इजरायली प्रधानमन्त्रीयात घुस नःगु द्वपं

इजरायलया प्रधानमन्त्री बेन्जामित नेतान्याहुयात घूस नःगु, जालझेल याःगु व निष्ठा भंग याःगु द्वपं लाःगु दु । इजरायलया महान्यायाधिवक्तां हे प्रधानमन्त्रीविरुद्ध थ्व स्वंगू अभियोग तःगु खः । नेतान्याहुयात धनी व्यापारीं बिउगु उपहार स्वीकार याःगु व थःगु पक्षय् सकारात्मक समाचार प्रवाहया निंतिं पक्षधरता काःगु द्वपं लाःगु खः ।

मेखे प्रधानमन्त्री नेतान्याहुं धाःसा थ्व द्वपं थःत कू यायेगु कुतः कथं वःगु व गलत भावनां प्रेरित दुगु प्रतिक्रिया बिउगु दु । वय्कलं थःम्हं राजीनामा मबीगु व थः कानुनी रुपं नं राजीनामा बीत बाध्य मजूगु खँ धयादीगु दु । टेलिभिजन सम्बोधनय् नेतान्याहुं अधिकारीत सत्यया लिउने मवसें थःगु लिउने वयाच्वंगु धासें अनुसन्धानकर्तातय् हे अनुसन्धान यायेमाः धासें थुकिया निंतिं देय्वासीतय्त इनाप यानादीगु दु ।

महान्यायाधिवक्ता अभिखाइ मन्डब्लिटं इजरायलय् सुं नं व्यक्ति कानुन स्वयां च्वय् मदु धयागु थ्व द्वपनं क्यंगु खँ धयादीगु दु । वय्कलं धयादीगु दु, ‘कानुनया कार्यान्वयन छनोटपाखें जुइमखु, वामपन्थीइ वा दक्षिणपन्थीया विषय मखु । थ्व राजनीतिक विषय नं मखु ।’
महान्यायाधिवक्ताया थ्व घोषण वंगु अप्रिल व सेप्टेम्बरय् जूगु चुनाव लिपा राजनीतिक गतिरोध जुयाच्वंगु हे इलय् वःगु खः ।

नेतान्याहु विरुद्ध प्रधानमन्त्री पदया निंतिं चुनाव ल्वाःम्ह बेनी गन्ट्सं बुधवाः संसदय् बहुमत सहितया गठबन्धन सरकार दयेकेत थः असफल जूगु खँ धाःगु खः । थ्वयां न्ह्यव नेतात्न्याहुं नं बहुमत कायेत विफल जुइवं गन्टसयात सरकार दयेकेगु ह्वःताः बिउगु खः । राष्ट्रपति रुभेन रुबिभ्लिनं बिहिवाः सांसदतय्त २१ न्हु दुने प्रधानमन्त्रीया बारे सहमति दयेकाः दछिया दुने स्वक्वःगु चुनाव यायेमाली अवस्था पनेत इनाप यानादीगु दु ।

सम्बन्धित बुखँ

LEAVE YOUR COMMENTS