श्रम काउन्सलर व सहचारीया आवेदन चाल

येँ — श्रम तथा रोजगार मन्त्रालयं खाडीया प्यंगू देशय् श्रम काउन्सलर व सहचारीया निंतिं आवेदन माग याःगु दु ।
संयुक्त अरब इमिरेट्स (युएई) व साउदी अरबया नेपाल राजदूतावासया निंति उपसचिव सरहया श्रम काउन्सलर व कतार व बहराइनया नेपाल दूतावासया निंतिं अधिकृतस्तरया श्रम सहचारीया निंतिं आवेदन माग यानागु खँ मन्त्रालयया प्रवक्ता भुवनप्रसाद आचार्यं धयादीगु दु ।
श्रम काउन्सलर तथा श्रम सहचारी सम्बन्धी कार्यविधि २०७३ कथं श्रम तथा रोजगार मन्त्रालय वा मन्त्रालय अन्तर्गतया विभाग व निकायं म्होतिं दछि तक ज्या यायेधुंकूपिं निजामती सेवाय् अधिकृतस्तरया कर्मचारीया रुपय् सेवा प्रवेश याःगु ई म्होतिं नं स्वदँ पूवनेधुंकूपिंसं आवेदन बीफइगु खँ मन्त्रालयं धाःगु दु । आवेदन ३५ न्हु दुने बीमाः ।
थ्वहे दथुइ श्रम काउन्सिलरया प्रतीक्षासूची लानाच्वंपिं मन्त्रालयया उपसचिव शिवराम पोखरेलयात कतारया श्रम काउन्सलर व मलेसियाया श्रम सहचारीइ शाखा अधिकृत सनमाया रम्तेलयात नियुक्त याःगु दु ।