….. कोरोना, मूल्यवृद्धि थी फइमखु

अखबारय् छपाः किपा खनी । थाय् । पेट्रोल पम्प । छम्ह मोटरसाइकल गयावःम्ह । शायद पेट्रोल जायेकाः ध्यबा पुलाच्वंगु जुइ । छप्पँ नोट बियाच्वनी । किपा भचा तुंक स्वये लात । जिगु मिखा साली । ध्यान उकी तक्यनी । मोटरसाइकल गया वःम्ह मनूया म्हय् वस्त्र मदु । नांगा । कट्टुचा छगः न्ह्यानातःगु दु थें च्वं ! स्वीमिंग याइपिं मिसातय्सं न्ह्याइगु विकिनी थें ! छबालाचा । किपा स्वयाम्ह जि अलमल जुल । थ्व मनुखं गन मास्क तया वःगु ? मखु मखु व मास्क मखु । कट्टुचा हे खः । नां जकसां उकिं वं थःगु लाज त्वपुया वःगु जुयाच्वन । तर । थ्व बाहेक वया म्हय् वस्त्रया नामय् सुकाति छपु हे मदु । म्ह छम्हं छर्लङ्ग ! थ्व मोटरसाइकल थुवाः ! छाय् थज्याःगु जंगली भेषय् वल ! जितः अजू चाल ।

शायद ग्रिष्म ऋतुया तापं छटपट जुयाः वं म्हय् वस्त्र मतःगु ला ? मखु, छेँय् च्वनेबलय् यथे च्वं ले ! तर पिने वयेबलय् गंजि छपाःसां ला फिना वये माःनि ! थः यथे याना जुइ दइ ला ? ……. धाइ ल्हाइया नं विचाः याये माः नि ……. स्वरे ! गुलि याउँक लं लिं छुं मफिउसे पचिंम्हं मोटरसाइकल ब्वाका जूगु ……. छु फेशन वःगु थ्व ! थ्व ला अति हे जुल ! किपा स्वस्वं मनय् अनेक खँत लुया वइ ।

तर । खँ मेगु हे जुयाच्वन । किपा क्वय् च्वयातःगु क्याप्सन ब्वने । मोटरसाइकलवालाया वस्त्र बहिष्कारया रहस्य थुया वइ । सरकारं पेट्रोलया भाः वृद्धि यानाच्वंगु दु । तःक्वःमछिं हे यायेधुंकल । पेट्रोलया भाः निरन्तर वृद्धिया विरोधय् प्रतिरोध स्वरुप मोटरसाइकलय् वःम्ह भाजुं थःत नांगां प्रस्तुत याःगु जुयाच्वन । थथे हे सरकारं मिखा तिसिनाः पेट्रोलया भाः वृद्धि याना वन धाःसा मोटरसाइकल गइपिंनि हालत थथे हे जुइ ……. मुस्किलं कय्ताया भरय् म्वाय् माली ……. थ्व चेतावनी बीत मोटरसाइकल चालक पेट्रोल पम्पय् कय्ताया भरय् पेट्रोल कायेत वःगु जुयाच्वन । किपातं सन्देश उला हःलिसे किपाया अर्थ झं झं गहन जुयाबी ।

पेट्रोलया मूल्यवृद्धिया विरोधय् किपातं दुग्यंगु प्रतिकात्मक अर्थ थ्वइ । प्रतिरोधया लँपुइ थ्व किपा न्हूगु प्रयोग खनेदइ । विम्ब जुयाः लुइ । जितः मोटरसाइकल गया वःम्हेसिया पचिंम्ह कविता थें ताइ ….. तसकं सान्दर्भिक, सामयिक ताइ । थ्व प्रयोग व्यक्तिगत जक मजुसे मूल्यवृद्धिं ग्रस्त सम्पूर्ण साधारण मनूतय् पीडा, चिन्ताया वाहक जुयाबी । पक्का !

देय् थौं कोरोनाया अकल्पनीय मारय् लानाच्वंगु दु । जनसाधारणया आर्थिक गतिविधि दक्व शिथिल जुया बिउगु दु । अथें नं संकटग्रस्त जुयाच्वंगु इलय् बजारय् अन्धाधुन्ध मूल्यवृद्धि जुयाच्वंगु दु । थ्व अमानवीय धंगं जुयाच्वंगु मूल्यवृद्धिं जनतायात संकटया इलय् घालय् चि मल्ता ह्वले थें जुया बिउगु दु । सरकारं थुकियात पने फुगु मखु । सरकार थौं जनसरोकारया खँय् मूकदर्शक । बुँख्याःचा थें !

सरकारं आर्थिक गतिविधि सक्रिय यायेत लाकडाउन खुल्ला याना हइ । तर लकडाउन चिइकेवं विद्यमान खतरा, संकटं पिहां वये फइगु स्थिति मदु । चिकित्सकतय्सं लकडाउन छ्वासुकेगु वैज्ञानिक दृष्टिकोणं उचित मखु धयाच्वंगु दु । थौं महामारीया इलय् चिकित्सकतय् वैज्ञानिक धापूयात नं बेवास्ता याये फइगु स्थिति मदु । मेखेर जनताया आर्थिक गतिविधियात नं गुलि कुण्ठित याना तयेगु ? थ्व नं गम्भिर न्ह्यसः जूगु दु । थ्व जटिल समस्याया तःधंगु उपाय आम जनतायात खोप बीगु खः । विज्ञतय् धापू दु । गुलि याकनं आम जनताय् खोप थ्यंके फइ, देय्या भविष्य नं उकी हे निर्भर जुइ । उकिं सरकारं सम्पूर्ण शक्ति खोप चूलाकेगु ज्याखँय् छयलेमाः । खोप प्राप्त यायेगु लागि विविध खोप उत्पादक देय्तलिसे पहल यायेमाः। थ्व खँय् जुइगु ढिलासुस्तीं देशं तःधंगु मूल्य चुके यायेमाली । होसियार ! सरकार !

तर अफसोच ! देय्या राजनीतिक अवस्था डावाडोलया स्थितिइ । छखे जनताया जीवन मरणया प्रश्न ! मेखेर राजनीतिक नेतात जालझेल,षडयन्त्रय् व्यस्त । सरकार, ओली व माधव नेपालया अहंकारया ल्वापुइ चाःहिलाच्वंगु दु । स्वंगू करोड जनता थौं ओली, माधवया न्ह्यःने निरीह जुइमाःगु दु । नेता प्रचण्डया आलाप ः लँय् लूगु दक्व फुक्क दलत मुनाः वृहत कम्युनिष्ट एकता दयेके, दयेके । तर आधार सिद्धान्त मखु । एकीकृत कम्युनिष्ट ‘पाष्टिज’ कला दयेकेगु लहड जक ।

‘पाष्टिज’ कला धइगु उखेंथुखें भ्वंतय् कुचा कुचात स्वानाः दयेकीगु कलाकृति खः। चमत्कारी कला ! कमरेड प्रचण्डं कांग्रेसया नेता शेरबहादुर देउवायात कयाः कम्युनिज्म स्वयां नं कम्युनिष्ट धाःगु लुमनी । माःगु स्वयां नं माक्र्सवादी धाःगु शक्ति लुमनी । थज्याःगु हे भ्वय् कासाय् देय्या नेतात मग्न, स्वप्तया गाय् तल्लीन !

…. देय्या गति थथे हे जूसा ….. आम जनता कन्हय् नये त्वनेगुया समस्याय् लाइ । छु नये ? छु पुने ? ….. प्यखेरं आर्थिक संकट वइ ….. अले पेट्रोलया अन्धाधुन्ध मूल्यवृद्धिं मोटरसाइकल चालक कय्ताया भरय् लाः थें आम जनतां नं थःगु आर्थिक पोशाकया नामय् ‘कय्ता’ व ‘बिकिनी’या भर काये माली । ….. अले देशया राष्ट्रिय पोशाक फिइपिं, करोडौं वंगु मोटर गइपिं मात्र राजनेता जुइ । इमित कोरोना, मूल्यवृद्धिं थी फइमखु ।