तातोपानी नाकां तस्करी अप्वल
येँ – चीन व नेपाः दथुइ तःधंगु व्यापारिक नाका तातोपानीइ तस्करत सक्रिय जुयावःगु दु । प्यदँ लिपा चायेकूगु नाकाया सीमाक्षेत्रया लँपु जुयाः तस्करत सक्रिय जुयावःगु खनेदुगु दु । भुखाय् लिपा बन्द जूगु इलय् चिनियाँ पक्षं नाकाया सुरक्षा संयन्त्र बल्लाः मजूगु कारणं हे नाका चायेकेत आलताल याना वयाच्वंगु खः ।
आः नाका चाःगु निला मदुनिवं हे नाकापाखें अवैध सामान ओसारपसारया कुतः जूगु दु । छुं न्हि दुने जक नेपाःया लँपु जुयाः तातोपानी नाकां चीन यंकेत्यंगु ८३ किलो रक्तचन्दन लिसें निम्हेसिनं प्रहरीं ज्वंगु दु । रक्तचन्दन व निम्ह भरियायात येँया बौद्धं्र प्रहरीं ज्वंगु खः । छुं वाः न्ह्यव नं तातोपानीन ाका जुयाः येँ दुत हयेत्यंगु अवैध खाद्य सामग्री बरामद याःगु खः ।
लोड यानाः लिहां वयेगु झ्वलय् मितेरी तां अवैध अय्लाः लिसें खाद्य सामग्री ज्वनावःगु बोलेरो गाडी ज्वंगु खः। बोलेरो व चालक आः १ लाख ८६५ तका धरौति तयाः रिहा जूगु दु । तर अवैध सामान ज्वंसां उकिया बारे छुं सुचं तकं मवःगु खः । ज्वंम्ह चालक रिहा जुइधुंकाः जक थ्व खँ पिहां वःगु खः ।
सुरक्षा बल्लाका तयागुलिं आःतक छुं अवैध गतिविधि मजूगु जिल्ला प्रहरी कार्यालय सिन्धुपाल्चोकया प्रहरी नायब उपरीक्षक माधव काफ्लें दावी यानादीगु दु । ‘खासां लोड जुयावःगु फुक्कं सामान बन्दरगाहय् जाँच जुइ । थनं उखे दुहां वने हे थाकु’ डिएसपी काफ्लें धयादीगु दु, ‘उकिं आः छुं नं अवैध सामग्ी ओसारपसार जुइफइ मखु ।’
सिन्धुपाल्चोकया तातोपानी नाका भुखाय् न्ह्यव हे अवैध व्यापारया निंतिं चर्चित थाय् खः । लुँ, रक्त चन्दन थेंज्याःगु मेमेगु बहुमुल्य सामग्री ओसारपासर जुइगु मू थाय् हे जुयाच्वंगु खः । सिन्धुपाल्चोकया तातोपानी नाकां नेपाः दुहां वइगु लुँ, रक्तचन्दन अरनिको राजमार्ग जुयाः येँय् हयेत्यंगु इलय् तःक्वं हे प्रहरीं ज्वंगु नं दु ।
छुं दँ न्ह्यव रक्तचन्दनया अवैध ओसारपसार जूबलय् प्रहरीं काभे्रपलाञ्चोकया पाँचखाल, दोलालघाट, उग्रचण्डी नाला, धुलिखेल लगायतया क्षेत्रं थीथी मनूयात ज्वंगु खः । मेखे सिन्धुपाल्चोकया थीथी थासय् नं रक्तचन्दन बरामद जुइगु लिसें तस्करत नं ज्वंगु खः । तातोपानी नाका बन्द जुइवं तस्करतय्सं नं व्यापारिक केन्द्र हिउगु खः ।
तातोपानी नाका बन्द जुइवं अवैध लुँ रसुवाया केरुङ नाकापाखें नं ज्वंगु दु । तस्करतय्सं थीथी थासं यक्व संयन्त्र छ्यलाः तस्करी याना वयाच्वंगु दु । तातोपानी नाकां न्हापा थें अवैध व्यापार जुइगु नियन्त्रण यायेत चिनियाँ पक्षं नेपाली टोलीलिसे वार्ताय् तःक्वः हे धया वयाच्वंगु दु । नेपाली सरकारी टोलीं सुरक्षा प्रत्याभूत यायेधुंकाः जक चिनियाँ टोली नाका चायेकेत तयार जूगु खः ।
गृहमन्त्री रामबहादुर थापां नाका संचालनया छवाः न्ह्यव नाकाया सुरक्षा अवस्था चुस्त यानातयेत निर्देशन बियादीगु खः । अलपत्र तातोपानी नाकापाखें बरामद सवारी साधन व रक्तचन्दन आः नं अलपत्र अवस्थाय् थन्के यानातःगु दु । बरामद जूगु रक्तचन्दन आः ध्वग्गिना वनीगु अवस्था दुसा सवारी साधन नं कवाडी जुइधुंकूगु दु ।
अवैध रुपं दुत हःगु ४० हजार किलो स्वयां अप्वः रक्तचन्दन आः ध्वग्गिना वनीगु अवस्था दु । थुपिं रक्तचन्दन चीनया खासाय् यंकेगु अवस्थाय् प्रहरीं ज्वंगु खः । ज्वंगु सामान बारे कानुन मदुगुलिं छु यायेगु धकाः अन्योल जुयाः अथें अलपत्रय् लाःगु खः । जिल्ला प्रशासन कार्यालय परिसरय् वि.सं. २०६२ निसें बरामद यानातःगु रक्तचन्दन व कवाडी जुइधुंकूगु सवारी साधन थानाच्वंगु दु ।
सीमा क्षेत्रया बासिन्दाया आयआर्जनय् तिबः बीगु नाका सञ्चालनय् वयेधुंकाः तातोपानी नाकाया व्यापार वृद्धि जूगु दु । वंगु जेठ १५ गते निसें औपचारिक रुपं सञ्चालनय् वःगु नाकाय् आः नं विस्तारं व्यापार तच्वया वयाच्वंगु दु । भोटेकोशी गाउँपालिका अध्यक्ष राजकुमार पौडेलं व्यापार वृद्धि जूगुलिं राजश्व संकलन नं अप्वया वनाच्वंगु खँ धयादीगु दु ।
LEAVE YOUR COMMENTS