खिम्ति २ चाइना कम्पनी दयेकीगु

येँ – खिम्ति जलविद्युत आयोजना चिनियाँ कम्पनीं दयेकेगु जूगु दु । आयोजना दयेकेगु सम्झौताय् हस्ताक्षर धाःसा वइगु लछि लिपा जुइगु खँ धाःगु दु । चिनियाँ कम्पनी चोरिङि वाटर एण्ड टर्वाइन वक्र्स (सिडब्लुटिलब्लुं) ४८.८ मेगावाटया आयोजना दयेकेगु खँ धाःगु दु । उगु आयोजना आरएम ग्रुप अन्तर्गत पिपुल्स इनर्जीं लिमिटेडं अनुमति कयातःगु खः । आयोजना दयेकेगु ज्या वइगु स्वदँया दुने क्वचायेकेगु कथं तयारी जुयाच्वंगु दु । थ्यमथ्यं ९ अर्ब तका तुइगु उगु आयोजना सिडब्लुटिब्लुं लिपा जक भुक्तानी कायेगु कथं दयेकेत्यंगु खः । उकिया निंतिं पिपुल्स इनर्जीं मुक्कं तूगु लागतया १० प्रतिशत अथे धयागु ९० करोड तका अग्रिम भुक्तानी यायेमाःगु खँ धाःगु दु । वयां लिपा मेगु ल्यँ दनिगु भुक्तानी धाःसा आयोजना सञ्चालनय् वःगु निदँ लिपा जक कायेगु कथं सम्झौता जूगु दु । आयोजनाया निर्माण ज्या वइगु वैशाख १ गतेनिसें न्ह्याकेगु जुइ । निर्माण न्ह्याःगु स्वदँया दुने मत उत्पादन यायेगु आज्जु तयातःगु दु ।

सन् १९३८ सं स्थापना जूगु कम्पनी सिडल्बुटिडब्लुं चीन, भारत, उत्तर अमेरिका लगायतया देशय् भुक्तानी यायेगु ग्यारेन्टी लिपा जक आयोजन दयेकेगु यानाच्वंगु खःसा नेपाःया आयोजनाय् धाःसा भुक्तानी ग्यारेन्टी मदुसां नं आयोजना दयेकेगु सम्झौता याःगु खः । थुगु कथंया सहमति आरएम ग्रुप व चिनियाँ राजनीतिक नेतृत्वया विश्वासय् आयोजना दयेकेत्यंगु खँ धाःगु दु । निजी क्षेत्रया कुतलय् छुं हे ग्यारेन्टी मदुसां नं कम्पनीं तःधंगु चिनिया लगानी हयेत ताः लाःगु दावी पिपुल्स इनर्जीं दावी याःगु दु । कम्पनीया कथं आयोजना दयेकेगु निंतिं जग्गा अधिग्रहण यायेगु ज्या क्वचायेधुंकूगु दुसा लँ दयेकेगु ज्या नं थ्यंमथ्यं क्वचायेधुंकूगु दु । कम्पनीं स्थानीय वासिन्दां छ्यले जिउगु कथं स्वपू तां दयेकाच्वंगु दु । रामेछाप व दोलखा जिल्लाया सिमानाय् आयोजना दु । थुगु आयोजनाया मत राष्ट्रिय प्रसारण लाइनय् स्वायेगु निंतिं गुगुं नं कथंया समस्या मदुगु खँ धाःगु दु । खिम्ति ढल्केबार २२० केभी प्रसारण लाइन दयेकेगु ज्या क्वचायेधुंकूगु व प्राधिकरणं १३२ केभीया मेगु प्रसारण लाइन दयेकेगु ज्या यानाच्वंगुलिं प्रसारण लाइनया समस्या मदुगु खः ।