ने. सं. ११४६ दिल्लागा चर्हे - गथांमुगः चःह्रे

प्रधानमन्त्रीपाखें राजदूत नापलायेगु सुरु

येँ (नेपालभाषा टाइम्स) – प्रधानमन्त्री नियुक्त जुइधुंकाः विदेशी राजदूततय्त याकः याकः नापलायेत अस्वीकार याना वयाच्वंम्ह प्रधानमन्त्री बालेन शाहं अन्ततः थीथी देय्या राजदूततय्त याकः याकः नापलायेगु ज्या न्ह्याकूगु दु ।

प्रधानमन्त्री शाहं प्रोटोकलयात क्यनाः विदेशी राजदूत जक मखु विदेशं नेपाः भ्रमणय् वइपिं विशिष्ट अतिथितय्त तकं नापलायेत अस्वीकार याना वयाच्वंगु खः ।

प्रधानमन्त्रीया विदेशी राजदूत लिसें विशेष अतिथितय्त नापलायेत अस्वीकार यानाच्वंगु खँयात कयाः यक्व आलोचना जुइवं वय्कलं म्हिगः निसें राजदूततय्त याकःयाकः नापलानादीगु दु । थ्व झ्वलय् वय्कलं म्हिगः दकलय् न्हापां नेपाःया निंतिं भारतीय राजदूत नविन श्रीवास्तवयात नापलादीगु दुसा व लिपा चिनियाँ राजदूत झाङ माओमिङयात नापलानादीगु दु ।

प्रधानमन्त्री शाहयात नापलायेधुंकाः भारतीय राजदूत श्रीवास्तवं नेपाः व भारत दथुइया सुदृढ व बहुआयामिक साझेदारीयात थप धिसिलाकेगु सम्बन्धय् खँल्हाबल्हा जूगु खँ धयादीगु दु । वय्कलं प्रधानमन्त्री शाहलिसे अर्थपूर्ण व रचनात्मक विचार कालबिल जूगु खँ नं धयादीगु दु ।

सञ्चारकर्मीत लिसे खँ ल्हायेगु झ्वलय् राजदूत श्रीवास्तवं धयादिल, ‘थौं सुथय् नेपाःया हनेबहःम्ह प्रधानमन्त्रीजुयात नापलाये दुगुलिं सम्मानित महसुस जुल । प्रधानमन्त्री नरेन्द्र मोदीजुया पाखे भिंतुना देछाया । भारत-नेपाः दथुइया सुदृढ व बहुआयामिक साझेदारीयात थप धिसिलाकेगु बारे वय्कः लिसे अर्थपूर्ण व रचनात्मक विचार कालबिल जूगु दु ।’

नापलायेगु झ्वलय् नेपाः-भारत दथुइया निगू पक्षीय मित्रता, पारस्परिक हित, विकास साझेदारी लिसें सहकार्यया थथिी विषयय् सहलह जूगु खँ प्रधानमन्त्री कार्यालयं धाःगु दु ।

प्रधानमन्त्री शाहं भारतलिसेया ऐतिहासिक सम्बन्धयात अझ प्रगाढ दयेकेगु लिसें मंकाः हितया क्षेत्रय् जानाः ज्या यायेमाःगु खँय् बः बिउगु प्रधानमन्त्री कार्यालयं धाःगु दु ।

उकथं हे चिनियाँ राजदूत माओमिङ लिसे खँल्हाबल्हाया झ्वलय् प्रधानमन्त्री शाहं चीन व नेपाःया दथुइया सम्बन्धयात अझ प्रगाढ यायेमाःगु खँ धयादीगु दु । नेपाः व चीन दथुया सम्बन्धयात थप सुदृढ यायेगु, थीथी क्षेत्रय् ग्वाहालि प्रवद्र्धनया लिसें विकास साझेदारीयात अभिवृद्धि यायेगु बारे खँल्हाबल्हा जूगु खँ प्रधानमन्त्री सचिवालयं धाःगु दु । राजदूत माओमिङ प्रधानमन्त्रीयात भिन्तुना देछायादीगु खँ नं धाःगु दु ।