त्वह तया च्वने मजिल !

देशय् छाय् विकासं गति काये मफुत ? छाय् जनतां विकासया अनुभूति याये मफुत ? प्यखेरं न्ह्यसःत दनी । आलोचना जुइ । सत्ता पक्षया शक्तिशाली नेता क. प्रचण्डं थज्याःगु आलोचनायात कयाः प्रतिक्रिया प्वंकी । लिसः बी । धाइ । ‘देशय् थौं विकासं गति काये मफुगु व्यवस्थाया संसदीय चरित्रं यानाः खः ।

संसदीय व्यवस्थाय् ठीक इलय्, क्वात्तुक, दृढ निर्णय याये फइमखु । उकिं विकास धिमा जुइ । खः थें मखु थें जक न्ह्याः वनी । कम्युनिष्ट व्यवस्थाय् विकास द्रुृत जुइ । कारण अन दृढ, ठोस निर्णय सम्भव जुइ ।’ शक्तिशाली नेताजुं सैद्धान्तिक तर्क बियाः देशय् छाय् विकास मजुल धकाः हल्ला याना जुइपिंत म्हुतुप्वाः तिकेत स्वइ ।

कमरेड नेताजुया तर्क न्यने । भारतया भूतपूर्व प्रधानमन्त्री स्व. इन्दिरा गान्धीया धापू लुमनी । संसदीय प्रजातन्त्रया पक्षय् वकालत यासें मय्जु इन्दिरा गान्धीं धाइ ‘ खः । संसदीय व्यवस्थाय् विकासया गति साम्यवादी व्यवस्थाय् स्वयां धिमा जुइ, उलि गतिवान् जुइ मखु । तर प्रजातन्त्रया अभ्यासया कारणं संसदीय प्रजातन्त्रय् जनताया चेतना, सोच, परिमार्जित जुइ ।

परिपक्व जुजुं वनी ।’ थन निम्ह ख्याति प्राप्त नेतातसें राजनीतिनक व्यवस्था व विकासया स्वापू छु गथे जुइ ? थःथःगु विचाः बी । प्वंकी । गुगु विचाः पाय्छि ? गुगु ठिक ? चर्चा न्ह्याकेगु थ्व च्वसुया थन सरोकारया विषय मखु । छगू उखान दु । थन लुमनी । ‘छम्ह भ्वाभःकःमिं थःगु सम्पूर्ण कमजोरी, असफलताया दोष थःगु ज्याभःयात बी ।’

ठिक अथे हे देय्या जिम्मेवार नेतातय्सं थःगु सम्पूर्ण कमजोरी, असफलताया दोष कर्पिनि छ्यनय् दिकेत स्वइ । थःगु असक्षमताया प्रतिरक्षा याइ । धूर्तता क्यनी । जनतायात दिग्भ्रमित यायेत स्वइ । धाइ । खः विकास कार्य जादू मखु । क्षणभरं हराभरा विकास सम्भव जुइमखु । तर नेपाली जनतां अपेक्षा याःगु विकास नं चाचां हे विकासित देय्या स्तरया विकास मखु ।

‘छम्ह भ्वाभःकःमिं थःगु सम्पूर्ण कमजोरी, असफलताया दोष थःगु ज्याभःयात बी ।’ ठिक अथे हे देय्या जिम्मेवार नेतातय्सं थःगु सम्पूर्ण कमजोरी, असफलताया दोष कर्पिनि छ्यनय् दिकेत स्वइ । थःगु असक्षमताया
प्रतिरक्षा याइ ।

कमसे कम आम जनताया सामान्य नागरिक जुयाः म्वाये फइगु विभेद रहित, सामाजिक न्यायपूर्ण विकास खः । आः देशय् अर्बौं फुकाः न्हूगु धरहरा दयेकेत्यंगु दु । विशाल भ्यू टावर थने त्यंगु दु । थज्याःगु भव्य संरचनाया किवासं देय् आः फ्रान्स, जर्मनी, अमेरिकाया तँय् थ्यनी । नेपालय् नं फ्रान्सय् थें इफेल टावर दइ । गर्व याइपिं दइ ।

देशय् थौं छथ्वः गिरोह, माफियात दु । देशया अमूल्य सम्पदा संरक्षणया इमिसं घोर विरोध याइ । थुमि विनासया निंतिं इमिसं अनेक झेलखेल याइ । मेखेर आधुनिकता, विकासया नामय् अर्बौं फुकाः भ्यू टावर, इफेल टावर दयेकेत सरकारयात प्रोत्साहित याइ । दबाव बी । शक्ति केन्द्रतलिसे जानाः इमिसं मालामाल आय आर्जन यायेगु योजना दयेकी ।

भुखाय् ब्वये न्ह्यः नं धरहरा संचालन विवादग्रस्त । आः । भव्य इफेल टावर, भ्यू टावरया निर्माण, संचालन लिपा शक्तिकेन्द्र व माफियातय् गुलि हानथाप जुइगु खः ? अनुमान याये फइ । तर्क थन दयेकेत्यंगु संरचना, विकासया विरोधय् मखु । चिन्ताया खः । थज्याmगु विकास, संरचनां देय् व जनता गुलि लाभान्वित जुइ ।

देशय् थौं कम्युनिष्ट, समाजवादी सरकार दु । सैद्धान्तिक इमान्दारिताया दृष्टिकोणं थौंया सरकारं गुगुं नं विकास कार्य आम जनताया हित, कल्याणया दृष्टिं गुलि जायज , विश्लेषण, मूल्यांकन यायेमाः । थौं देशय् न्ह्याक्व हे विकास जुइ बिउ । तर । उकिया उपभोग, प्रयोजन सम्भ्रान्तवर्ग, सत्तासीन वर्गया निंतिं जक सीमित जुइगु खःसा व विकास आमजनताया निंतिं उपहास जक जुइ ।

अभिशाप जुइ । व्यंग्य जुइ । थौं देशय् कम्युनिष्ट पार्टीया सरकार । अत्याधिक मत प्राप्त । नेपालया इतिहासय् हे शक्तिशाली सरकार जक मखु, विश्व कम्युनिष्ट आन्दोलनय् हे थ्व सरकार छगू नमूना सरकार । सम्बन्धित नेतातय्सं दावी याइ । शान त्वःती । तर आश्चर्य ! छखेरं राष्ट्रिय–अन्तर्राष्ट्रिय ख्यलय् हे शक्तिशाली नमूना कम्युनिष्ट सरकार धाइ ।

दावा याइ । मेखेर व्यवस्थाया संसदीय चरित्रं जिमित द्रुत विकास याके मबिल । पूँजीवादीतय् जगजगीं सरकारं ज्या याये मफुत । देशी विदेशी षडयन्त्रकारी तत्वं सरकारयात असफल यायेत स्वयाच्वंगु दु । पुलांम्ह जुजुं रेष्टुरेण्टय् प्याखं हुलाः सरकारयात हायेकाच्वंगु दु । अनेक त्वहत लुइकी । दयेकी । नेतातय्सं सरकारया बचाउ याइ । तर छता खँ ।

संसारय् गुगुं देशय् नं शुन्य चुनौतिया स्थिति दइमखु । देशय् चुनौति शुन्य जूसा ला सरकार न्ह्यः वयेकाः च्वंसां जी । गाइ । चुनौति सामना, व्यवस्थापनया लागि हे देशय् सरकार माः । माली । शक्तिशाली सरकार !थौंया सरकार धाथें शक्तिशाली प्रतिवद्ध कम्युनिष्ट सरकार खःसा आम जनताया आवश्यकता पूर्ति व सामाजिक न्यायया लागि फताफत जनपक्षीय ज्या याना क्यने माल । त्वहः मदु त्वहः तया च्वने मजिल ।

सम्बन्धित बुखँ

LEAVE YOUR COMMENTS