भाग्य मदुम्ह दक्षिण अफ्रिका
नकतिनि हे भारत र दक्षिण अफ्रिका दथुया कासा क्वचाल, इंग्ल्यान्ड व वेल्सय् जुयाच्वंगु विश्वकपय् । गन भारतया नितिं थ्व विश्वकपय् सुरुआत खः, अन हे दक्षिण अफ्रिकाया नितिं वया नितिं विश्वकप हे क्वचाल कि धयागु ग्याचिकु दु । विराट कोहलीया भारतं साउथह्याम्पटनय् जूगु कासा तसकं अःपुक हे खुगू विकेटं त्याकल ।
निक्वः च्याम्पियन जुइ धुंकूगु भारत थुगुसीया विश्वकपय् उपाधिया नितिं बल्लाःगु प्रत्यासी खः, वयाबारे ख“ ल्हायेगु लिपा हे जक जुइ ।
आः थथें दक्वसिया मिखा धाःसा दक्षिण अफ्रिकी टिमपाखे हे दु । भारतविरुद्धया कासा वं आःया विश्वकपय् म्हितूगु स्वंगूगु खः । अले थुपिं स्वंगुलिं कासाय् पराजय फःगु दु ।
दक्षिण अफ्रिका न्हापांगु कासाय् इंग्ल्यान्डनाप १०४ रनं बुत । अनलिं निगूगु कासा बंगलादेशनाप २१ रनं बुत । थुगुसीया विश्वकपय् मुक्कं झिगू टिमं ब्वति कयाच्वंगु दु, अले न्हापांगु चरण राउन्ड रोबिनया ल्याखं कासा जुइ । अथे धयागु छगू टिमं मेगु टिमनाप छक्वः म्हिती । थ्व ल्याखं छगू टिमं राउण्ड रोबिनय् गुंगू कासा म्हिती ।
आःया ल्याखं दक्षिण अफ्रिका थुपिं गुंगू कासामध्ये न्हापांगु स्वंगुलिइ बुइ धुंकल । अथे जूबलय् वया सेमिफाइनल थ्यनेगु सम्भावना लगभग क्वचाःगु दु । छुं नाटकीय प्रदर्शन मजुल धाःसा दक्षिण अफ्रिका आः सेमिफाइनल थ्यनी मखुत । अले थ्व बाखं जुइ– दक्षिण अफ्रिकाया विश्व क्रिकेटय् वियोगान्त यात्राया ।
थ्व टिमया समर्थन यायेगु धयागु खालि निराश जुइगु जक खः, छाय्धाःसा विश्वकप थेंज्याःगु तःधंगु अवसरय् टिमं गुबलें बांलाक म्हितीमखु । विश्वकप सुरु जुइ न्ह्यः टिमया मू बलर कगिसो रबाडां धाःगु खः, ‘दक्षिण अफ्रिकी क्रिकेटया यात्रा धयागु हे सेक्सपियरया बाखं थें खः, गुकिया प्रत्येक अन्त्य दुःखद हे जुइ, वियोगान्त हे जुइ ।
थुपिं बाखंयात आधार दयेका यक्व मेगु नाटक व सिनेमा तयार जुइधुंकूगु दु । थुपिं स्वये क्वचायेवं तसकं म्हाइपुसे च्वनी । दक्षिण अफ्रिकी क्रिकेटया समर्थकतय्त नं न्ह्याब्लें थथे हे जुइ । थुकिं हे दक्षिण अफ्रिकी टिमयात चोकर्स नं धायेगु याः । अथे धयागु कासाय् गुबलय् निर्णायक मोड वइ, उबलय् हे टिमं बांलाक म्हिते फइमखु ।
सन् १९९१ निसें दक्षिण अफ्रिकाया अन्तर्राष्ट्रिय क्रिकेटय् पुर्नआगमन जूगु खः । थ्ययां न्ह्यः ताः ई प्रतिबन्धय् हे लात । उबलेनिसें आःतक वं गुलि नं म्हितल मुक्कं छक्वयां छक्वः छगू उपाधि त्याकूगु दु, व खः– सन् १९९८ य् बंगलादेशय् जूगु मिनि विश्वकप । थुकियात आः वया च्याम्पियन्स ट्रफि धायेगु याः ।
थ्व छगू अपवाद त्वःताः दक्षिण अफ्रिकां गुबलें छुं त्याकाक्यंगु मदु । प्यद“ न्ह्यःया विश्वकपय् दक्षिण अफ्रिकां छुं याइगु विश्वास ब्वलंगु खः । थुकिया झ्वलय् टिम सेमिफाइनल तक नं थ्यन । तर उबले नं व न्युजिल्यान्डया ल्हातं पराजित जुल । उबले छगू कथं दक्षिण अफ्रिकाया निंतिं सेमिफाइनल थ्यनेगु हे तःधंगु हे उपलब्धी सावित जुल ।
छुं तःधंगु धेंधेंबल्लाः न्ह्यः सकसिनं दक्षिण अफ्रिकी टिमपाखें तःधंगु आश याइ । टिमया कासामित तसकं बांलाः । छम्ह थे छम्ह स्टार कासामि । थथे जुइवं आश याइगु स्वभाविक नं खः । तर अन्त्यय् थुपिं हे कासामितय् प्रदर्शन धाःसा फ्यासुसे च्वनी, गथे आः जुयाच्वंगु दु । दक्षिण अफ्रिकाया प्रदर्शन थथे छाय् कमजोर जुइ, थुकिया थ्याक्क पाय्छि लिसः सुयाकें मदु ।
क्रिकेटय् जक मखु, मेमेगु कासाय् नं दक्षिण अफ्रिका थेंज्याःगु तसकं अभाग्यशाली टिम दयाच्वनी । आःया टिम कप्तान पाफ डे फ्लेसिसं धाःगु नं पाय्छि हे खः– ‘छता निता ख“ कासामिया ल्हातय् दइमखु, भाग्यया ल्हातय् दइ ।’ झीसं आःयात थुलि हे जक भलसा काये कि दक्षिण अफ्रिकां आःया विश्वकपया ल्यं दनीगु कासा त्याकाः छुं चमत्कार याइ कि ?
LEAVE YOUR COMMENTS