सम्पदा नेपाःया म्हसीका

सगरमाथाया देय् नेपाः, बुद्ध जन्मय् जूगु देय् नेपाः, सीता जन्मय् जूगु देय् नेपाः, कला–संस्कृति–जात्रापात्रा– नखःचखः–ऐतिहासिक पुरातात्विक साँस्कृतिक सम्पदां भरिपूर्ण देय् नेपाः । गुलिखे साँस्कृतिक सम्पदात विश्व सम्पदा धलखय् सूचिकृत जुयाच्वंगु दु। स्वनिगलय त्वाः त्वाःपतिकं सम्पदा दुगु नेपाःयात देगः व देगःया देय् धकाः नं धाइ । नेपाःया सांस्कृतिक सम्पदा हे नेपाःया म्हसीका खः ।

नेपाःया थ्व हे कला–संस्कृति–साँस्कृतिक सम्पदायात अबलोकन यायेत विदेशं लखंलख पर्यटक वइ, तर थ्व हे नेपाःया म्हसीका जुयाच्वंगु सांस्कृतिक सम्पदात लिपांगु इलय् अतिक्रमण जुया वनाच्वंगु खनेदु। आप्रवासितय्सं स्वनिगःया सम्पदात अतिक्रमण यायेगु यानाच्वंगु दु ।

अथे ला लिपांगु इलय् सांस्कृतिक सम्पदा जक मखसे सार्वजनिक जग्गा–जमिन, उब्जाउ जग्गा–जमिनत नापं अतिक्रमण जुयाच्वंगु दु। गुलिखे जग्गा–जमिन विदेशीतय्सं अतिक्रमण यानाच्वनसा गुलिखे सार्वजनिक जग्गात भूमाफियातय्सं अतिक्रमण यानाच्वन । अथे हे गुलिखे जग्गा– जमिन सरकार, स्थानीय सरकार, सैनिकतय्सं अतिक्रमण यानाच्वंगु खनेदु ।

नेपाः देय् जीवित देवी कुमारी माजुया देय् धकाः विश्वय् लोकंह्वाः । नेपाःया कला संस्कृति सम्पदा जात्रापात्रा नखःचखः रहनसहन नेपाःया म्हसीका खः । नेपाःया कला–संस्कृति, धार्मिक, ऐतिहासिक सम्पदां विदेशीतय्त आकर्षित यानाच्वंगु दु। नेपाःया कलासंस्कृति सम्पदात झी पुर्खां गुलि मेहनत यानाः दयेकाः थकुगु खः, व साँस्कृतिक सम्पदात चायेकं मचायेकं अतिक्रमण जुयाच्वंगु खनेदु ।

स्वनिगःया देगत स्वनिगः पिने वयाच्वंपिं आप्रवाशीतय्सं अतिक्रमण यानाः फुटपाथ पसः तयाच्वंगु दु । अथे हे येँया थीथी थाय्, देगः, फल्चा, दबू सतक गल्लिइ फुटपाथ पसः तयाः अतिक्रमण यानाच्वंगु दु। थौंकन्हय् विश्वय् माहामारि कथं फैलय् जुयाच्वंगु कोरोना ल्वचं नेपालय् नं न्हियान्हिथं संक्रमित अप्वया च्वंगु दु। लकडाउनया इलय् कोरोना माहामारि कथं न्यनाच्वंगु इलय् भिडभाड यायेमजिउ धाःसां येँया थीथी थासय् बँपसः तयाः भिडभाड यानाच्वंगु खनेदु। थुकी कोरोना भाइरस सरे याइगु सम्भावना अप्वया वयाच्वंगु दु। तर थज्याःगु अवस्थाय् नं अस्तब्यस्त कथं सतक फुटपाथ सम्पदा अतिक्रमण यानाः बँपसः तयाच्वंसां नं स्थानियतय्त मतलब दु, न त येँया स्थानीय सार्वजनिक जग्गा, सम्पदा संरक्षण यायेगु व येँ देय्यात व्यवस्थित यायेगु जिम्मा कयाच्वंम्ह स्थानीय सरकारयात हे मतलब दु ।

स्वनिगःया सौन्दर्य धइगु अझ नेपाःया सौन्दर्य धइगु सांस्कृतिक सम्पदा खः, तर स्वनिगः सम्पदाया शहरयात सम्बन्धि सरोकारवालातय्सं भ्यु टावरया शहर, स्मार्ट सिटी दयेकेगु कुतः यानाच्वन धाःसां जिउ । तःतजाःगु भ्यु टावर दयेकेगु सार्वजनिक जग्गा अतिक्रमण यानाः रंगशाला दयेकेगु, २५ तल्लाया भ्यु टावर दयेकेगु, अर्बौं खर्च यानाः सभाहल दयेकेगुलि हे ध्यान केन्द्रीत जुयाच्वंगु खनेदु ।

स्वनिगलय् खालिगु खुल्ला थाय् खंके हे मजिइ धुंकल अतिक्रमण यायेगु यानाच्वंगु खनेदु। थुकी स्वंगुलिं तहया सरकार, नेता, सांसद्त हे लगे जुयाच्वंगु खनेदु। स्वनिगःयात दयेके माःगु हेरिटेज सिटी (सम्पदाया शहर), तर स्मार्ट सिटी, भ्यु टावरया सिटी दयेकेगु कुतः जुयाच्वंगु खनेदु। खस भाय्या उखान दु नि ‘काम कुरो एकातिर, कुम्लो बोकि ठिमि तिर’ धाःथें । नेपालय् विदेशी पर्यटक नकलि धरहरा, तःतजाःगु भ्यु टावर, तःतजाःगु सभाहल स्वयेत वइगु मखु नेपाःया प्राकृतिक सौन्दर्य नेपाःया साँस्कृतिक ऐतिहासिक पुरातात्विक सम्पदा स्वयेत वइगु खः ।

सम्बन्धित बुखँ

LEAVE YOUR COMMENTS