नेवाः ल्याय्म्हतय्त लोकसेवा परामर्श
येँ – नेवाःतय्त लोकसेवा आयोगय् जाँच बीगु निंतिं म्हीग छगू परामर्श ज्याझ्वः जुल । मुक्कं ७८ म्ह नेवाः युवातय्सं ब्वति काःगु उगु ज्याझ्वलय् लोकसेवा आयोगय् जाँच बियाः सरकारी जागिर छाय् नयेमाः धइगु बारे ध्वाथुइकेगु ज्या जूगु खः ।
ज्याझ्वलय् नेवाः न्ह्यलुवा लिसें मानवअधिकारकर्मी मल्ल के. सुन्दरं नेवाःत लिउने लाःगु कारण निर्णय यायेगु व योजना दयेकेगु क्षेत्रय् मथ्यंगुलिं खः धासें सरकारी सेवाय् नेवाःत दुहां वनेमाःगु खँ कनादिल ।
सहसचिव रितेश शाक्यं जागिर नयेगु निंतिं विदेशय् हे वनेमाःगु अवस्था मदु धासें लोकसेवा मार्फत थन हे जागिर नयेत समस्या मदुगु खँ कनादिल । प्राइम बैंकया डेपुटी मैनेजर भाइराजा तुलाधरं नं परामर्श बियादीगु खः ।
ब्वति काःपिं मध्ये १५ म्ह बाहेक मेपिंसं लोकसेवा आयोगपाखें सरकारी जागिर नयेफइ धइगु तकं मसिउगु खँ कंगु खः । ज्याझ्वः मंकाः धुकू, मंकाः मुना, मंकाः इन्भेष्टमेन्ट ,लुनिभाः स्वास्थ्य केन्द्र व वज्राचार्य क्लबया ग्वसालय् जूगु खः। थ्वहे झ्वलय् आः मंकाः मुनाया ग्वसालय् न्हिथं लोकसेवा आयोगया जाँच व जागिर नयेगु बारे परामर्श ज्याझ्वः न्ह्याकेत्यंगु खँ सीदुगु दु ।
लोकसेवाया निंतिं फाराम भरे यायेगु व जाँच बीगु निंतिं नं माःगु परामर्श बीगु तयारी जुयाच्वंगु खँ नेपालभाषा मंकाः खलःया प्रवक्ता रमेशमान पियां ‘नेपालभाषा टाइम्स’ यात कनादिल ।
LEAVE YOUR COMMENTS