हर्ष कृष्ण लुँध्वाखा सिरपाः लःल्हात
ख्वप (नेपालभाषा टाइम्स) – कुतः पिकाकःपाखें लःल्हाना वयाच्वंगु ‘हर्ष कृष्ण लुँध्वाखा सिरपाः’ वंगु शनिवाः छगू ज्याझ्वःया दथुइ खस नेपाली भाय्या च्वमि दिव्य गिरीयात लःल्हाःगु दु । लुँध्वाखा दँपती पिदंगु गिरीया ‘मुकुट’ नांया चिबाखंया निंतिं उगु सिरपाः लःल्हाःगु खः ।
मूपाहां नेपालभाषा एकेदेमिया भाइस चान्सलर डा. पुष्पराज राजकर्णिकारं न्यय्न्याद्वः तका दांया निक्वःगु हर्ष कृष्ण लुँध्वाखा सिरपाःया हनापौ बाखं च्वमि गिरीयात लःल्हानादीगु खः । दाता कृष्णलाल प्रधानं दां लःल्हानादीगु खःसा ज्याझ्वःया सभापति वरिष्ठ संस्कृतिविद् प्रा. डा. चुन्दा वज्राचार्यं स्वांमाः क्वखायेकादीगु खः ।
ज्याझ्वलय् नेपालभाषाया च्वमि दिव्या ताम्राकारयात स्वीन्याद्वः तका दांया ‘हर्षलाल कृष्ण लुँध्वाखा लिउ सिरपाः’ लःल्हाःगु खः । च्वमि ताम्राकारयात वय्कःया ‘लिच्वः’ नांया चिबाखंया निंतिं उगु सिरपाः लःल्हाःगु खः । थुकथं हे मेम्ह बाखं च्वमि मनदेवी ताम्राकारयात ‘मुखुतिया झसुकाः’ बाखंया निंतिं नीन्याद्वः तका दांलिसें हनापौ देछाःगु खः ।
ज्याझ्वलय् नवासें मूपाहां डा. राजकर्णिकारं बाखंया स्तर जक स्वयाः, छुं नं खँय् पक्षपात मयासे सिरपाःया घोषणा यानागु खँ कनादिल । वय्कलं बाखं विधायात च्वन्ह्याकेया निंतिं नीस्वनातःगु बाखं दबू, सः छगू अभिव्यक्ति थेंज्याःगु साहित्यिक संस्थाया कारणं बाखंया स्तर च्वन्ह्याना वनाच्वंगु खँ कनादिल ।
सिरपाःया दाता प्रधानं खस भासं नं अनुवाद यानाः ब्वनेगु व ब्वंकेगु ज्या जुल धाःसा थुकिं भाषाया अझ व्यापक प्रचार प्रसार जुइगु खँ कनादिल ।
वरिष्ठ साहित्यकार डा. योगेन्द्र प्रधानं ९० प्रतिशत स्वयां अप्वः नेवाःतय् योगदानं नीस्वनातःगु सिरपाः छम्ह खस् भासं च्वइम्ह च्वमिं प्राप्त यायेधुंकाः आः वय्कलं खस भाषाया पत्रपत्रिकाय् नेपालभाषायात दुुथ्याकाः सिरपाः नं त्याकेगु ह्वःताः नेवाः समुदाययात बीमाःगु खँय् बः बियादिल ।
समालोचक पूर्ण ताम्राकारं नं नुगः खँ प्वंकादीगु ज्याझ्वलय् सिरपाः त्याकादीपिं स्वम्हं च्वमिया बाखं नं ब्वनाः न्यंकूगु खः । ज्याझ्वलय् छगू लख तका दां देछानाः कुतः पिकाकःया संरक्षक जुयादीम्ह अमेरिकाय् च्वँच्वनादीम्ह मनोरञ्जन नारायण धौभडेलयात नं हनापौ देछासे हनेज्या याःगु खः ।
LEAVE YOUR COMMENTS