ने. सं. ११४६ दिल्लागा द्वादशी -

इरान युद्ध दिकेगु कूटनीतिक दाउपेचय् ट्रम्प

वाशिंगटन – अमेरिकी राष्ट्रपति डोनाल्ड ट्रम्पं इरानलिसे जुयाच्वंगु युद्ध दिकेगु ‘मुड’य् वनाच्वंगु दु । राष्ट्रपति ट्रम्प इरानलिसे गुगुं नं आणविक सम्झौता मयासे हे इरानलिसे जारी युद्ध दिकेगु विचाः यानाच्वंगु दु ।

द वाल स्ट्रिट जर्नलया छगू रिपोर्टकथं यदि इरानं विश्वव्यापी इन्धन आपूर्तिया निंतिं रणनीतिक ल्याखं महत्वपूर्ण ‘स्ट्रेट अफ होर्मुज’ पूर्णरुपं खुल्ला यानाबिल व व्यापारिक जहाजयात धुक्क जुयाः वये वने याके बिल धाःसा इरानलिसे गुगुं आणविक सम्झौता मयासे जारी युद्ध अन्त्यया निंतिं अमेरिका सैन्य कारवाहीपाखें लिचिलेगु बारे विचाः यानाच्वंगु दु ।

अमेरिका इरानया युद्धया शुरुइ ट्रम्प प्रशासनं शुरुइ इरानया आणविक ज्याझ्वःयात पूर्णरुपं नियन्त्रण यायेगु कथं सम्झौता जुइमाःगु खँय् विशेष बः बिया वयाच्वंगु खः । ट्रम्प प्रशासनं युद्ध शुरु जूसांनिसें इरानया आणविक ज्याझ्वः नियन्त्रण व वइगु दिनय् नं पूर्णरुपं बनद यायेत सहमत जूसा जक सम्झौता यायेगु नापं युद्ध दिकेगु खँ धया वयाच्वंगु खः । तर युद्ध निरन्तर रुपं ताःहा जुजुं वनाच्वंगु व अमेरिकी बजारय् नं इन्धनया भाः थहां वनेवं आः वयाः वाशिंगटनं थःगु ध्यान युद्ध त्याकेगु वा छगू ठोस सहमतिइ वयेगु स्वयां नं विश्वव्यापी रुपय् इन्धनया सहज आपूर्ति व आर्थिक स्थिरता कायम यायेगुपाखे केन्द्रीत याना हयाच्वंगु अन्तर्राष्ट्रिय संचारमाध्यमतय्सं न्ह्यथंगु दु ।

छखे राष्ट्रपति ट्रम्प तेहरानलिसे अमेरिका सामान्य वार्ताया अवस्थाय् दुगु संकेत बिउगु दुसा मेखे इरानयात तयातःगु आर्थिक दबाव अझ अप्वयेका यंकेगु रणनीति दयेकाच्वंगु खँ धाःगु दु । अमेरिकाय् वइगु लत्या लिपा मध्यावधि निर्वाचन जूवनाच्वंगु दु । थज्याःगु अवस्थाय् देशय् पेट्रोलियम पदार्थया थहां वनाच्वंगु भाःया कारणं ट्रम्प प्रशासनयात याकनं युद्ध क्वचायेकेत तःधंगु राजनीतिक दबाव नं ब्वलनाच्वंगु विश्लेषकतय्सं धाःगु दु ।

थ्वहे झ्वलय् राष्ट्रपति ट्रम्पं क्ष्इराानं थःगु शासनकालय् अःपुक आणविक ल्वाभः हाकनं दयेके मफइगु दावी यासें अमेरिकी गुप्तचर निकायतय्सं थ्व सम्बन्धय् कडा निगरानी तयाच्वंगु नं धाःगु दु । अमेरिकी गुप्तचर निकायया निगरानीया कारणं इरानं आः हाकनं आणविक ल्वाभः दयेके मफइगु जूगुलिं हे विना सम्झौता युद्धपाखें लिचिले फुगु संकेत ट्रम्पं बिउगु संचारमाध्यमतय्सं न्ह्यथंगु दु ।

थुखे इरमानया विदेशमन्त्री अब्बास अराघचीं अमेरिकालिसे गुगुंकथंया प्रत्यक्ष वार्ता जुयामच्वंगु दावी यासें अमेरिकी नौसैनिक चिला मवंतले होर्मुज पूर्णरुपं मचायेकेगु नं स्पष्ट याःगु दु । छन्हु न्ह्यः जक इरानया सर्वोच्च राष्ट्रिय सुरक्षा परिषद्या प्रमुख मोहम्मद बघेर जोलघादरं होर्मुज चायेकेया निंतिं अमेरिकायात खुगू सर्त तःगु खः ।

मेखे होर्मुज चायेकेगु विषयय् खने दयाच्वंगु अन्योलताया दथुइ कच्चा चिकंया भाः थहां वंगु दु । सोमवाः बजाः चालेवं ब्रेन्ट क्रुग आयल १.०९ प्रतिशत थहां वनाः प्रति ब्यारेल ८४.४६ अमेरिकी डलर थ्यंगु दुसा अमेरिकी डब्लुटीआई ०.७८ प्रतिशत थहां वनाः ७८.७९ अमेरिकी डलर थ्यंगु दु ।