विराटया चिधं दबुलिइ स्नेह साय्मि
ख्वप (नेपालभाषा टाइम्स) – विराट नेपालभाषा साहित्य सम्मेलन गुथि (विराट गुथि) पाखें लय्पतिकं न्ह्याका वयाच्वंगु ‘विराट चिधं दबुलिइ’ थुगुसी साहित्यकार स्नेह साय्मिया याकः साहित्य वाचन ज्याझ्वः जुल । वंगु शुक्रवाः विराटया थःगु हे सभाकक्षय् उगु ज्याझ्वः जूगु खः ।
ज्याझ्वलय् साहित्यकार साय्मिं थीथी चिनाखँ व चिबाखं न्यंकादीगु खः । मूपाहांकथं झायादीम्ह गुथिया सल्लाहकारलिसें वरिष्ठ साहित्यकार डा. योगेन्द्र प्रधान वाचन जूगु साहित्ययात कयाः नुगःखँ तयादिसें जातीय विस्थापित यायेत स्वःपिं, देय् स्यंकीपिं अन्तर्राष्ट्रिय गिरोहया विरोध यायेमाः धयादिल । वय्कलं पारिवारिक सत्यता, थौंकन्हय् धर्म, मानवता स्वयां नं तःधंपिं तानाशाही प्रवृत्तियात च्वमिपिंसं जक अभिव्यक्ति व्यक्त याये फइगु खँ कनादिल ।
गुथिया नायः महेन्द्रगोपाल कर्माचार्यं ज्याझ्वलय् नुगः क्वसायेकाः झायादीम्ह भुइजःसि (बुढानीलकण्ठ) नगरपालिकाया उपप्रमुख अनिता लामायात जनस्तर व जनसहभागितां धस्वाःगु विराटया छेँ व विराटया गतिविधि बारे जानकारी याकादीगु खः ।
विराट गुथिं लय्पतिकं धइथें विराट चिधं दबुलिइ छम्ह छम्ह साहित्यकार, स्रष्टायात ब्वनाः थुकथंया ज्याझ्वःया ग्वसाः ग्वया वयाच्वंगु दु । गुथिया छ्याञ्जे प्रदीप शाक्यं न्ह्याकादीगु ज्याझ्वलय् न्वकु कृष्णभक्त बोडें लसकुस यानादीगु खः ।
LEAVE YOUR COMMENTS