मेक्सिकोय् ७.२ रेक्टरया भुखाय् ब्वल

एजेन्सी ( मेक्सिकोया दक्षिण पश्चिम प्रान्तय् ७.२ रेक्टर स्केलय् भुखाय् ब्वःगु दु । स्थानीय ई कथं शुक्रवाः बहनी राजधानी मेक्सिको सिटीं ३५० किलोमिटर तापाक लाःगु ओअस्का प्रान्तय् भुखाय्या केन्द्र विन्दु लाःगु खँ अमेरिकी भुगर्भ विभागं धाःगु दु ।

जमिनं २४.४ किलोमिटर क्वं वःगु थ्व भुखाचं छुं भवनय् क्षति जूसां मानवीय क्षति जूगु धाःसा आःतक मलूनि धाःगु दु । मेखे भुखाय् ब्वःथाय् निरीक्षणया निंतिं आन्तरिक मामिला मन्त्री व ओअस्काया गभर्नरसहित ब्वया वंगु छगः हेलिकप्टर दुर्घटना जुयाः निम्ह सीगु दु । दुर्घटनाय् लानाः आन्तरिम मामिला मन्त्री अल्फोन्सो नाभरेटे व गर्भनर अलेजेन्द्रो मुरात नं सामान्य घाःपाः जूगु दु ।

भुखाचं यानाः मेक्सिकोसिटीइ नं छेँ वाराक्वारां सनेवं द्वलंद्वं मनूत सतकय् पिहां वयाच्वंगु दु । सरकारं देय्या प्यंगू प्रान्तय् उद्धारर्मीतय्त खटे यायेधुंकूगु दु । उमिसं स्थानीय मनूतय्त छेँय् पिने च्वनेत आह्वान यानाच्वंगु दु ।

मेक्सिकोय् वंगु सेप्टेम्बरय् तिनि तःभुखाय् ब्वःगु खः । उबलय् स्वसलं मल्याक मनूत सीगु खः ।मेक्सिको विश्वया यक्व भुखाय् ब्वइगु देय् मध्ये छगू लाः । थ्व देय् पृथ्वीया तःधंगु स्वंगू टेक्टोनिक प्लेट नर्थ अमेरिकन, कोकोस व प्यासिफिक प्लेटया द्यःने लाःगु देय् खः ।