सामुदायिक ब्वनेकुथिया पूर्वाधारया निंतिं ६२ गू करोडया खरिद प्रक्रिया
येँ (नेपालभाषा टाइम्स) – येँ महानगरपालिका झिंनिगू सामुदायिक ब्वनेकुथया पूर्वाधार विकास व सुधारया निंतिं ६२ गू करोड २८ गू लख लागतया खरिद प्रक्रिया न्ह्याकूगु दु । महानगरपालिकां बिस्कं बिस्कं बोलपत्रपाखें उगु प्रक्रिया न्ह्याकूगु खः ।
महानगरया ब्वनेकुथिया भौतिक अवस्थायात प्रचलित मापदण्ड अनुकूल यायेत ब्वँमिया ल्याः, जग्गाया स्वामित्व, भौगोलिक जोखिम, पूर्वाधार आवश्यकताया लिधंसाय् लगानी अप्वयेकूगु खः । सहरी योजना आयोगपाखें अध्ययन यानाः प्राप्त तथ्यया लिधंसाय् उगु खरिद प्रक्रिया न्ह्याकूगु खः । येँ महानगरपालिका शिक्षालिसें थीथी विभाग व वडापाखें उगु खरिद प्रक्रिया न्ह्याकूगु खः ।
शिक्षा विभागपाखें १४ वडाय् च्वंगु जनविकास माध्यमिक विद्यालय व २८ वडाय् च्वंगु पद्मोदय माध्यमिक विद्यालयया भवन निर्माण प्रक्रिया न्ह्यःने न्ह्याकूगु दु । थुकिया लागत छसिकथं न्यागू करोड ख्वीन्हय्गू लख ६८,८६२ तक व १५ गू करोड ३५ गू लख चय्प्यद्वः तका खः ।
थुकथं हे सार्वजनिक निर्माण विभागपाखें खुगू ब्वनेकुथिया निंतिं खरिद प्रक्रिया न्ह्याकूगु दु । थुकी २४ वडाया श्रीकान्ति ईश्वरी राज्यलक्ष्मी विद्यालय, २६ वडाय् च्वगु शान्ति विद्यागृहया भवन निर्माण व २९ वडाय् च्वंगु अटिजम स्कुुल निर्माणया ज्या विभागं न्ह्याकूगु दु । विभागं न्ह्याकूगु नवनिर्माणया थुपिं तःधंगु परियोजनाया नितिं छसिकथं ५ गू करोड ५७ गू लख पीगुद्वः, च्यागू करोड न्यय्न्हय्गू लख पीनिद्वः व १० गू करोड ९१ गू लख न्हय्गुद्वः लागतया खः ।
अथे हे उगु विभागपाखें दरवार हाईस्कुलया बहुउद्देश्यीय सभाकक्षया निंतिं छगू करोड ८३ गू ल २९ द्वः तका, महेन्द्र बौद्ध माध्यमिक विद्यालयया मर्मतया निंतिं ८४ गू लख झिंनिद्वः तका व कन्या माध्यमिक विद्यालयया छात्रावास व कक्षा क्वथा निर्माणया निंतिं ९ गू करोड ६२ गू लख न्यय्प्यद्वः तकाया खरिद प्रक्रिया न्ह्याकूगु दु ।
येँ महानगरपालिका १३ वडां १ गू करोड ६६ गू लख न्हय्निद्वः लागतय् ज्ञानोदय माध्यमकि विद्यालयया भवन निर्माण प्रक्रिया न्ह्याकूगु दुसा २ वडां रानीदेवी माध्यमिक विद्यालया भवन निर्माणया निंतिं २ गू करोड २६ गू लख चय्न्याद्वः व २२ वडां नेपाल आदर्श माध्यमिक विद्यालयया क्वय्तँया मर्मत व सुधारया निंतिं ७० गू लख नीगुद्वःया खरिद प्रक्रिया न्ह्यःने न्ह्याकूगु दु ।
LEAVE YOUR COMMENTS