जग्गा कित्ताकाट फुकुवा तयारी

येँ – सरकारं कृषि योग्य बुँ कित्ताकाट यायेत तयातःगु प्रतिबन्ध याकनं फुकुवा यायेत्यंगु दु । कृषि, भूमि व्यवस्था तथा सहकारी मन्त्री चक्रपाणी खनालं म्हिगः बुटवलय् छगू ज्याझ्वलय् न्ववानादिसें थ्व खँ धयादीगु खः । ज्याझ्वलय् न्ववानादिसें वय्कलं धयादीगु दु, ‘कृषि भूमिया संरक्षण जुइकथं कित्ताकाट यायेत तयातःगु प्रतिबन्ध फुकुवा यायेगु तयारी जुयाच्वंगु दु ।’

वय्कलं थ्व बारे प्रधानमन्त्री लिसे सहलह जुयाच्वंगु धयादिसें लछिया दुने थ्व छु यायेगु धयागु खँ क्वःजिइगु खँ नं धयादीगु दु ।वंगु साउन २६ गते तत्कालिन भूमिसुधार मन्त्री गोपाल दहितं मन्त्रिपरिषदं निर्णय याका कृषियोग्य भूमि कित्ताकाटय् प्रतिबन्ध तयाबिउगु खः ।

उबलय् दछिया छक्वः वा अदालतया फैसला व अंशबन्दाया इलय् जक जग्गा कित्ताकाट याये दइगु व्यवस्था यानाः मेबलय् कित्ताकाट यायेमफयेका बिउगु खः । नापी विभागया महानिर्देशक गणेशप्रसाद भट्टं कित्ताकाटं हःगु समस्या बारे थःपिं जानकार दुसां थःपिं नीतिं पिहां वनाः ज्या यायेफइमखु धयादीगु खः ।