स्वनिगलय् ट्याक्सी थप यायेगु तयारी
येँ – स्वनिगलय् ट्याक्सी थप यायेगु कथं यातायात व्यवस्था विभागं न्हूगु मापदण्ड तयार याःगु दु । मापदण्डया मस्यौदा मन्त्रिपरिषद्य् वनेधुंकूगु खा धाःगु दु । विभागया प्रवक्ता गोकर्ण प्रसाद उपाध्यायं न्हूगु ट्याक्सी थप यायेगु निसें ट्याक्सी भाः समायोजन यायेगु तक यानाः मापदण्ड समय सान्दर्भिक कथं दयेकेत्यनागु खँ धयादीगु दु ।
वय्कलं न्हू मापदण्ड स्वनिगःया ल्वःगु कथं वातावरण मैत्री जुइगु व विदेशी यात्रुतय्त नं सहज जुइगु खँ धयादीगु दु ।आःया मापदण्डं ट्याक्सी चले यायेगु निंतिं तःगू कम्पनीया गाडी दुथ्याकेफइगु खँ धाःगु दु । न्हापा छगू निगू सीमित कम्पनीया सीमित मोडलया गाडी जक ट्याक्सी कथं चले याये दइगु जुयाच्वंगु खः ।
ट्याक्सीया मापदण्ड मन्त्रिपरिषदं पास यात धाःसा याकनं हे स्वनिगलय् न्हूगु ट्याक्सी तयेदइगु खँ धाःगु दु । विभागं ट्याक्सीया भाडा वैज्ञानिक ढंगं समायोजन यायेगु तयारी यानाच्वंगु नं सीदुगु दु । ट्याक्सी भावय् आः विदेशय् थें फ्लेक डाउन मनि धकाः कायेगु बारे सहलह जुयाच्वंगु खँ धाःगु दु । भारतय् फ्लेक डाउन मनी धकाः ३ किलोमिटर तकया ३०÷३५ तका भारु काइ ।
LEAVE YOUR COMMENTS