न्हापांखुसी ए डिभिजन लिगया ट्रफी टुर

अखिल नेपाल फुटबल संघ (एन्फां) न्हापांखुसी सहिद स्मारक ‘ए’ डिभिजन लिग फुटबलया ‘ट्रफी टुर’ शुरु याःगु दु । सहिद स्मारक ‘ए’ डिभिजन लिग फुटबलया ट्रफी येँ, यल व ख्वप स्वनिगःया स्वंगुलिं जिल्लाया थीथी विद्यालयय् थ्यंकीगु जूगु दु ।

एन्फापाखें गठन यानातःगु लिग समितिया संयोजक विज्ञानराज शर्मायाकथं उगु ट्रफी टुर अन्तर्गत स्वनिगःया स्वंगुलिं जिल्लाया विद्यालयय् थ्यंकेगु झ्वलय् येँय् न्यागू, यल व ख्वपया छगू छगू विद्यालयय् ज्याझ्वः यासें ट्रफी प्रदर्शन यायेगु ग्वसाः दु । लिपांखुसी २०७१ सालय् सहिद स्मारक ‘ए’ डिभिजन लिग फुटबलया उपाधि थ्री स्टार क्लबं त्याकूगु खः ।

थनया त्रिपुरेश्वरय् च्वंगु दशरथ रंगशालां शुरु जूगु ‘ट्रफी टुर’ थीथी न्हय्गू थासय् यंकेगु ग्वसाः दु । न्हापांखुसी विद्यालय केन्द्रीत उगु ‘ट्रफी टुर’ या मुख्य उद्देश्य थ्व हे वइगु असोज १३ गतेनिसें न्ह्यायेत्यंगु सहिद स्मारक ‘ए’ डिभिजन लिग फुटबल कासाया वातावरण तयार यायेगु निंतिं जूगु संयोजक शर्मां कनादिल ।

‘प्यदँ लिपा वयाः ‘ए’ डिभिजन लिग शुरु जू वनाच्वंगु दु, प्यदँ न्ह्यःनिसें नेपाली फुटबल सुस्त जुयाच्वंगु खः, फुटबल कासाप्रति आकर्षण अप्वयेकेत ‘ट्रफी टुर’ या ग्वसाः ग्वयागु खः’ नेपाःया राष्ट्रिय टोलीया पुलांम्ह कासामि तकं जुयादीधुंकूम्ह संयोजक शर्मां कनादिल । ‘स्कोर अ गोल’ नां बियाः त्रिपुरेश्वरं शुरु जूगु उगु ज्याझ्वलय् अन्तर्राष्ट्रिय कासामि, प्रशिक्षक, कलाकार, विश्व निकेतन उमाविया विद्यार्थी एन्फाया पदाधिकारीपिनिगु नं सहभागिता दुगु खः ।

सहिद स्मारक लिग फुटबलया इतिहतस ८५ दँ पुलां । वि.सं. १९९० साल माघ २ गतेया तःभुखाय् लिपा ‘रामजानकी ट्रफी’या नामं शुरु जूगु उगु ट्रफी वि.सं. २००७ साल लिपा नेपाल पुलिसं लगातार स्वक्वःतक त्याकाः इतिहास दयेकातःगु दु । पुलिसं उगु ट्रफी त्याकूगु खःसां लिपा फुटबल संघयात हे बिउगु खः ।

वयां लिपा प्रजातन्त्र प्राप्तिया निंतिं जीवन बलिदान बिउपिं सकलें सहिदया लुमन्तिइ कासायात ‘सहिद स्मारक ए डिभिजन लिग ट्रफी’या नां बिउगु खः । उगु ट्रफी थौंकन्हय् लिग विजेतायात बीगु याना वयाच्वंगु दु । सहिद स्मारक ए डिजिभन लिगया स्थापना २०११ सालय् नरशम्शेर जबरां यानादीगु खः । उगु ट्रफी आतकया दुने झिंप्यंगू क्लबं त्याके धुंकूगु दु ।

ट्रफी त्याकूगु मध्ये छुं छुं क्लब धाःसा थौंकन्हय् अस्तित्वय् मदयेधुंकल । उगु उपाधि आतकया दुने मनाङ मस्र्याङ्दी क्लबं दकलय् अप्वः त्याकूगु दु । मनांगं २०४२, २०४४, २०४६, २०५७, २०६०, २०६२ व २०७० सालय् यानाः न्ह्य्क्वः त्याकेधुंकूगु दु । थुकथं हे रानीपोखरी कर्नर टीम (आरसीटीं) २०२८, २०२९, २०३०, २०३६, २०३८ व २०४१ य् यानाः खुक्वः त्याकूगु दुसा नेपाल पुलिस क्लबं २०१२, २०१३, २०६३, २०६६ व २०६८ लय् यानाः न्याक्वः त्याकेधुंकूगु दु ।

अथे हे थ्रीस्टार क्लबं २०५४, २०५५, २०६१, २०६९ व २०७१ य् यानाः न्याक्वः, महावीर क्लबं २०११, २०२३ व २०२६ य् यानाः स्वक्वः, संकटा क्लबं २०३७, २०४० व २०४२ य् स्वक्वः, अन्नपूर्ण क्लबं २०३४ व २०३९ य् निक्वः, देउराली क्लबं २०२५ व ०२७ य् निक्वः व त्रिभुवन आर्मी, विद्या व्यायाम, फ्रेन्डस क्लब, ब्वाइज युनियन, सुनाखरी एथ्लेटिक्स क्लबं छक्वः छक्वः थ्व उपाधि त्याकेधुंकूगु दु ।

सम्बन्धित बुखँ

LEAVE YOUR COMMENTS