उदाय् म्युजियमया बुसादँ हन

येँ – हर्षरत्न—लक्ष्मीप्रभा लुमन्ति दिवस व उदाय् म्युजियमया बुसादँ वंगु शनिवाः घ्यःचाहु सन्हुया दिनय् असंया उदाय् छेँय् हंगृु दु ।
यँे महानगरपालिकाया मेयर विद्यासुन्दर शाक्यया मूपाहां कथं झायादीगु उगु ज्याझ्वलय् उदाय् छेँया छेँ थुवाःपिं हर्षंरत्न तुलाधर व लक्ष्मीप्रभा तुलाधरपिनिगु किपातय् स्वांमा क्वखाय्का न्ह्याःगु थुगु ज्याझ्वलय् उदाय् समाजया न्वकु डा.प्रेमरत्न स्थापितजुं लसकुस यानादीगु खः ।

ज्याझ्वलय् मूपाहां मेयर शाक्यं येँ महानगर पालिकां सम्पदायात संरक्षण यायेगु मनसुवाकथं सम्पदा कःघाना दयकेगु ज्या यानाबलय् थीथी कथंया पंगःत वयाच्वंगु खँ न्ह्योथनादिसें झीसं बांलागु मनं ज्या याना वनेगु् यानावन धाःसा सुं नाप नं ग्यायमालि मखु धैगु धारणा पित वियादीगु खः । नेपाःया सम्पदा झी सकसिगु जूगुलिं थुगु सम्पदा बचे याय्गु दायित्व झी सकसिगु खः धयादीगु दु । वयकः भाजु शाक्यजुं झीगु गौरवं जागु झीगु सम्पदा वचे यायेत छिकपिंसं तिवः बियादिल धाःसा ज्या यायेत आत्मबल थहां वइगु खँ नं कनादिल ।

उगु ज्याझ्वलय् उदाय् म्यूजियमया कजि डा.सुमन कमल तुलाधरं उदाय् समाजं चायकूगु उदाय् म्युजियम उदाय्तयगु जक मखु धयादिसें थुकियात विस्तारं सकल नेवाःतय्गु संस्कृतियात न्ह्यब्वयेगु जुइ धकाः नं धयादिल ।

ज्याझ्वलय् सभापतिया थासं उदाय् समाजया नायः डा. रूपज्योति कसाः झी नेवाःतय्गु कला, संस्कृतिया नाप नापं झीगु मांभाय्या रूपय् दुगु नेवाः भाय्यात गथे याना संरक्षण याना वनेमालि धकाः नं बिचाः यायेमाःगु खँ कनादिल । नापं वयकलं ल्हासा नेवाःतय्गु बारे नं खँ कनादीगु खःसा थःम्ह ल्हासाय् यानागु व्यापारया लुमन्ति नं न्ह्यथनादीगु खः ।

नापं वय्कलं थःगु खँया झ्वलय् येँ महानगरपालिकां स्कुलय् नेवाः भाषां ब्वंकेगु ज्या यानादीगुयात नं च्वछायादीगु दु । उगु हे ज्याझ्वलय् मूपाहां मेयर शाक्यं उदाय् म्यूजियमया भर्चुअल टुर ज्याया नं उलेज्या यानादीगु दुसा वय्कलं स्वयम्भू महाचैत्य ल्ह्वने ज्याय् उदाय् वर्गया योगदान बारे ब्वज्याया नं उलेज्या यानादीगु खः । थुगु ब्वज्याय् स्वयम्भू ल्ह्वने ज्या याःबलयया ऐतिहासिक किपा नं ब्वयातःगु खः ।
ज्याझ्वलय् उदाय्तय्सं ल्हासाय् वना व्यापार याःवंलय्या आपालं महत्वपूर्ण किपा व भ्वंत न ब्वयातःगु दु । ल्हासय्् उदाय्तय्सं गुकथं व्यापार याइ धइगु बारे छगू कुथि हे चायेकाः तःगु तकं अन ब्वयातःगु खः । ज्याझ्वःया मूपाहां मेयर शाक्ययात म्यूजियमया कजि डा. सुमन कमल तुलाधर व सिद्धार्थमान तुलाधरपिंसं स्वयम्भू ल्ह्वंबलयया व ल्हासाया थीथी पक्षया बारे कनादीगु खः ।

उदाय् छेँया रूपय् उदाय् समाजया असंय् दुगु थुगु छेँ मदुपिं हर्षरत्न तु्लाधर व लक्ष्मीप्रभा तुलाधरपिनिगु खः । लिपा वय्कःपिनि हकवालापिं पद्मज्योति कसाः, डा. रूपज्योति कसाः व दानरत्न तुलाधरपिंसं थुगु छेँ उदाय् समाजयात दान यानादीगु खः । थुकथं हे उदाय्तय्गु गुंगु थरया झिगू खलः पुचःपिनिगु म्हसीका ब्वय्कथं उदाय् छेँय् उदाय् म्यूजियम चायेकातःगु दु ।

थुगु म्युजियमय् गुंगू थरया झिगू खलः पुचः कंसाकार, असं तुलाधर, न्यत तुलाधर, स्थापित, ताम्राकार, सिन्दुराकार, बनिया, सिख्राकार, शिलाकार व सेलालिकपिनिगु परम्परागत पेशा झल्के जुइकथंया व उदाय्तय्सं छ्यला वयाच्वंगु हलंज्वलंत ब्वयातःगु दु । थुगु उदाय् म्युजियमया उलेज्या न्हापांगु खुसिइ २०७० माघ १ गते घ्यःचाकु सन्हु कुन्हु जूगु मुँज्याय् मूपाहां संस्कृतिविद् डा.सत्यमोहन जोशी, उदाय् समाजया संरक्षकद्धय कुलवीरसिंह तुलाधर व दव्यमानसिंह तुलाधरजुपिन्सं मंकाःरूपं यानादीगु खः । थुगु म्युजियमय् मनूतय्गु सिर्जनशील प्रतिभा न्ह्योब्वय्गुया लिसें उदाय् समाजया सभ्यता, पृष्ठभूमि व इतिहास थुइके फइकथंया हलंज्वलंपाखें छाय्पियातःगुु दु । थुगु उदाय् म्युजियमय् थीथी व्यत्तित्वपिंसं इलय्व्यलय् उपस्थित जुयाः उत्सुकतापूर्वक अवलोकन नं याय्गु याना वयाच्वंगु दु ।

०७२ या तःभुखाचं असंया उदाय् छेँय् नं प्रभाव लाका स्यकूगुलिं उगु छेंय् नीस्वनातःगु उदाय् म्यूजियमय् नं प्रभाव लाना छुं ला तक बन्द जुयाच्वंगु उदाय् म्युजियम हानं उदाय् छेँ बांलाक जीर्णोद्धार याय्धुंकाः हानं २०७४ माघ १ गते निसें चायेकेगु याःगु खः । हानं न्हूकथं व्यवस्थापन याना संचालन जूगु थुगु म्युजियमया उलेज्या हानं २०७४ माघ १ गते उदाय् समाजया नायो डा. रूपज्योति कसाः व समाजया निवर्तमान नायो पञ्चवीरसिंह तुलाधरजुपिंसं मंकाःरूपं रिवन चाना यानादीगु दु । हरेक माघ १ गते उदाय् म्युजियमया नं बुसादँ हनेगु याना वयाच्वंगु दु ।

सम्बन्धित बुखँ

LEAVE YOUR COMMENTS