ने. सं. ११४४ कौलाथ्व षष्ठी -

अमेरिका–चीन दथुइ वाक्युद्ध

हङकङय् जुयाच्वंगु विरोध प्रदर्शनयात कयाः चीन व अमेरिका दथुइ वाक्युद्ध सुरु जूगु दु । निगुलिं देशं वं वयात वं वयात गम्भीर आरोप बियाच्वंगु दु । छम्ह अमेरिकी कुटनीतिज्ञं अधिकारकर्मीत लिसे खँ ल्हानाच्वंगु तस्बिर छगू चिनियाँ सरकारी पत्रिकाय् पिहां वयेवं अमेरिकां बदमास सत्ता धासें चीनया आलोचना याःगु खः ।

चीनं उकीया खण्डन यासें अमेरिकाया ‘गुण्डा तर्क’ धाःगु दु । थुकिया लिसें हङकङ मामिलाय् अमेरिकां निरन्तर हस्तक्षेप यानाच्वंगु द्वपं नं चीनं बियाच्वंगु दु ।अमेरिकी कुटनीतिज्ञ जुली ईदेहं छगू होटलय् विद्यार्थीत नेतात लिसे नापलाःगु तस्बिर बेइजिङ्ग समर्थक ता कुङ पाओ नांया पत्रिकां ‘विदेशी शक्तिया हस्तक्षेप’ धयागु शीर्षक तयाः छापे याःगु खः ।

चीनं थुकियात हङकङया राजनीतिक संकटया इलय् अमेरिकाया हस्ताक्षेप धयाच्वंगु दु । अमेरिकां धाःसा चीनया द्वपंयात अस्वीकार यासें थः कुटनीतिज्ञतय्सं सरकार लिसे व्यापारीक समूहया नेतातय्त तकं नापलानाच्वंगु स्पष्टिकरण बिउगु दु । पत्रिकार वःगु समाचारया नं अमेरिकां आलोचना याःगु दु ।

अमेरिकी विदेश मन्त्रालयया छम्ह प्रवक्तां धाःगु दु, ‘जितः थ्व औपचारिक विरोध जूगु थें मताः । थ्व ला छगू बदमास सत्ता याइगु ज्या खः । छगू जिम्मेवार राष्ट्रं अज्याःगु व्यवहार याइमखु ।’अमेरिकाया थ्व धापू वयेवं चीनं थ्व अमेरिकाया गुण्डा तकं धासें अमेरिकां मेपिनिगु आन्तरिक मामिलाय् हस्तक्षेप यायेगु ज्या दिकेमाःगु धाःगु खः ।

अधिकारकर्मीत स्वन्हुया प्रदर्शनया निंतिं हङकङ विमानस्थलय् भेला जुइधुंकाः चीन व अमेरिकाय दथुइ आरोप प्रत्यारोप तच्वयावःगु खः । हाकुगु वसः पुनातःपिं प्रदर्शनकारीतय्सं विदेशी पर्यटकतय्त चेतना ब्वलंकेगु धासें विमानस्थलया आगमन कक्षय् च्वनाः ब्यानर प्रदर्शन याःगु खः ।