ने. सं. ११४६ अनलाथ्व चतुर्दशी -

येँ महानगरपालिकां स्थानीय बजाः व्यवस्थापन मापदण्ड दयेकीगु

येँ – येँ महानगरपालिकां स्थानीय बजाः व्यवस्थापन यायेगु निंति मापदण्ड दयेकीगु जूगु दु । आर्थिक दँ २०७६-७७ या निंतिं महानगरपालिकाया नीति तथा कार्यक्रमय् हे थुगु खँ दुथ्याकातःगु दु ।

महानगरया नीति तथा कार्यक्रम व बजेट बारे जानकारी बीगु निंतिं आइतवाः जूगु पत्रकार सम्मेलनय् महानगरपालिकाया प्रवक्ता ईश्वरमान डंगोलं वासः व खाद्य वस्तु थेंज्याःगु आधारभूत उपभोग्य वस्तु व सेवाया आपूर्ति व गुणस्तर कायम यायेत स्थानीय बजार मापदण्ड दयेकेगु खँ धयादीगु खः ।

अथेहे विषादी छ्यलामतःगु तरकारी व सिसाबुसा जक आपूर्ति व विक्री वितरण जुइकथं नियमित गुणस्तर परीक्षण यायेगु व थुकिया निंतिं आधुनिक उपकरण सहितया मोबाइल भ्यान संचालन यायेगु खँ नं वय्कलं धयादीगु खः । महानगरवासीतय् जीवनपद्धतिइ अर्थपूर्ण हिउपाः वइकथंया परियोजनायात विशेष महत्वया आयोजना कथं नाला कयाः थज्याःगु आयोजनात स्वदँया दुने आधारभूत रुपं क्वचायेकेगु खँ नं व्कलं धयादिल ।

विषादी छ्यलामतःगु तरकारी व सिसाबुसा जक आपूर्ति व विक्री वितरण जुइकथं नियमित गुणस्तर परीक्षण यायेगु निंतिं मोबाइल भ्यान संचालन याइगु

महानगरं महानगर क्षेत्र जुयाः न्ह्याःवनीगु खुसिया सुदृढीकरण यायेगु, भर्टिकल स्मार्ट पार्किङ्ग, पर्यटन पदमार्ग, फोहरमैलाया दिगो व्यवस्थापन, कोटेश्वर तीनकुनेय् बुद्ध पार्क दयेकेगु, मेगा हल, सहरी यातायात व्यवस्थापन, मोनारेल संचालन, बालाजुया बाइसधारा उद्यानया स्तनोत्तरीयात विशेष महत्वया आयोजना कथं न्ह्याकेगु खँ पत्रकार सम्मेलनय् जानकारी बिउगु खः ।

अथेहे येँ महानगरयात जीवन्त शहर कथं विकास यायेगु निंतिं महानगर दुने संचालन जुयाच्वंगु होटल, रेष्टुराँ, सपिङ्ग मलतय्त चान्हय् नाइट मार्केट कथं नं संचालन यायेत प्रोत्साहित यायेगु खँ नं महानगरया नीति व कार्यक्रमय् दु । थुकिया निंतिं स्थानीय समुदाय, निजी ख्यः, प्रहरी, यातायात व्यवसायीलिसे सहकार्य यानाः आवश्यक नीतिगत व पूर्वाधार व्यवस्था यायेगु खँ धाःगु दु ।

ल्याय्म्हतय्त स्वदेशय् हे उद्यम यायेगु निंतिं प्रोत्साहित यायेत महानगरस्तरीय एकीकृत सीप विकास प्रतिष्ठान नं संचालनय् हइगु जूगु दु । प्रतिष्ठान पाखें स्वदेशी वस्तु उत्पादन, प्रवद्र्धन व बजारीकरणया निंतिं प्रोत्साहित यायेगु, शीपमूलक तालिम संचालन यायेगु ज्या याइ ।
सहकारी माध्यमं साना तथा घरेलु उद्याग संचालन यायेत प्राविधिक व आर्थिक ग्वाहालि नं महानगरपालिकां बीगु नीति दु ।

महानगरपालिकां हनुमानध्वाखा लाय्कू, स्वयम्भू, बौद्ध व पशुपति क्षेत्रयात पर्यटकीय हब कथं विकास यायगु खँ नं धाःगु दु । येँया मौलिक कला, संस्कृति व परम्परा संरक्षण, सम्वद्र्धन यायेत ज्या यायेगु व मौलिक बस्तीया सम्पदा भवनतय् संरक्षण व निर्माणया निंतिं मापदण्डया आधारय् अनुदान व छुट बीगु नीति नं महानगरपालिकां ज्वंगु दु ।

महानगरपालिकां महानगर दुने सम्भावना दुगु थासय् साइकल लेन नं दयेकीगु जूगु दु । थुकिया लिसें निश्चित थासय् सवारी निषेध क्षेत्र नं दयेकीगु जूगु दु । अथेहे सार्वजनिक यातायातय् ज्येष्ठ नागरिक, मिसा, मस्त व अपांगता दुपिं मनूतय् पहुँच अप्वयेकेत काठमाडौं महानगरपालिका सवारी तथा यातायात व्यवस्थापन ऐन २०७५ नं कार्यान्वयनय् हइगु जूगु दु ।