अफगानिस्तानय् गुंगू विश्वविद्यालयया इजाजत रद्द
काबुल – अफगानिस्तानया तालिबान प्रशासनं शैक्षिक मापदण्डया हाचां गाःगु, प्रशासनिक कमजोरी व अभिलेखय् नक्कली विद्यार्थी क्यंगु द्वपं बिसे गुंगू निजी उच्च शिक्षण संस्था संचालन इजाजतपत्र निलम्बन व खारेज याःगु दु ।
उच्च शिक्षा मन्त्रालयं सार्वजनिक याःगु विवरणकथं न्हय्गू निजी उच्च शिक्षण संस्थाया इजाजतपत्र दछिया निंतिं निलम्बन याःगु दुसा निगू संस्थाया इजाजतपत्र स्थायी रुपं हे खारेज याःगु दु । मन्त्रालयं सन् २०२६ या वसन्त सेमेस्टरय् जूगु निरीक्षण व मूल्याकंनया लिधंसाय् थ्व निर्णय याःगु न्ह्यथंगु दु ।
दछिया निंतिं इजाजतपत्र निलम्बन जूगु शिक्षण संस्थाय् जोज्जान बार्लास विश्वविद्यालय, बल्खका राह–ए–सादत व तुर्किस्तान विश्वविद्यालय, बदख्सान अजहर व बर्ना विश्वविद्यालय, फरयाबया रशद विश्वविद्यालय, काबुल व पायम विश्वविद्यायल खः । अथेहे कुन्दुजया कोहान्डुज विश्वविद्यालय व तखरया खाना–ए–डेनिस विश्वविद्यालय संचालन इजाजतपत्र स्थायी रुपं हे खारेज याःगु दु ।
निरीक्षणया झ्वलय् थुपिं शिक्षण संस्थाय् ब्वनाच्वंपि धकाः ‘नक्कली विद्यार्थी’ क्यंगु, विद्यार्थीतय्गु उपस्थिति अभिलेख कमजोर जूगु व नियमकथं प्रतिबन्धित विद्यार्थीतय्त तकं अन्तिम परीक्षाय् ब्वति कायेकातःगु मन्त्रालयं न्ह्यथंगु दु । थुकथं हे आवश्यक प्रशासनिक व शैक्षिक संरचना नं माक्व मदुगु निरीक्षणपाखें सीदुगु धाःगु दु ।
चिकित्सा शिक्षालिसे स्वापू दुगु प्रयोगशाला म्हो जूगु, मन्त्रालयपाखें स्वीकृत पाठ्यक्रमकथं ब्वंकेगु मयाःगु व मेडिकलया विद्यार्थीतय्त अस्पतालय् आवश्यक व्यावहारिक प्रशिक्षणया नं माक्व अवसर मबिउगु विषययात अस्पतालं गम्भीर समस्याया रुपय् काःगु दु । गुलिखे शिक्षण संस्थां कक्षा संचालनया तालिका दयेकातःसां निरक्षणया इलय् क्वःछिनातःकथं कक्षा संचालन मजूगुु, कक्षा क्वथा खाली जुयाच्वंगु लूगु नं मन्त्रालयं धाःगु दु ।
भ्वँतय् जक शैक्षिक गतिविधि संचालन जुयाच्वंगु तर व्यवहारय् उकथं मजूगु नं धाःगु दु । सन् २०२१ य् तालिबान सत्ताय् वयेधुंकाः उच्च शिक्षाया ख्यलय् निरन्तर दबाव लाना वयाच्वंगु खः ।
LEAVE YOUR COMMENTS