दिल्लीं अन्धराष्ट्रवादयात अस्वीकार याःगु खः ला ?

भारतया दिल्ली विधान सभाय् आम आदमी पार्टी (आपं) ह्याट्रिक यात । थ्व पालय् नं आपं अत्यधिक बहुमत हःगु दु । दिल्ली विधान सभाया ७० सिट मध्ये आपं ६२ सिटय् त्याकूगु दु । केन्द्रीय सरकारय् बहुमत कयातःगु भारतीय जनता पार्टी (भाजपा) व छगू इलय् दिल्लीइ राज यानाच्वंगु भारतीय कांग्रेसं दिल्लीइ थ्व पालय् नं आपया न्ह्यःने छुं यायेमफुत । भाजपां मुक्कं च्यागू सिट त्याकलसा कंग्रेसया शून्यय् हे आउट जुल ।
आपया विजय लिपा भिंतुना बिसें पश्चिम बंगालया मुख्यमन्त्री ममता बनर्जीं दिल्लीइ आपया थुकथंया विजय धयागु भाजपाया विभाजनकारी राजनीतियात जनतां अस्वीकार याःगुया चिं खः धाल । अथेहे यक्वसिनं दिल्ली भाजपाया ‘पत्तासाफ’ जूगु कारण भाजपाया हिन्दूवादी नारा व विभेदकारी नीति हे जूगु खँ धयाच्वंगु दु । थथे धयाच्वंगु प्रधानमन्त्री नरेन्द्र मोदीया केन्द्रीय सरकारं हःगु नागरिकता संशोधन विधेयक (सिएए) लिसें नागरिक पञ्जीकरण (एनआरसी)या कारणं खः । नागरिकता संशोधन व नागरिक पञ्जीकरण निगुलिसनं मोदी सरकारं विभेदकारी नीति हयातःगु दु । नागरिकता संशोधनं पाकिस्तान, बंगलादेश थेंज्याःगु देशं भारतय् आप्रवासी जुया वयाच्वंपिं मुस्मां बाहेकया मेगु फुक्क धर्मयात भारतीय नागरिकता बीगु जुयाच्वंगु दुसा नागरिकता पञ्जीकरणं भारतीय नागरिकता कयामतःपिं मुस्मांतय्त देश निकाला याइगु अवस्था जुयाच्वंगु दु ।
राष्ट्रवाद व हिन्दूत्वया नारा थ्वयेका वयाच्वंगु भाजपा सरकारया थ्व निगुलिं नीति मुस्मां विरोधी जूगु व विभेदकारी, विभाजनकारी जूगु धासें पूर्वोत्तर भारतीय राज्यया लिसें थीथी राज्यय् विरोध जुयाच्वंगु दु । दिल्लीया विधानसभाय् भाजपां बांमलाक पराजय फयेमाःगु भाजपाया अन्धराष्ट्रवाद व विभेदकारी नीतिया कारणं खः धाइपिं यक्व दु । तर धाथें मुस्मांतय्त विभेद याइगु थ्व हे नीतिया कारणं भाजपाया पराजय जूगु खः ला । दिल्लीइ जूगु मतदानया तथ्यांकं धाःसा थथे धयाच्वंगु खनेमदु । अःखबतं भाजपायात ययेकूपिं हे अप्वः खनेदयाच्वंगु दु । अले थ्व हे धर्मनिरपेक्ष, संसारया दकलय् तःधंगु प्रजातन्त्र दुगु देय् धाइगु भारतया निंतिं दकलय् तःधंगु विडम्बना जुयाच्वंगु दु ।
सन् २०१५ य् जूगु व आः जूगु दिल्ली विधान सभाया चुनावयात दुवाला स्वयेगु खःसा थुगुसी भाजपायात अझ अप्वः मत वःगु दुसा सिट नं यक्व त्याकूगु दु । २०१५ या चुनावय् नं दिल्लीइ भाजपा बांमलाक पराजित जूगु खः । उबलय् ७० सिटया चुनावय् आपं ६७ सिट त्याकूगु खःसा भाजपाया ल्हातय् स्वंगू जक सिट वःगु खः । तर थ्व पालय् भाजपां च्यागू सिट त्याकूगु दु । थ्व धयागु न्हापाया चुनावय् स्वयां न्यागू सिट अप्वः खः । अथेहे पूवंक प्राप्त जूगु मतया ल्याखं स्वयेगु खःसां नं भाजपां २०१५ य् स्वयां ६ प्रतिशत अप्वः मत काःगु दु । थ्व ल्याखं स्वयेगु खःसा दिल्लीइ भाजपाया प्रदर्शन न्हापा स्वयां बां हे लाःगु दु । भारतया हे छुं छुं राजनीतिक विश्लेषकतय्सं भाजपायात वःगु मत प्रतिशतयात विश्लेषण यासें भारतीय जनता अझ नं प्रधानमन्त्री मोदी व गृहमन्त्री अमित शाहया हिन्दूत्वया नारा लिउलिउ हे दुगु विश्लेषण यानाच्वंगु दु । थुकीया मेगु छगू उदाहरण ला वंगु लोकसभा चुनावय् दिल्लीया फुक्कं सिटय् भाजपां त्याकूगुलिं नं क्यंगु दु ।
दिल्ली भाजपा बूगु कारण हिन्दूवादी नारा व विभेदकारी नीति मखु धाइपिं विश्लेषकतय्सं आप त्याःगु मू कारण धयागु आपं वंगु न्यादँ दुने दिल्ली यानाक्यंगु ज्याया कारण हे जक जूगु खँ धाइ । आपं वंगु न्यादँ दुने दिल्लीइ लछिया २०० युनिट तक मत छ्यलीपिंत निःशुल्क मत बियाच्वंगु दु, अथेहे लछिया २० हजार लिटर तक निःशुल्क बियाच्वंगु दु । थुकिया लिसें दिल्लीया त्वाःत्वालय् प्यसलं मल्याक ‘मोहल्ला अस्पताल’ चायेकाः निःशुल्क उपचार सेवा बियाच्वंगु दु । सरकारी स्कुलय् तःधंगु सुधार हःगु दु । आप त्याःगु मू कारण थ्व हे खः । आपं नं दिल्ली चुनावय् थःपिंसं यानाक्यनेगु ज्यायात हे जक न्ह्यब्वयेगु यानाच्वंगु दु । आपया नेता व दिल्लीया मुख्यमन्त्री जुयाच्वंगु अरविन्द्र केजरीवाल स्वयमं नं थःगु चुनावी प्रचारय् आपं याःगु ज्यायात हे क्यनेगु यात । थःगु भाषणय् केजरीवालं गुबलें नं भाजपाया विभेदकारी नीतियात कयाः आक्रमण मयाः ।
भारतीय मतदातातय्के थौंकन्हय् केन्द्रीय सरकार व राज्य सरकार छु खः धयागु फरक थुइकेफुगु क्षमता दयेधुंकूगु दु । उकिं दिल्लीइ ज्या याःगु सरकारयात प्राथमिकता बियाः आपयात त्याकेगु ज्या यात । अले आमचुनावय् भाजपायात हे मत बिल । केन्द्रीय स्तरय् सरकार दयेकीगु आम चुनावय् भाजपायात मत बिउगु धयागु दिल्लीया जनतां भाजपाया विभेदकारी राष्ट्रवादयात स्वीकार याःगु खः । दिल्लीया जनता अन्धराष्ट्रवादया हे लिउलिउ दु धयागु संकेत खः । थ्व प्रजातान्त्रिक देय् धयातःगु भारतया निंतिं जक मखु समग्र दक्षिण एशियाली देतय् निंतिं नं चिन्ताया विषय खः ।

सम्बन्धित बुखँ

LEAVE YOUR COMMENTS