मोतिहारी–अमलेखगञ्ज पेट्रोल पाइपलाइन ५ किलोमिटर जक ज्या ल्यं

येँ –  दक्षिण एशियाया हे न्हापांगु क्रसबोर्डर पेट्रोलियम पाइपलाइन जुयाच्वंगु भारतया मोतिहारी निसें नेपाःया अमलेखगञ्ज तक हयेत्यंगु पाइपलाइनया ज्या आः न्यागू किमि जक ल्यंदनिगु खँ धाःगु दु । आः । पर्सा राष्ट्रिय निकुञ्ज दुनेया न्यागू किलोमिटर लागाय् जक सिमा पालाः पाइपलाइन लायेल्यं दनिगु खँ पाइपलाइन विस्तार आयोजनाया ज्याकुथिं धाःगु दु ।

भारतया मोतिहारि निसें बाराया अमलेखगञ्ज तकया थ्व पाइपलाइनया दूरी ७० किलोमिटर दु । आः ६५ किलोमिटर तक पाइप लाइन लायेधुंकूगु दु । पाइपलाइन लायेमाःगु लँपुइ थ्यंमथ्यं ९ किलोमिटर पर्सा राष्ट्रिय निकुञ्जया क्षेत्र लाःवः । थ्व क्षेत्रय् ६५०० मा तमागु चिमागु सिमा पालेगु ज्या जुयाच्वंगु खँ आयोजनाया इन्जिनियर शरद पौडेलं धयादीगु दु ।

वय्कःया कथं निकुञ्ज दुनेया ९किलोमिटर क्षेत्र मध्ये ४ किलोमिटर क्षेत्रय् सिमा पालाः पाइपलाइन लायेगु ज्या जुयाच्वंगु व ल्यं दुगु न्यागू किलोमिटरया लागाय् सिमा पालाः याकनं पाइपलाइन लायेगु खँ धयादीगु दु । पाइपलाइन विस्तार यायेगु झ्वलय् निकुञ्ज क्षेत्र दुने सीमा पाःथाय् हाकनं सीमा पीत नेपाल आयल निगमं निकुञ्जयात न्यादँ तक छगूलाख ४७हजार २०० मा सीमा पीत छगू करोड ३९ लाख ६७ हजार तका क्षतिपूर्ति बीत्यंगु खँ सहायक संरक्षण अधिकृत अशोककुमार रामं धयादीगु दु ।

थगुने चैतय् प्रधानमन्त्री केपी ओली भारत भ्रमणय् झाःबलय् नयाँदिल्लीया हैदरावाद हाउसं हे भारतीय प्रधानमन्त्री नरेन्द्र मोदीलिसे जानाः थ्व पाइपलाइनया शिलान्यास यानादीगु खः । थ्व पाइपलाइन २ अर्ब ७५ करोड लगानीइ दयेकाच्वंगु खः । थुकी निगू अर्ब दां भारतीय आयल निगमं लगानी याःगु दुसा ७५ करोड नेपाः सरकारया लगानी दु ।

पाइपलाइन लायेगु ज्या क्वचायेवं पेट्रोलियम पदार्थ भण्डारण यायेगु निंतिं अमलेखगञ्जय् च्वंगु आयल निगमया डिपोय् ३९०० किलोलिटर क्षमताया निगः व ४१०० किलोलिटर क्षमताया निगः यानाः प्यंगः ट्यांकर मर्मत यायेगु ज्या नं तीव्रगतिं न्ह्यानाच्वंगु दु । आः लायाच्वंगु पाइपलाइनं प्रति घण्टा निगूलाख लिटर पेट्रोलियम पदार्थ दुहां वइगु खँ धाःगु दु ।

पेट्रोल हयेगु निंतिं जमीन स्वयां साढे २ मिटर क्वय् गां खनाः पौने ११ इञ्चया हाकुगु रंगया माइल स्टिलपाइप लाःगु खः । थ्व पाइप गुबलें नं खतं मनइगु खँ धाःगु दु । थ्व आयोजना संचालनय् वयेवं रक्सौल नाकाय् जुइगु जामया समस्या ज्यनीगु व पेट्रोलियम पदार्थ ढुवानीया इलय् जुइगु खुयाकाइगु ज्या नं नियन्त्रित जुइगु खँ धाःगु दु ।

 

सम्बन्धित बुखँ

LEAVE YOUR COMMENTS