हङकङय् प्रदर्शन जारी, अन्तर्राष्ट्रिय उडान रद्द

हङकङय् जुयाच्वंगु प्रदर्शनया झ्वलय् सकतां हवाई सेवा रद्द याना बिउगु दु । हङकङया राष्ट्रिय नापं अन्तर्राष्ट्रिय उडान सेवा सकतां रद्द याना बिउगु खः ।वंगु छुं दिं न्ह्यवंनिसें हङकङय् न्ह्यानाच्वंगु सरकार विरोधी प्रदर्शनया झ्वलय् हङकङ विमानस्थलया मुख्य टर्मिनलय् प्यन्हुया दिंकुन्हु नं सरकार विरोधी प्रदर्शन जुइवं उडान रद्द याःगु खः ।

विमानस्थलया मुख्य टर्मिनलय् जुयाच्वंगु सरकार विरोधी प्रदर्शन जारी हे दु । विरोध प्रदर्शनया कारणं हवाइ सेवा बन्द जुइवं विश्वया हे व्यस्त मध्ये छगू हङकङ विमानस्थलय् द्वलंद्वः यात्रुत अलपत्र अवस्थाय् लानाच्वंगु दु । विवादास्पद सुपुर्दगी विधेयक खारेजीया माग यासें वंगु १० न्हु न्ह्यवंनिसें हङकङय् सरकार विरोधी प्रदर्शन न्ह्यानाच्वंगु दु ।

शुरु सुपुर्दगी विधेयक खारेजीया माग यासे विरोध प्रदर्शनय् कुहां वःपिं प्रदर्शनकारीतय्सं आः वयाः लोकतन्त्रया माग याना हयाच्वंगु दु ।
प्रदर्शनया कारणं विमानस्थल जक मखसे मुक्कं हङकङया जनजीवन हे प्रभावित जू वंगु दुसा मुख्य सहरय् सवारी साधन संचलनय् तकं रोक लगे यानातःगु दु ।

प्रदर्शनया हे झ्वलय् थाय् थासय् प्रहरी व प्रदर्शनकारी दथुइ झडप नं जूगु दु । विरोधं उग्र रुप कया हयाच्वंगु इलय् हे हङकङया कार्यकारी प्रमुख क्यारी ल्यामं आन्दोलनकारीतय् माग पूरा याये मफइगु घोषणा याःगु खः । ल्यामया घोषणा लिपा आन्दोलनं झन् उग्र रुप काःगु खः ।