ने. सं. ११४३ तछलाथ्व त्रयोदशी -

‘चिनियाँ विदेशमन्त्रीलिसे वार्ता आर्थिक व विकासय् केन्द्रीत’

येँ – नेपाः व चीन दथुइ सोमवाः जुइगु परराष्ट्र मन्त्रीस्तरीय बैठक आर्थिक व विकास साझेदारीइ केन्द्रीत जुइगु खँ धाःगु दु । निगुलिं देया परराष्ट्रमन्त्रीया नेतृत्वय् येँय् सोमवाः निगुलिं देया प्रतिनिधिमण्डल दथुइ वार्ता जुइत्यंगु खः । चिनियाँ विदेशमन्त्री वाङ यी थौं हे नेपाःया औपचारिक भ्रमणया निंतिं येँय् थ्यंकः झाइ ।

परराष्ट्रमन्त्री प्रदीप ज्ञवालीं नेपाः–चीन स्वापूया समग्र पक्षया लिसें पारस्परिक हित व चासोया विषयय् सहलह जुइगु खँ धयादीगु दु । वय्कलं निगू देय् दथुइ न्हापा जूगु सन्धि सम्झौता व नेपालय् संचालन जुयाच्वंगु विकास निर्माणया परियोजनाया समिक्षाया लिसें उकिया दु्रत कार्यान्वयनय् बः बिइगु खँ नं धयादीगु दु ।

चीन व नेपाः दथुइ हिमालय सीमापार बहुआयामिक सम्पर्क सञ्जाल निर्माण यायेगु निंतिं जूगु समझदारी, रेलमार्ग निर्माण व परस्पर सम्पर्क विस्तार व निगू देय् दथुइ जूगु यातायात व पारवहन सम्झौता थेंज्याःगु विषयय् केन्द्रीत जुयाः वार्ता जुइगु खँ परराष्ट्रमन्त्री ज्ञवालीं धयादीगु दु ।

‘चीनं चूलाकूगु भौतिक व आर्थिक विकासपाखें नेपालं गुकथं लबः कायेफइ धयागु बारे नेपाःया ध्यान केन्द्रीत जुइ’

चिनियाँ विदेशमन्त्रीं प्यदँ लिपा न्हापांखुसी नेपाःया भ्रमण यायेत्यंगु खः । नेपाःया विकासया बल्लाःगु साझेदार जुयाच्वंगु चीनं चूलाकूगु भौतिक व आर्थिक विकासपाखें नेपालं गुकथं लबः कायेफइ धयागु बारे नेपाःया ध्यान केन्द्रीत जुइगु खँ धासें वय्कलं वार्ताय् द्विपक्षीय हित, क्षेत्रीय व अन्तर्राष्ट्रिय चासोया विविध विषयय् नं खँल्हाबल्हा जुइगु खँ धयादिल ।

चीनया राज्य परिषदया दुजः नं जुयाच्वनादीम्ह विदेशमन्त्री वाङया थ्व भ्रमणयात चिनियाँ राष्ट्रपति सी जिनपिंंगं यायेत्यंगु नेपाः भ्रमणया पूर्व तयारी नं खः धयागु न्ह्यसलय् परराष्ट्रमन्त्री ज्ञवालीं महामहिम चिनियाँ राष्ट्रपतिया निंतिं थ्व ई उपयुक्त जूगु जानकारी नेपाः पाखें बियागु खँ धयादिल ।

वय्कलं धयादिल, ‘उच्चस्तरीय नेतृत्व नेपाः वइगु उत्साहया विषय खः, तर भ्रमणया तिथि धाःसा क्वजिउगु मदुनि ।’ लिसें वय्कलं चिनियाँ राष्ट्रपतिं याकनं नेपाः भ्रमण याइगु खँय् थः आशावादी जूगु खँ नं धयादिल ।