प्रगतिशील बेसरोकार !

हितिया ध्यबा पुलेत्यल । हाकनं । जरिवाना पुले माली । मय्जुं च्वयेका च्वनी । आसे । तांन्वः । ध्यबा पुलेगु थाय् नं न्हापाया थाय् मखये धुंकल । हुंकन थ्यंक वनेमानी । घन्टौं लाइनय् च्वं । दँदँ दयेधुंकल । हितिं लः छफुति वःगु मखु । ध्यबा पुले त्यल कि धाःसा पीर का । जरिवाना लगे जुइ ।

अझ । हितिया लाइन हे ध्यना बी ला ! हितिया ध्यबा पूवनेगु जांगर हे दइमखुृ । अझ लुमंलुमं तं वयाच्वनी । मय्जुं धाःसा दबाव बियाच्वनी । ‘झासँ इलय् हे ध्यबा पुलादिसँ । हितिं लः मवःसां …. ! हितिया लाइन छगू सां थामय् यानातयेमाः । हाकनं लाइन हे ध्यना बिलकि मेलम्चीया लः वइबलय् छु यायेगु ? लः वइगु आशं सां लाइनयात म्वाका तयेमाः ।

ध्यबा मपुलां छु याये ? झी जनता सदां तःलय् । सरकार धइम्ह शक्तिशाली जुइ । न्ह्याबलें द्यःने लाइ । लः मवः । ध्यबा छाय् पुले ? झीके तागत हे मदु थथे धायेत ! उकिं हालाच्वनां छु याये ? झासँ पुलेमाःगु पुलादिसँ । छि ला ज्येष्ठ नागरिक जुइधुंकल ! ध्यबा पुलेथाय् लाइनय् नं च्वनेमाली मखु । विशेष सुविध दइ ।’ मय्जुं सुविधाया आकर्षण क्यनी ।

ह्ययेकी । मत्ती लुइ । गज्याःगु विडम्बना !दँदँ दत हितिं लः मवःगु । वइ मखु । गबले वइ । बेठेगान । थःगु जीवनकालय् वइगु ला सम्भावना हे मदु । अय्नं ध्यबा पुलेगु चिन्ता । पीर । मानसिक तनाव । लः फुति मवःगु हितिया गज्याःगु फुर्ति । शक्ति ! दबाव ! गुलि बलवान थ्व ! झी जनता । गुलि निरीह । गुलि कमजोर ।

विवश । थौं लः मवःगु हितिया न्ह्यःने जनतां छ्यं क्वछुकेमाः । वयात इलय् हे ध्यबा छाये मखनी । ग्याना च्वनेमाः । थःपिंला गंगु कथु म्वाये माल । हितिया ध्यबा इलय् मफुल कि ! लाइन चफुना बी ! ध्यना बी । अले छय् छुइपिंसं नं मेलम्चीया लः त्वने खनीमखु । इमिसं नं कथु गंकाः म्वायेमाली ।

छय् छुइपिनि दुःख लुमनी । पीर जुइ । लः मवःसां हितिया लाइन छगू ला म्वाका हे तयेमाः । थःपिंसं ला दुःख सिल, सिल । वइपिं सन्ततिं कुन्हु थज्याःगु भोग याये म्वाःलेमा । आशा याये । लः मवःगु हितिया नं ध्यबा पुले । पुलाच्वने ।बुखँ ब्वने । आः नेपालं हिमालया लः निर्यात यायेत्यंगु दु । हिमाली लःया उद्योग न्ह्याकेत्यंगु दु ।

देय्या सम्पूर्ण ख्यः थौं विचौलिया, दलाल, माफियातय् ल्हाती । सम्पूर्ण सरकारी संयन्त्र थुमिगु पकडय् । थौं सत्तासिन नेतातय् जीवनशैलीं क्यनी । इपिं स्वयम जनमुखी खः कि सामन्ती ?

हिमाली लः तसकं स्वच्छ ! प्राकृतिक रुपं हे प्रशोधित । स्वस्थकर । युरोप अमेरिकाय् हिमाली लःया तःधंगु माग दइ । नेपालं लः मी । डलर आर्जन याइ । देय् आर्थिकरुपं मालामाल जुइ । अले ला छु मानी ! थौंकन्हय् देशय् तसकं हे दक्ष, सिर्जनशील जलस्रोत मन्त्री । आः देसय् रेल वइ । जहाज न्ह्याइ ।

रेल जहाजमार्फत देश–विदेशय् हिमाली अमृतजलया ढुवानी जुइ । हिमाल लःया खानी । नेपाः जलस्रोतया धुकू । भण्डार । प्राकृतिक रुपं हे प्रशोधित हिमाली लः । देय्या निंतिं तुयुगु लुँया खानी हे जुयाबी । मुलु छपु नं पिनें हयेके माःगु देय् । नेपाः । आः नेपालं विश्वय् शुद्ध हिमाली लः छ्वइ ! विश्वय् नेपाःया नां प्रसिद्ध जुइ ! जलपति देय्कथं नेपाःया नां च्याइ ।

पेय जल उद्योगया विकासं देय् मालामाल जुइ । धन्य जलस्रोतमन्त्री ! छिगु शुद्ध पेय लः उद्योगया परिकल्पना ! योजना ! तसकं हे प्रशंसनीय । आर्थिक रुपं थुकिं देय्या कायापलट हे जुइ । नेपाःया लखं विश्वय् कोकाकोला, फ्यान्टां थें बजाः काइ । अझ सम्भव दु । कोकाकोलाया बजाःयात हे थ्व शिथिल यानाबी । हिमाली लः जुइ । अहानिकारक ।

जब थ्व विश्वं सीकी, अनुभव याइ । कोकोलात थ्वं विस्थापित याय । अले ला छु ! नेपाःया गौरव प्यखेरं न्यनी । थुकिया श्रेय थौंया दूरदर्शी सरकार व जलस्रोत मन्त्री विना मगरयात वनी । इतिहासय् थुमिगु नां लुँ आखलं अंकित जुइ ।तर । तर सामान्य ‘तर’ मखु थ्व । तसकं हे दुःखद ‘तर’ । त्वाःदेवा क्वय् मतं मखं धाःथें ! थौंया सरकार ।

दुइतिहाइ मतं सम्पन्न । त्वाःदेवा । तप्वाःगु । झमलमलं च्याइ । तेजवान खनेदइ । छम्ह सरकारी पक्षया नांजाःम्ह नेतां धाइ । थौं नेपाःया इतिहासय् अभूतपूर्व मतं विजयी कम्युनिष्ट पार्टीया सरकार । विश्वय् हे छगू नमूना जुयाः विश्वयात हे थ्वं तरंगित याना बिउगु दु । खः विशुद्ध कम्युनिष्ट सिद्धान्तय् जनताया थाय् गन लाइ, व धयाच्वनेमाःगु मखु । तर ।

थौं देशय् आम जनता जाज्वल्यमान त्वाःदेवाया क्वय् मतं मखयेकाः अन्धकारय् तनेमाःगु दु ।नेपालय् सी त्यंम्हेसित लः त्वंकेगु चलन दु । लःया महत्व जीवनया अन्तिम घडीइ नं उतिकं दइ । तर हिमाली लः निर्यात यानाः देय्यात मालामाल यायेगु म्हगसय् तनीपिंसं देय्या जनतां अन्तिम घडीइ नं छफुति लः तकं मफइगु, मखनीगु थौंया दुःखद् अवस्थाप्रति भ्याः हे सरोकार क्यनाच्वंगु मदु ।

शायद क्रान्तिकारी नेतातय्सं ‘सीम्हेसित लः त्वंकेगु चलन सामन्त प्रथा खः, थुकियात निरुत्साहित यायेमाः धकाः प्रगतिशील बेसरोकार क्यनाच्वंगु खःला ? मसिउ !

सम्बन्धित बुखँ

LEAVE YOUR COMMENTS