टि २० विश्वकप छनोट, कमजोर चीनयात १० विकेटं बुकल

येँ – टि–२० विश्वकप क्रिकेटया एशिया छनोट अन्तर्गत बुधवाः जूगु कासाय् नेपालं कमजोर चीनयात १० विकेटं बुकूगु दु । मलेसियाया बायोमास ओभल क्रिकेट मैदानय् टस बुनाः न्हापां ब्याटिङ याःवःगु चीन १३ ओभरय् मुक्कं २६ रन जक दयेका अलआउट जूगु खः । चीनं २१ रन दयेकूबलय् निगू विकेट जक वंगु खःसा मेगु न्यागू रनय् ८ विकेट वंगु खः ।

चीनया निंतिं ओपनर हङ जियान याङ सर्वाधिक ११ रन दयेकूगु खःसा न्हय्म्ह ब्याट्सम्यान शून्यय् आउट जूगु खः ।नेपाःया निंतिं सन्दीप लामिछाने, ललित राजवंशी व बसन्त रेग्मीं स्वंगू स्वंगू विकेट काःगु खः । छम्ह कासामि रन आउट जूगु खः । प्येलर अफ द म्याच सन्दीपं ४ ओभर बलिङ यानाः छगू मेडन तयाः ४ रन जक बिउगु खः ।

थ्व प्रतियोगिताय् सन्दीपं आःतक दकलय् अप्वः २० विकेट कायेधुंकूगु दु । प्यंगू ओभर हे बलिङ यानाः बसन्त रेग्मीं नं छगू मेडन तयाः न्यागू रन जक बिल । अथेह ललित राजवंशी स्वंगू ओभर बलिङं यानाः छगू मेडन तयाः १२ रन बिउगु खः । चीनं बिउगु २७ रनया सामान्य लक्ष्य नेपालं १.५ ओभरय् पूवंगु खः ।

ओपनर विनोद भण्डारीं २४ व प्रदीप ऐरीं ४ रन दयेकूगु खः । विनोद भण्डारीं स्वंगू चौका व छगू छक्का प्रहार याःगु खः ।नेपाल झ्वलाक्क न्यागू कासा त्याकाः १० ल्याः सहित शीर्ष थासय् दु । नेपालं न्हापांगु कासाय् म्यानमारयात व निगूगु कासाय् ग्वासाः देय् मलेसियायात समान ८ विकेटं बुकूगु खः ।

स्वंगूगु कासाय् नेपालं थाइल्याण्डयात डकवर्थ नियमय् १४० रन व भुटानयात प्यंगू कासाय् ११७ रनं बुकूगु खः । नेपालं अन्तिम कासा शुक्रवाः सिंगापुर नाप म्हिती ।नेपाः आः विश्वकप छनोटया मेगु चरणय् म्हितीगु पक्का जुइधुंकूगु दु । मेगु चरणय् जुइगु एसिया छनोटपाखें शीर्ष निगू टिम सन् २०२० य् अस्टे«लियाय् जुइगु विश्वकपय् म्हितेखनी ।

सन् २०१४ य् बंगलादेशय् जूगु टी–२० विश्वकपय् नेपाः छनोट जूगु खः । उगु विश्व कपय् नेपालं हङकङ व अफगानिस्तानयात बुकूगु खःसा बंगालादेशनाप पराजित जूगु खः । उबलय् नेपाः समूह उपविजेता जूसां विजेता जक मेगु चरणय् वनीगु जूगुलिं न्हापांगु चरणं हे लिहां वयेमाःगु खः ।

सम्बन्धित बुखँ

LEAVE YOUR COMMENTS