सिक्टा सिँचाईया ज्या तसकं सुस्त

येँ – बाँकेय् दयेकाच्वंगु राष्ट्रिय गौरबया सिक्टा सिँचाइ आयोजनाया ज्या तसकं सुस्त जुयाच्वंगु दु । दयेकेगु सुरु जूगु झिंप्यदँ लिपा नकतिनि ६० प्रतिशत जक ज्या क्वचाःगु दु । सरकारं थःगु हे स्रोतं वि.सं. २०६३ साल माघय् दयेकेगु सुरु याःगु थ्व नेपाःया हे दकलय् तःधंगु सिँचाइ आयोजना खः ।

२५ अर्ब लागतं दयेकाच्वंगु थ्व आयोजनाया ६० प्रतिशत ज्या क्वचाःगु आयोजना प्रमुख कृष्णप्रसाद नेपालं धयादीगु दु । वय्कःया कथं सिक्टाया फुक्क ज्या थ्व ह आर्थिक दँ २०७६–७७ दुने क्वचायेकेगु सरकारी लक्ष्य दु ।थ्व आयोजनाय् ४५.२५ किलोमिटर ताःहाकःगु पश्चिमी व ५३ किलोमिटर ताःहाकःगु पूर्वी नहरं बाँकेया ४२ हजार हेक्टर बुँ सिँचाइ यायेगु ताः तयातःगु दु । बाँकेय् ३५ हजार ९७० हेक्टरय् वाबाली जुइ ।

उकी मध्ये १३ हजार ७०० अर्थात थ्यंमथ्यं २५ प्रतिशत क्षेत्रय् जक सिँचाइ सुविधा दु । सिँचाइ सुविधा मदुगुलिं किसानत दँय्दसं आक्सं वइगु वाय् निर्भर जुयाः वाः पिइत बाध्य जुयाच्वंगु दु । राष्ट्रिय गौरवया सिक्टा सिँचाइ आयोजनाया ऊर्जा जलस्रोत तथा सिँचाइ मन्त्री वर्षमान पुनं तःक्वः हे स्थलगत अनुमान यानाः इलय् हे ज्या सिधयेकेत निर्देशन बियाच्वंगु दु, अथे खःसां उकिया लिच्वः धाःसा खने दयाच्वंगु मदु ।

आयोजनाया अझं मू नहर दयेकेगु ज्याय् हे तक्यनाच्वंगु दु । आयोजनाया शाखा व उपशाखा नहर दयेकेगु ज्या सुस्त जुयाच्वंगु दु । स्वदँ न्ह्यव अगैयाय् च्वंगु मू बाँधय् जडान याःगु १८ पाः गेट सिँचाइया निंतिं उपयोगय् हयेफुगु मदुनि । सिक्टाया पश्चिम मू नहर दयेके क्वचाःसां हस्तान्तरण याये न्ह्यः यानास्वइगु परीक्षणय् तक्वः हे क्वःदयेगु जुयाच्वंगु दु ।

वि.सं. २०७३ असार १४ गते नं परीक्षणया हे इलय् ढकेरीइ च्वंगु झिझरी खुसि सिथय् मू नहर क्वःदःगु खः । तःक्वः हे नहर क्वःदःगुलिं सिक्टाया गुणस्तरय् हे न्ह्यसःचिं दनाच्वंगु दु । सिक्टाया सिँचाइया ज्या इलय् हे क्वमचाःगुलिं किसानतय्त थाकुयाच्वंगु खँ मू उपभोक्ता समितिया अध्यक्ष शालिकराम डाँगीं धयादीगु दु ।

‘जिमित सिँचाइ सुविधा माल धकाः मन्त्रालय निसें फुक्कं थासय् वने धुन’, अध्यक्ष डाँगीं धयादिल, ‘सकसिनं आश्वासन जक बी, जिमिगु माग अझं पूमवंनी ।’वंगु वालय् जक स्थलगत अनुगमनया झ्वलय् मन्त्री पुनं दछि दुने सिक्टा सिँचाइ आयोजनाया नहरया ज्या दछि दुने क्वचायेकेत निर्देशन बिउगु खँ बाँके क्षेत्र नं. १ या सांसद महेश्वरजंग गहतराजं कनादिल ।

वय्कःया कथं राप्ती सोनारी गाउँपालिकाया अगैयाय् च्वंगु आयोजनाया हेडवक्सस्थलय् वनाः मन्त्री पुनं जलस्रोत तथा सिँचाइ विभागया महानिर्देशक मधुकरप्रसाद राजभण्डारीयात लछिया छक्वः अनिवार्य सिक्टाया स्थलगत निरीक्षण यायेगु व जलस्रोत तथा सिँचाइ सचिव रवीन्द्रनाथ श्रेष्ठयात लछिया छक्वः छन्हु सिक्टा सिँचाइ आयोजनाया प्रगति बारे मन्त्रालयय् समीक्षा यायेत निर्देशन नं बियादीगु खः ।

सम्बन्धित बुखँ

LEAVE YOUR COMMENTS