ने. सं. ११४६ बछलाथ्व चौथी - बुंगद्यः सालिगु

होटलय् वैदेशिक लगानी अप्वल

येँ – नेपाल भ्रमण वर्ष २०२० अभियान सुरु हे जुइत्यःगु इलय् देशय् होटल क्षेत्रय् वैदेशिक लगानी न्ह्यथनबह कथं अप्वःगु खनेदुगु दु । चालु आर्थिक दँया न्हापांगु स्वला दुने ३९ गू पर्यटन उद्योग –होटल व रेष्टुराँ) पाखें न्यागू अर्ब ७७ करोड वैदेशिक लगानी दुहां वःगु खँ उद्योग विभागं धाःगु दु ।

विभागया कथं चालु आवया न्हापां स्वलाय् थ्वयां न्ह्यवया थ्व हे अवधिइ तुलनाय् शतप्रतिशत लगानी वृद्धि जूगु दु । विदेशी लगानीपाखे चालु आर्थिक दँया स्वलाय् ७७ गू उद्योगं स्वीकृति कायेधुंकूगु दु । थुकी दकलय् अप्वः ३९ गू पर्यटन उद्योगलिसे सम्बन्धित खः । थ्व परियोजनाया निंतिं ११ अर्ब ३६ करोडया प्रतिवद्धता नं वयेधुंकूगु खँ विभागं धाःगु दु ।

यदि थ्व लगानी दुहां वल धाःसा थुकी प्यद्वः २९२ ग रोजगारी सिर्जना जुइगु खँ धाःगु दु । थगुने थ्व हे अवधिइ प्यंगू अर्ब ८३ करोड ५२ लाख विदेशी लगानीया प्रतिबद्धता वःगु खः । विभागया निर्देशक व प्रवक्ता विनोद खडकां चालु आर्थिक दँया न्हापां स्वलाय् उत्साहजनक रुपं विदेशी लगानीया प्रतिबद्धता वःगु खँ धयादीगु दु ।

वंगु आर्थिक दँया थ्व हे अवधिया तुलना यायेबलय् शतप्रतिशत हे लगानी अप्वःगु खँ धाःगु दु । निर्देशक खड्काया कथं चालु आर्थिक दँया स्वला (साउन १ देखि असोज मसान्ततक) विभागयय् ८२ गू उद्योग दर्ता जूगु दु । थ्व मध्ये दकलय् अप्वः ३० गू पर्यटन उद्योग .होटल तथा रेष्टेराँ) व्यवसायीतय् लानाच्वंगु दु ।

उत्पादन पाखे २०, ऊर्जयापाखे १५, सेवामूलक १२ व कृषि, वन वैदावरय् आधारित स्वंगू उद्योग दर्ता जूगु दु । थ्व उद्योगपाखें आर्थिक प्रद्धिवद्धता जूकथं ४८ अर्ब ९१ करोड ३६ लाख लगानी जूवइ । थुकी न्याद्वः व ६१ हजार रोजागरी सिर्जन यायेगु लक्ष्य दु । विभागया तथ्यांक कथं वंगु आर्थिक दँय् २०७५÷७६ य् २३ अर्ब ६९ करोड विदेशी लगानी प्रतिबद्धता वःगु खः ।

उद्योग विभागया तथ्यांक कथं नेपालय् होटल व रेष्टुराँ क्षेत्रय् चिनियाँ लगानीकर्ताया आकर्षण अप्वयाच्वंगु दु । चालु आर्थिक दँया स्वला दुने विभागय् दर्ता जूगु ३९ गू होटल व रेष्टुराँ मध्ये ३६ गुलि चिनियाँतय् पाखें लगानी प्रतिबद्धता वःगु खः ।

आर्थिक रुपं थ्यंमथ्यं न्हय्गू अर्ब चिनियाँतय्सं लगानी याइ । अथेहे भारतं निगू व जापानया छगू लगानीकर्तां होटल व रेष्टुराँय् लगानी यायेगु प्रतिबद्धता प्वंकूगु दु । चिनियातय्सं स्वनिगलय् व पोखराय् होटल व रेष्टुराँ चायेकेगु इच्छा प्वंकूगु दु ।