स्पेन युरो कपया सेमिफाइनलय्

येँ – स्वीट्जरल्यान्डयात पेनाल्टि सुटआउटय् बुकाः स्पेन युरो कपया सेमिफाइनलय् दुहां वंगु दु । शुक्रवाः चान्हय् जूगु कासाय् स्पेनं पेनाल्टि सुटआउटय् स्वीट्जरल्यान्डयात ३–१ गोलं बुकूगु खः । पेनाल्टि सुटआउटय् पराजित जूसां स्वीट्जरल्यान्डया गोलकिपार याना सोमर धाःसा थ्व कासाय् हिरो जुल ।
फ्रान्स विरुद्धया प्रिक्वार्टरफाइनलय् जूगु पेनाल्टि सुटआउटय् नं केलिएन एमबाप्पेया पेनाल्टि पनाः स्वीट्जरल्यान्डयात क्वार्टरफाइनलय् हःम्ह सोमरं झिम्हय् सीमित जुइधुंकूगु स्वीस टिमयात स्पेनया तःगू प्रहार असफल यानाः पेनाल्टि सुटआउट तक हःगु खः । पेनाल्टिइ नं सोमरं छगू सेभ याःगु खःसां थःगु टिमयात सेमिफाइनल तक धाःसा यंकेमफुत ।
मिकेल ओरजाबलं थ्वाःगु अन्तिम पेनाल्टि सफल जुइवं स्पेनं विजय चूलाकूगु खः । थ्वयां न्ह्यः दकलय् न्हापां थ्वाःगु कप्तान सर्जियो बुस्केट पेनाल्टि बल पोलय् न्यानाः लिहां वःगु खः । रोद्रीं थ्वाःगु पेनाल्टि सोमरं सेभ याःगु खः । स्पेनया निंतिं ओरजाबलया लिसें गेराड मोरेना व डानी ओल्मोया पेनाल्टि सफल जूगु खः ।
मेखे स्वीटजरल्यान्ड पाखें याःगु प्रहारय् मारियो गाभ्रानिकया बल छगू जक पोष्टय् दुहां वंगु खः । फाबिन सेर व म्यानुअल मेकान्जियाया प्रहार स्पेनीस गोलकिपर उनाइ सिमोनं पनाबिउगु खःसा रुबेन भारगासया प्रहार पोल च्वं पिहां वंगु खः ।
थ्वयां न्ह्यः नियमित ९० मिनेटया कासाय् १–१ गोल जुइवं कासा एक्स्ट्रा इलय् वंगु खःसा एक्स्ट्रा इलय् धाःसा निगुलिं टिमं गोल यायेमफुत । कासाया च्यागूगु मिनेटय् जोर्डी अल्बां थ्वाःगु याःगु कडा प्रहार स्वीस डिफेन्डर जाकारियाया तुतिइ लानाः पोस्टय् दुहां वनेवं आत्मघाती गोलया ग्वाहालिं स्पेनं अग्रता काःगु खः । थ्व लिपा ६८ औं मिनेटय् शाकिरिं गोल यासें स्वीस टिमयात बराबरीइ हःगु खः । कासाया ७७ औं मिनेटय् स्वीस कासामि फ्रेउलरयात रेड कार्ड नकेवं नियमित ईया १३ मिनेटय् व थप ३० मिनेटय् स्वीट्जरल्यान्ड झिम्ह कासामिइ सीमित जूगु खः ।

सम्बन्धित बुखँ

LEAVE YOUR COMMENTS