नां दुथ्याकेत धाःगु दु । कासाय् स्वीनिगू पुचःयात जक दुथ्याकेगु व दुहां वःगु पुचःयात समूह विभाजन यानाः प्रत्येक समूहय् प्यंगू प्यंगू पुचःया दथुइ कासा जुइगु कजि श्रेष्ठं जानकारी बियादिल । न्हापांगु चरणय् प्रत्येक समूहपाखें उत्कृष्ट निगू पुचः निगूगु चरणय् वनीगु व उगु चरणय् नं उत्कृष्ट छगू पुचः मेगु चरणय् वनी । अनं लिपा प्यंगू पुचःया दथुइ बिजं कासा जुइगु नं वय्कलं कनादिल ।
कासाय् न्हापयात ६०० अमेरिकी डलर, लिउयात ४००, लियांलिउयात ३०० व हःपाःयात १५० अमेरिकी डलर सिरपाः बीगु जूगु दु । थुकथंया हरेक चरणय् उत्कृष्ट जूगु पुचःयात नं सिरपाःया व्यवस्था यानागु ग्वसाः खलकं जानकारी बिउगु दु ।
हलिं नेवाः न्ह्यसः लिसः कासा ११४१ ताःलाकेत भाजु विमलमान श्रेष्ठ (क्यानाडा)या संयोजकत्वय् छगू ग्वसाः पुचः नं नीस्वंगु दु । पुचलय् संयुक्त श्रेष्ठ (बेलायत) व
दीपेशमान शाक्य (आयरल्याण्ड) लिउ कजिकथं च्वनादीगु दु । अथे हे दुजलय् केशरमान ताम्राकार (अमेरिका), कृष्ण चखुं (बेलायत), उत्तम माकजु (क्यानाडा), भुषणलाल श्रेष्ठ (अमेरिका), नरेश ताम्राकार (क्यानाडा), रश्मिला प्रजापति (नेपाः), शाक्य सुरेन (नेपाः) शोभित शाक्य (इस्टोनिया), मय्जु रजनी श्रेष्ठ (बेल्जियम), समन्त वज्राचार्य (अमेरिका), कमल श्रेष्ठ (न्युजिल्याण्ड), उदेन न्हूसाय्मि (नेपाः) च्वनादीगु दु ।
थुकथं कासा ताःलाकेत दया शाक्य (अमेरिका)या संयोजकत्वय् योग्यता व निर्णायक कमिटी, केशरमान ताम्राकार (अमेरिका)या संयोजकत्वय् न्ह्यसः लिसः निर्माण कमिटी, संयुक्त श्रेष्ठ (बेलायत)या संयोजकत्वय् न्ह्यसः लिसः कासा प्रविधि कमिटी, भूषणलाल श्रेष्ठ (अमेरिका)या संयोजकत्वय् अर्थ व्यवस्थापन समिति, रश्मिला प्रजापति संयोजक व उदेन न्हूसाय्मि (नेपाः) सह संयोजक जुयादीगु प्रचारप्रसार कमिटी गठन यानातःगु दुसा सामाजिक संजाल संयोजककथं मय्जु लालिमा श्रेष्ठ, आशुतोष बाराही व पुजल वज्राचार्ययात ल्यःगु दु ।
लिसें डब्लुएनओया नायः सिजन श्रेष्ठ, संरक्षक दया शाक्य व नारायण राजभण्डारीयात सल्लाहकारकथं ल्यःगु दु । कासा मू ग्वसाः पुचलय् अमेरिका, क्यानाडा, बेलायत, आयरल्याण्ड, बेल्जियम, इस्टोनिया व न्यूजिल्याण्डपाखें नं प्रतिनिधित्व जुयाच्वंगु दु ।
LEAVE YOUR COMMENTS