चीन व भारतं अनुदान बिउसा जक रेल वइगु

येँ – केरुङं येँय् तक रेल हयेगु ज्या चिनियाँ अनुदानं हे यायेगु तयारी जुयाच्वंगु खँ सीदुगु दु । नेकपा एमाले परराष्ट्र मामिला स्वयाच्वंम्ह डा. राजन भट्टराईं उगु जानकारी बियादीगु खः । म्हिगः मंगलवाः जूगु छगू ज्याझ्वलय् न्ववासें वय्कलं उगु खँ धयादीगु खः ।

वय्कलं न्ह्यःने धयादी, ‘केरुङ–येँ रेल चीनं अनुदान बिल धाःसा बने जुइ, देय्या प्रधानमन्त्रीं नं तःक्वः धायेधुंकूगु दु झीगु आन्तरिक स्रोतं रेलमार्ग दयेके फइगु अवस्था मदु, चीनं अनुदान बियाः दयेका बिल धाःसा जक येँ तक रेल वइ ।’वय्कलं प्रधानमन्त्री ओली निदँ न्ह्यः प्रधानमन्त्री जूगु इलय् चीनलिसे जूगु ‘रेलनिसें तेल तक’या झिगू बुँदाया सम्झौतायात कार्यान्वयनय् यंकेत आः जुइत्यंगु भ्रमणय् प्राथमिकता बियागु खँ नं कनादीगु दु ।

वय्कलं कनादी कथं चीन लिसे जूगु पारवहन व यातायात सन्धि, रेल, उत्तर–दक्षिण राजमार्ग, क्रस बोर्डर ट्रान्समिसन व आर्थिक लगानी लिसे निगू पक्षीय व्यापार लगायतयात आः द्रुत गतिं कार्यान्वयन यायेगु निंतिं चिनियाँ पक्षलिसे खँ ल्हायेगु कथं तयारी जुयाच्वंगु दु ।

वय्कलं धयादी, ‘थ्व स्वयां न्ह्यः जूगु सम्झौता कार्यन्वयन झीसं सोचे यानागु थें जुइ मफुत । आः म्होतिं नं न्यादँया निंतिं स्थिर सरकार दु, आः वंगु इलय् जूगु फुक्कं सम्झौता कार्यान्वयनय् यंकेमाः, थ्व बांलाःगु अवसर खः ।’ वय्कलं प्रमया चीन भ्रमणया झ्वलय् लगानी दुत हयेगु निंतिं विश्वासया वातावरण दयेकेमाःगु खँ कनादिसें थ्व भ्रमण नेपालं चिनियाँ लगानी दुकायेगु अवसरया रुपय् कायेमाःगु खँ नं कनादिल ।

मेखे वीरगन्जंनिसें येँय् तक रेल हयेगु ज्या नं भारतीय अनुदानं जक याये फइगु खँ कनादिसें वय्कलं निगुलिं राष्ट्रं अनुदान मबीकं रेलमार्ग वइगु सम्भावना मदुगु खँ स्पष्ट यानादिल ।