मेस्सीया ह्याट्रिकं बार्सा शीर्षस्थान

लियोनल मेस्सीं ह्याट्रिक यायेवं सेल्टा भिगोयात ४–१ गोलं बुकाः बार्सिलोनां ला लिगाय् शीर्षस्थान कायम हे याःगु दु । मेस्सीं निगू गोल आकर्षक फ्रिकिकपाखें याःगु खःसा छगू पेनाल्टि पाखें याःगु खः । कासाया २३ औं मिनेटय् मेस्सीं पेनाल्टि पाखें न्हापांगु गोल यासें बार्सायात अग्रता बिउगु खःसां लुकास ओलाजां कासाया ४२ औं मिनेटय् फ्रिकिक गोल यासें कासा बराबरीइ हःगु खः ।

थ्वयां प्यंगू मिनेट लिपा हे हाफ टाइमया इन्जुरी इलय् मेस्सीं नं फ्रिकिक पाखें हे आकर्ष गोल यासें बार्सायात हाकनं अग्रता बिउगु खः । लिपांगु हाफ सुरु जूगु स्वंगू मिनेट लिपा हे मेस्सी हाकनं गोल यासें ह्याट्रिक पूवंकलसा थप छगू गोल कासाया ८५ औं मिनेटय् सर्जियो बुस्क्वेट्सं याःगु खः ।

थ्वयां न्ह्यव बार्साया परम्परागत प्रतिद्वन्द्वी रियल म्याड्रिडं नं इबरयात ४–० गालं बुकूगु खः । थ्व विजय छुं ईया निंतिं रियल ला लिगाया शीर्ष थासय् वःगु खःसां बार्सां नं विजय चूलाकेवं बार्सा हे हाकनं गोल अन्तरया ल्याखं शीर्षस्थानय् वःगु खः । बार्सा व रियल निगुलिंया १२–१२ गू कासा लिपा २५–२५ अंकं दु ।

बार्सा गोल अन्तरया ल्याखं जक न्ह्यःने दु ।रियलया निंतिं करिम बेन्जमां निगू, सर्जियो रामोसं छगू व फेडेरिको भाल्भेर्डें छगू गोल याःगु खः । बेन्जमां छगू व रोमासं छगू गोल पेनाल्टिपाखें याःगु खः ।

सम्बन्धित बुखँ

LEAVE YOUR COMMENTS