अमेरिकाय् निगू बन्दूक आक्रमण

टेक्सासय् २० म्ह व
ओरेगनय् ९ म्हेसिया ज्यान वन

अमेरिकाया निगू बिस्कं बिस्कं थासय् जूगु बन्दूक आक्रमणय् लानाः २९ म्हेसिया ज्यान वंगु खः । अमेरिकाया ओरेगन व टेक्सस राज्यय् थ्व आक्रमण जूगु खः । लिपांगु आक्रमण ओरेगनया डेटनय् च्वंगु छगू बारय् जूगु खः । थ्व आक्रमणय् लानाः गुम्ह सीगु खःसा झिंखुम्ह घाःपाः जूगु खः । थन बारय् आक्रमण याःम्ह छम्ह आक्रमणकारी नं प्रहरीया कारवाहीलय् सीगु खँ धाःगु दु ।

थ्वयां छुं ई न्ह्यव जक टेक्सासया एल पासोय् जूगु थज्याःगु हे प्रकृतिया छगू आक्रमणय् लानाः २० म्हेसिया ज्यान वंगु खः । टेक्सासया मेक्सिकोया सीमा लिक्क लाःगु वालमार्टया शपिङ्ग मलय् छम्ह बन्दूकधारीं लाथेपाथे गोली कयेकूगु खः । थ्व आक्रमण याःम्ह २१ दँया छम्ह ल्याय्म्हयात धाःसा प्रहरीं ज्वंगु दु ।

ज्वंम्ह उम्ह ल्याय्म्ह एल पासो स्वयां थ्यंमथ्यं १०४६ किलोमिटर तापाक च्वंगु ड्यालस शहरया वासिन्दा जूगु खँ धाःगु दु । थ्व आक्रमणकारीया नां प्याट्रिक क्रुसिअस जूगु खँ धाःगु दु ।डेटनय् धाःसा गस्ती वनाच्वंपिं प्रहरीं आक्रमणकारीयात स्यानाबिउगु खः । थन गोली चले जूगु छुं ई लिपा हे प्रहरी थ्यंगु खः ।

थन आक्रमण याःम्ह आक्रमणकारीया बारे धाःसा पूवंक जानकारी वःगु मदुनिसा थुपिं निगुलिं आक्रमणय् उद्देश्य छु खः धयागु नं सीमदुनि ।
सामाजिक सञ्जालय् पिंहावःगु भिडियोय् डेटनया ई फिफ्थ स्ट्रिटय् च्वंगु नेड पेपर्स बारय् आक्रमणकारीं दर्जनौं गोलीं कयेकूगु खनेदु ।
टेक्सासय् जूगु घटनाय् मेक्सिकोया स्वम्ह नागरिक नं सीगु खः ।

मेक्सिकोया राष्ट्रपतिं ट्विटरमार्फत थ्व घटनाय् मेक्सिकोया स्वम्ह नागरिक सीगु व खुम्ह घाःपाः जूगु जानकारी बिउगु दु । छवाः न्ह्यव जक अमेरिकाया क्यालिफोर्नियाय् थज्याःगु हे आक्रमणया घटना जूगु खः । थुकी स्वम्हेसिया ज्यान वंगु खः । अमेरिकाय् छुं ई न्ह्यवनिसें थज्याःगु बन्दूक आक्रमणया घटना तच्वया वःगु दु ।

म्हिगः जूगु निगू घटना लिपा गुंगू थज्याःगु आक्रमण जुइधुंकूगु दु । थ्व घटनाय् लिपा अमेरिकाय् बन्दूक तयेदइगु कानूनयात कयाः तःधंगु प्रतिक्रिया वयाच्वंगु दु । बन्दूक तयेदइगु कानुनयात कडा यायेमाःगु माग तच्वया वःगु दु । तर अमेरिकी राष्ट्रपति डोनाल्ड ट्रम्पं धाःसा थुकी छुं प्रतिक्रिया बिउगु मदुनि ।

सम्बन्धित बुखँ

LEAVE YOUR COMMENTS