टानय् नेतृत्वया निंतिं प्यम्हेसिया दाबी

येँ – पदयात्रा व्यवसायीतय् मंकाः संगठन ट्रेकिङ्ग एजेन्सीज एशोसियसन अफ नेपाल (टान)या अध्यक्ष पदया निंतिं प्यम्हेसिनं उम्मेदवारीया घोषणा याःगु दु । टानया वर्तमान प्रथम उपाध्यष खुमबहादुर सुवेदी, द्वितीय उपाध्यक्ष नीलहरि बाँस्तोला, पुलांम्ह महासचिव मोहन लम्साल व व्यवसायी कुमार थापां अध्यक्ष पदय् दनेगु घोषणा याःगु खः ।

टानया निर्वाचन वइगु भदौ २० गते जुइगु ४१ क्वःगु साधारण सभाया झ्वलय् जुइत्यंगु दु । उम्मदेवारी घोषणा याःपिं प्यम्हेसिनं थःपिनि चुनावी अभियान न्ह्याकेगु झ्वलय् टानया दुजःपिं, व्यवसायीपिं नापलायेगु व सहलह ज्या तच्वयेका यंकाच्वंगु इलय् टानया अध्यक्ष नवराज दाहालं फयांफक्व सर्वसम्मतिं नेतृत्व ल्ययेगु खँ धयादीगु दु ।

व्यावसायीक एकताया सन्देश बीगु निंतिं फयांफत्तले सर्वसम्मतिं हे नेतृत्व ल्ययेगु खँ धयादिसें वय्कलं सर्वसम्मति मजुइगु जुल धाःसा जक चुनावय् वनेगु खँ धयादिल । अध्यक्षया निंतिं दावी यानाच्वंम्ह सुवेदीं थःप्रति व्यवसायीतय् विश्वसा दुगु व संस्थायात बिस्कं ढंगं न्ह्याकेगु निंतिं प्रतिस्पर्धाय् वयाच्वंगु धयादिल ।

अथेहे मेम्ह दोबदार लम्सालं पदयात्राय् जुइगु विकृति नियन्त्रण यायेगु मू ताः तयाः नेतृत्वय् वयेगु कुतः यानाच्वनागु खँ धयादिल । वय्कलं थःम्हं याकनं हे थःगु नेतृत्वय् कार्यसमितिया उम्मेदवारपिनि पुचः घोषणा यायेगु खँ धयादिल ।

अध्यक्ष पदया मेम्ह प्रत्यासी थापां टानयात व्यावसायिक संस्थाया रुपय् स्थापित यायेगु आज्जु ज्वनाः नेतृत्व वनेगु कुतः यानागु खँ धयादीगु दुसा मेम्ह दावेदार बाँस्तोलां टानया विश्वसनीयता अप्वयेकेत व भ्रमण वर्ष २०२० सफल यायेत थः न्ह्याः वनागु खँ धयादिल । निर्वाचनया निंतिं टानं कानुनी सल्लाहकार रमेश मैनालीयात मू निर्वाचन अधिकृतया जिम्मेवारी बीधुंकूगु दु ।