संविधान संशोधनया खँय्

अमेरिकी राष्ट्रपति डोनाल्ड ट्रम्प थौंकन्हय् तःधंगु संकटय् दु । थःगु ‘बोल्ड’ निर्णय व छुच्चा पहलं न्ह्याम्हेसितं संकटय् लाका वयाच्वंम्ह ट्रम्प आः थः हे तःधंगु संकटय् लानाच्वंगु दु । वयात आः संकटय् वःगु नं वयागु थःगु हे पहः व न्ह्यागुं धयागु जुइगु बानिं हे खः । वयात थौंकन्हय् वयाच्वंगु तःधंगु संकट धयागु वयागु विरुद्ध वयेत्यंगु महाभियोगया प्रस्ताव खः ।

अमेरिकी संसदया क्वय्या सदन ‘हाउस अफ कमन्स’य् राष्ट्रपति ट्रम्प विरुद्ध महाभियोगया प्रस्ताव तयेगु निंतिं आवश्यक छानविन शुरु जुइ धुंकूगु दु । ट्रम्पयात संकट लाकूम्ह मू व्यक्ति क्वय्या सदनया सभामुख नेन्सी पेलोसी जूगु दु । पेलोसीं हे ट्रम्पविरुद्ध छानविनया निंतिं दकलय् न्हापां स्वीकृति बिउगु खः ।

छाय् महाभियोग
ट्रम्पविरुद्ध महाभियोगया प्रस्ताव तयेगु खँ वया व युक्रेनया राष्ट्रपति दथुइ जूगु छगू टेलिफोन वार्ताया कारणं वःगु खः । उगु टेलिफोन वार्ताय् ट्रम्पं थः राजनीतिक प्रतिद्वन्द्वीयात सिधयेकेगु निंतिं विदेशी सरकारयात दबाब बिउगु द्वपं लाःगु दु । टेलिफोन वार्ताय् ट्रम्पं युक्रेनी राष्ट्रपति भ्लादिमिर जेलेन्स्कीयात डेमोक्र्याट नेता जो बाइडेनया काय्विरुद्ध छानविन यायेत दबाब बिउगु खः ।

जो बाइडेन मेगु चुनावय् राष्ट्रपति पदय् ट्रम्पयात टक्कर बीम्ह नेता कथं कयातःम्ह खः । ट्रम्पं युक्रेनया छगू ग्यास कम्पनीया निर्देशक जुयाच्वंम्ह बाइडेनया काय हन्टर बाइडेनविरुद्ध जाँच यायेत जेलेन्स्कीयात दबाब बिउगु खः । दबाब बिइगु झ्वलय् राष्ट्रपति ट्रम्पं हन्टरविरुद्ध छानविन मजुल धाःसा युक्रेनयात बिया वयाच्वंगु सैन्य ग्वाहालि बन्द यानाबीगु खँ धाःगु खः ।

राष्ट्रपति ट्रम्पं धाःसा थ्व द्वपंयात अस्वीकार यानाच्वंगु दु । थःम्हं राष्ट्रपति पदया प्रतिद्वन्द्वी जुयाच्वंम्ह बाइडेनया छवि स्यंकेगु निंतिं थज्याःगु दबाब मबियागु खँ धयाच्वंगु दु । निम्ह राष्ट्रपति दथुइया थ्व टेलिफोन वार्ताया खँ छम्ह ‘ह्वीट्सल ब्लोअर’ पाखें पिहां वःगु खः । छम्ह म्हमसिउम्ह मनुखं ट्रम्पं अमेरिकी संविधान विपरीत ज्या याःगु धासें सुचं बिइवं थ्व मामिला सार्वजनिक जूगु खः ।

छानविन लिपा पिहांवः कथं टेलिफोन वार्ताय् ट्रम्पं युक्रेनी राष्ट्रपतियात बाइडेनया थः कायविरुद्ध जाँच दिकाबिउगु दु, तर यक्व मनूत जाँच चाहे जुयाच्वंगु दु, उकिं छिं छु यायेफु, व बांलाःगु जुइ धाःगु खः । थ्व टेलिफोन वार्ताय् ट्रम्पं जेलेन्स्कीयात अमेरिकाया महान्यायाधिवक्ता, थः निजी वकिल रुडोल्फ गियलियानीलिसे स्वापू तयेत नं धाःगु खः ।

आः छु जुइ ?राष्ट्रपति ट्रम्प विरुद्ध महाभियोग हे लाःसां थ्व पारित जुइगु सम्भावना धाःसा म्हो जक दु । ट्रम्पं महाभियोगया कारणं पद त्वःतेमाली सम्भावना उलि खनेमदु । आः महाभियोगया प्रक्रिया न्ह्याः वन धाःसा दकलय् न्हापां थ्व अभियोगय् हाउस अफ रिप्रिजेन्टिभय् मतदान जुइ । थन डेमोक्रेटिकतय् बहुमत दु ।

उकिं क्वय्या सदन धाइगु हाउस अफ रिप्रिजेन्टिभय् याउँक थ्व महाभियोग पारित जुइगु जुइ । डेमोक्रेटिकया दक्व धयाथें सांसदत महाभियोगया पक्षय् दु । हाउस अफ रिप्रिजेन्टिभं पास जुल धायेवं थ्व महाभियोगया प्रस्ताव च्वय्या सदन सिनेटय् वनी । सिनेटय् धाःसा विपक्षी डेमोक्रेटिकतय् बहुमत मदु ।

उकिसनं महाभियोग पारित यायेत सामान्य बहुमत जक दयां मगाः दुई तिहाई बहुमत माः । सिनेटय् ट्रम्पया पार्टी रिपब्लिकनतय् बहुमत दु । अथे जूबलय् सिनेटय् थ्व पास जुइगु खःसा रिपब्लिकन सांसादतय्सं हे विद्रोह यायेमाःगु खनेदु । रिपब्लिकन सांसदत हे ट्रम्पया विपक्षय् वनेमाःगु खनेदु ।

रिपब्लिकनया गुलिखे सांसदत ट्रम्प खनाः तम्वयाच्वंगु दुसां महाभियोगया खँय् धाःसा वयात बचे याइगु हे खनेदु । आःतक डेमोक्र्याटसत लिसे जानाः रिपब्लिकन सांसदतय्सं ट्रम्पयात चिइकीगु सम्भावना छुं खनेमदुनि । रिपब्लिकन सांसदत सुनां नं आःतक थः महाभियोगया पक्षय् दुगु खँ धाःगु मदु ।

अथे ला अमेरिकी इतिहासय् नं आःतक सुं नं राष्ट्रपतिं महाभियोगया कारणं राष्ट्रपति पद हे त्वःतेमाःगु नं मदुनि । अमेरिकी इतिहासय् मुक्कं निम्हेसित महाभियोग लाःगु दु । छम्ह सन् १९९७ य् बिल क्लिन्टन खःसा छम्ह सन् १८६८ य् एन्ड्य्रु जोन्सन खः । तर थुपिं निम्हं महाभियोग पाखें बचे जूपिं खः ।

सम्बन्धित बुखँ

LEAVE YOUR COMMENTS