
येँ – सरकारं तुरुन्त खर्च व राजस्वया अनुमानित विवरण बुझे यायेत इनाप याःसां स्थानीय निकायतय्सं धाःसा तुरुन्त बुझे यायेफइमखु धाःगु दु । स्थानीय निकायय् थज्याःगु विवरण तयार याइपिं कर्मचारी तकं हे मदुगु कारणं धयातःगु इलय् विवरण बुझे यायेमफइगु जूगु दु ।
अर्थ मन्त्रालयं वइगु आर्थिक दँया बजेट दयेकेगु निंतिं सोमवाः फुक्कं स्थानीय निकाय अनुमानित विवरण बुझे यायेत परिपत्र याःगु खः । परिपत्रय् छवाःया दुने विवरण बुझे यायेत धाःगु खः । तर स्थानीय निकायं विशेष गाउँपालिकाय् सम्बन्धी कर्मचारी तकं मदुगु खँ धाःगु दु । गुलिखे गाउँपालिकातय्सं कर्मचारीत मदुगुलिं मेमेगु निकायया कर्मचारीया ग्वाहालि कयाः विवरण तयार यानाच्वनागु खँ धाःगु दु । अथेहे कानुनी अस्पष्टताया कारणं नं निर्धारित इलय् विवरण बुझे यायेत थाकुइगु खँ धाःगु दु ।
अन्तर सरकारी वित्त व्यवस्थापन ऐन कथं प्रदेश व स्थानीय तहं वइगु आर्थिक दँया खर्च व राजस्व प्रक्षेपण यानातःगु विवरण हरेक दँया पुस मसान्तय् हे बुझे यायेमाः । अर्थ मन्त्रालयं आःयात स्थानीय निकायपाखें जक थज्याःगु विवरण माग याःगु खः । प्रदेशसभा गठन हे मजूनिगुलिं प्रदेश सरकार तकं मदुनिगुलिं आःयात स्थानीय तहपाखें जक अज्याःगु विवरण माग याःगु खः । तर स्थानीय तहं नं विवरण बीत थाकुइगु खँ धयाहःगु खः । भरतपुर महानगरपालिकाया प्रमुख प्रशासकीय अधिकृत प्रेमराज जोशीं धयादीगु दु, ‘कानुनय् दुगु निगू अर्थ लगे जुइगु व्यवस्थां जिमिगु फुक्क ज्यायात समस्याय् लाकाच्वंगु दु ।’
माग याःगु विवरणय् स्थानीय तहया अनुमानित खर्च, आन्तरिक स्रोतपाखें संकलन जुइगु राजस्व, राजस्व बाँडफाँटपाखें प्राप्त जुइगु रकम, अनुदान रकम व बजेट घाटापूर्ति यायेत आवश्यक रकम व उकिया स्रोत न्ह्यथनातःगु दु ।तर गुलिखे विवरणय् केन्द्रीय सरकार व प्रादेशिक सरकारं दयेकीगु कानुनया आधारय् स्थानीय तहं कानुन दयेकेधुंकाः जक प्रक्षेपण यायेफइगु खँ यल महानगरपालिकाया कार्यकारि अधिकृत हरिप्रसाद दाहालं धयादीगु दु ।
वय्कलं धयादीगु दु, ‘संघीय सरकारया कानुन व प्रादेशिक सरकारया कानुनलिसे दुविधा मजुइ कथं कानुन दयेकेमाः ज्या यायेत धयातःगु दु । थ्वलिसे अस्पष्ट जुइगु कानुन नं दयेकेमजिल । थीथी समस्याया कारणं थ्व ज्या धाःकथं न्ह्याः वनेफयाच्वंगु मदु ।’मेखे संचारमाध्यमपाखें जक अर्थमन्त्रालयं अज्याःगु विवरण माग याःगु धयागु जानकारी कायेखंम्ह नुवाकोटया किसपाङग गाउँपालिकाया प्रमुख छत्र लामां थःगु ज्याकुया निंतिं नियुक्त कर्मचारीत सदरमुकाम त्वःता वयेत माने मजूगुलिं समस्या जुयाच्वंगु खँ कनादिल ।
वय्कलं धयादीगु दु, ‘लेखापाल गां वनेत माने मजू, वय्कलं सदरमुकामय् हे च्वनाः ज्या यानादी । न्हापा थें जिल्ला विकास समिति वा मेमेगु राष्ट्रिय अन्तर्राष्ट्रिय गैरसरकारी संस्थालिसे समन्वय यानाः माग याःकथं खर्च व राजश्व विवरण दयेकाः छ्वयाबीगु जुइ ।’स्थानीय तहं थौंकन्हय् उठे यानाच्वंगु राजश्व तकं स्पष्ट कानुनया अभावया कारणं खर्च यायेमफयाच्वंगु खँ जनप्रतिनिधितय्सं धयाच्वंगु दु ।
LEAVE YOUR COMMENTS