पेट्रोल अन्वेषण ज्या सफलतापाखे

येँ – दैलेख जुयाच्वंगु पेट्रोलियम अन्वेषणया ज्या सफलतापाखे न्ह्याःवंगु दु । जिल्लाया भूभागय् अप्वः सम्भावना दुगु कारणं चीन सरकार व नेपाल सरकारया पुचलं अन्वेषण ज्या न्ह्याकूगु खः । पेट्रोलियम अन्वेषणया महत्वपूर्ण ज्या धयातःगु साइस्मिक सर्वेया ज्या आः तीव्र रुपं न्ह्यानाच्वंगु दु ।

जिल्ला थीथी भूभागया साइस्मिक सर्वेया ज्या तीव्र यायेवं याकनं हे सर्वेया निष्कर्ष वइगु आशा यानातःगु दु । चीन सरकार व नेपाल सरकारया विशेषज्ञतय् मंकाः पुचलं पेट्रोलियम अन्वेषणया थीथी ज्या नापनापं न्ह्याकूगु खः । विदेशय् पेट्रोलियम अन्वेषणया निंतिं ज्या यायेधुंकूपिं अनुभवी नेपाली ज्यामि आः थ्व ज्याय् छ्यलाच्वंगु दु ।

अनुसन्धानया निंतिं अत्याधुनिक साधन नं हःगु दु ।साइस्मिक सर्वे अन्तर्गत जमीन दुने तरङ्ग छ्वयेगु ज्या सुरु याःगु दु । थीथी प्यंगू सर्वे मध्ये दकलय् महत्वपूर्ण धयातःगु साइस्मिक सर्वेलिपा थुकिया अनुसन्धान यानाः भण्डारणया क्षेत्र म्हसीकेगु ज्या जुइ । नेपाल सरकार व चीन सरकार दथुइ जूगु सम्झौताकथं पेट्रोलियम भण्डारया अप्वः सम्भावना दुगुलिं दैलेखया थीथी भूभागया २० किलोमिटर क्षेत्र दुने झिगू सर्कलय् जमीन तःलय् ड्रिलिङ ज्या सुरु याःगु खः ।

झिगू मध्ये छगू सर्कलय् जमीन क्वय् करिब ४५ फिट तक ड्रिलिङ्ग लिसें विस्फोटक पदार्थ तयेगु ज्या जुइधुंकूगु दु । मेगु सर्कलय् उगु ज्या तीव्र रुपं न्ह्यानाच्वंगु दु । जमीन क्वय् तरङ्ग छ्वयाः तरङ्गया मापन याइगु व व हे कथं भण्डारणया अप्वः सम्भावना दुगु थासय् मुख्य ड्रिलिङ्गया ज्या जुइगु खँ खानी तथा भूगर्वविद् व अन्वेषण ज्याया निंतिं खटे जयाच्वंम्ह खानी तथा भूगर्भ विभागया अन्वेषण अधिकृत डा. गणेशनाथ त्रिपाठीं धयादिल ।

साइस्मिक सर्वे अन्तर्गत जमीन दुने तरङ्ग छ्वयेगु ज्या सुरु याःगु दु । थीथी प्यंगू सर्वे मध्ये दकलय् महत्वपूर्ण धयातःगु साइस्मिक सर्वेलिपा थुकिया अनुसन्धान यानाः भण्डारणया क्षेत्र म्हसीकेगु ज्या जुइ ।

पहाडी भूभाग जूगुलिं साइस्मिक सर्वेया निंतिं आवश्यक उपकरण कायेत व यंकेत समस्या जुयाच्वंगु खँ वय्कलं धयादिल । पाखा जमीन व अप्वः थें थासय् ल्वहंया ल्वहं दुगुलिं सामान्य समस्या जूसां ज्याया गति धाःसा मदिउगु खँ अन्वेषणय् संलग्न पुचलं धाःगु दु । अन्वेषणया निंतिं ड्रिलिङ्ग मेसिन तयेमाःगु, व लिसें जेनेरेटरलगायतया सामान हयेगु यंकेगु समस्या जुयाच्वंगु दु ।

छगू पुचलय् च्याम्ह नेपाली ज्यामि व निम्ह विज्ञ दुथ्याःगु पुचलं थीथी झिगू सर्कल दुने ज्या यानाच्वंगु दु । चट्टानया कारणं गुबलें गुबलें मेसिनय् सामान्य समस्या जुइगु नं जुयाच्वंगु दु । अथेखःसां तुरुन्त मेसिन दयेकाः ज्या सुरु जुयाच्वंगु खँ साइस्मिक परियोजनाया व्यवस्थापन जिम्मेवार कयादीम्ह सूर्यमणि लामिछानें कनादिल ।

अन्वेषण ज्याया निंतिं आवश्यक जूगु फुक्क कथंया सुरक्षा व्यवस्था मजबुत जुइधुंकूगु जिल्ला प्रशासन कार्यालयं धाःगु दु । प्रमुख जिल्ला अधिकारी युवराज कट्टेलं राष्ट्रिय महत्वया परियोजना जूगुलिं जिल्लाया समग्र सुरक्षाया व्यवस्थापन यानागु व परियोजना सफल जुल धाःसा आर्थिक रुपं नेपाःया तःधंगु हिउपाः वइगु खँ धयादिल ।

जिमिसं पुचलय् खटे जुयाच्वंपिं लिसें मेमेगु विषयय् नं लिक्कसं लाःगु प्रहरी व मेमेगु सुरक्षा निकाययात न्हियान्हिथं नापलानाः व छुं थासय् अवान्छित अतिविधि जूसा तुरुन्त कारवाही प्रक्रिया न्ह्याकेत निर्देशन बियागु दु’ प्रजिअ कट्टेलं धयादीगु दु । अन्वेषणया निंतिं आवश्यक जुइगु सामान चुप्रा क्याम्पय् तयातःगु दु ।

न्हिछियंकं थीथी भूभागय् ज्या यानाः पुचः क्याम्पय् हे लिहां वइ । दुल्लुइ नं क्याम्प दयेकेगु धाःगु खःसां ज्या यायेगु थाय् लिक्कलिक्कसं यातायातया सुविधा दुगु कारणं आःयात चुप्राया हे क्याम्पपाखें ज्या न्ह्याकाच्वंगु दु । आवश्यक जुल धाःसा दुल्लुइ नं क्याम्प खडा यायेगु तयारी आयोजनाया दु ।

पेट्रोलियम अन्वेषणया ज्या संवेदनशील जूगुलिं खोज व अनुसन्धानया थीथी प्रक्रिया सुरक्षित रुपं यायेमाःगु जूगुलिं छु भूभागय् गुलि ल्याखय् दु वा मदु धयागु खँया यकिन जुइवं जक संचार माध्यमयात प्रगति बीगु व वयां न्ह्यः वा लिपा चिनियाँ टोलीं छुं प्रतिक्रिया मबिइगु खँ धयादिल । साइस्मिक सर्वे लिपाया रिपोर्टया आधारय् उपयुक्त स्थानया मालेज्या यानाः भण्डारणया बारे थप अनुसन्धान याइगु जूगु दु ।

सम्बन्धित बुखँ

LEAVE YOUR COMMENTS