ने. सं. ११४४ कौलाथ्व तृतीया -

लुँ तोलां १ लाख ५ हजार ५००

येँ – नेपाःया लुँवहः बजारय् म्हिगः लुँया भावं आः तकया हे दकलय् थिके जूगु न्हूगु कीर्तिमान कायम याःगु दु । म्हिगः छापावाल लुँया भाः प्रति तोला १ लाख ५ हजार ५०० तका थ्यंगु खः । थ्व आः तकया हे दकलय् थिके जूगु भाः खः ।

लुँवहः व्यवसायीतय् कथं थ्व स्वयां न्ह्यः वि.सं. २०७७ सालया साउन २३ गते लुँया भावं कीर्तिमान कायम यानातःगु खः । वकुन्हु लुँया भाः तोलां १ लाख ३ हजार ५०० तका थ्यंगु खः । म्हिगःया भावं थ्व पुलांगु कीर्तिमानयात नं त्वाःथलाः न्हूगु कीर्तिमान कायम याःगु दु । अबलय् छन्हु जक लुँयागु भाः उच्च जूगु खः ।

लुँबहः बजाःया विश्लेषक लिसें सुनचाँदी व्यवसायी संघया पुलांम्ह नायः तेजरत्न शाक्यया कथं अन्तर्राष्ट्रिय बजारय् जुयाच्वंगु अस्थिरता स्वयेगु खःसा थ्व भाः अझ हे थहां वनीगु खः लाकि धइगु आशंका जुयाच्वंगु दु । वय्कःया कथं अन्तर्राष्ट्रिय बजारय् लुँयागु भाः घन्टा घन्टाय् हे थहां कुहां जुयाच्वंगु दु । लुँ प्रति औंश २ हजार डलर थ्यन धाःसा बजाःया दबाबं यानाः हे थ्व भाः कुहां वइ धकाः अनुमान यानातःगु खः । तर म्हिगः प्रति औंश २ हजार ८० डलर थ्यनं नं भाः कुहां मवः ।

अन्तर्राष्ट्रिय बजारय् लुँयागु भाः थहां वनाच्वंगुया मू कारण धाःसा थौंकन्हय् जुयाच्वंगु रुस–युक्रेन युद्ध हे खः । थ्व युद्धं यानाः रुसं चिकं उत्पादन घटे याना बिउगु दु, गुकिं यानाः बजारय् पेट्रोलया भाः थहां वन । पेट्रोलया भाः थहां वनेवं फुक्क हे बजाः भाः नं थहां वना बिल । विश्व बजाः डाँवाडोल जुइवं मनूतय्सं थःगु सम्पत्ति सुरक्षित याना तयेत लुँइ लगानी यायेगु शुरु जुल । थुकथं लुँयागु माग अप्वया वनेवं बजारय् उकिया भाः नं थहां वनेगु शुरु जुल । यदि आः खाडी क्षेत्रया मुलुकतय्सं चिकंया उत्पादन बढे यात धाःसा जक थुकी छुं भचा नियन्त्रण जुइ फइगु खँ धाःगु दु ।

मेखे कोरोना महामारीया कारणं यानाः विश्वन्यंकं लुँया उत्पादन नं म्हो जुयाच्वंगु दु । न्हापा विश्वन्यंकं वार्षिक ४५०० टन लुँ उत्पादन जुइगुली थौंकन्हय् ३५०० तक जक उत्पादन जुयाच्वंगु दु । उकिं बजारय् माक्व लुँ नं न्याये दयाच्वंगु मदु ।