ट्रम्पं डब्ल्युएचओ पाखें पिहां वनेत औपचारिक पलाः ल्ह्वन

एजेन्सी- अमेरिकी राष्ट्रपति डोनाल्ड ट्रम्पं विश्व स्वास्थ्य संगठन डब्ल्यूएचओपाखें पिहां वनेगु निंतिं औपचारिक पलाः न्ह्याकूगु दु । कोरोना भाइरस महामारी न्यनेवं वंगु मे महिनाय् वय्कलं डब्ल्यूएचओपाखें पिहां वनेगु घोषणा यानादीगु खः ।

युरोपेली संघ लिसें थीथी पक्षं वय्कःयात अथे मयायेत इनाप याःगु खःसां ट्रम्पं संयुक्त राष्ट्र संघीय निकाय परित्याग यायेगु व अन अमेरिकां बिया वयाच्वंगु ध्यबा मेमेगु परोपकारी संस्थायात बीगु खँ धयादीगु खः ।

ट्रम्पं आः संयुक्त राष्ट्र संघ व कंग्रेसयात थःगु उद्देश्य बारे सुचं बीधुंकूगु दु । तर थ्व प्रक्रिया पूवनेत अझं दछि ई काइतिनिगु खँ धाःगु दु । राष्ट्र संघया महासचिवया प्रवक्ता स्टेफान ड्युजरिकं अमेरिकां सन् २०२१ जुलाई ६ निसें डब्ल्यूएचओ त्वःतेगु सुचं बिउगु पुष्टि यानादीगु दु ।

अथेहे अमेरिकाया प्रतिपक्ष दल डेमोक्र्याटिकया परराष्ट्र सम्बन्धी समितिइ च्वंम्ह सांसद रोबर्ट मेनन्डेजं राष्ट्रपतिं अमेरिकायात डब्ल्यूएचओं औपचारिक रुपं पिहां वयेगु निंतिं कंग्रेसयात सुचं बिउगु ट्विट यानादीगु दु ।

अमेरिकाया छम्ह वरिष्ठ अधिकारीं सीबीएस न्यूजलिसे खँ ल्हासें अमेरिकी सरकारं डब्ल्यूएचओय् सुधार यायेत व तप्यंक व्यवहार यायेत धाःगु, तर डब्ल्युएचओ माने मजूगु खँ धयादीगु दु ।

‘जिमिसं इनाप याना कथं अत्यावश्यक सुधार यायेत उपिं असफल जूगु दु, उकिं जिमिसं थनिंनिसें डब्ल्युएचओलिसे स्वापू अन्त्य यायेत्यनागु दु’ सीबीएस न्यूजलिसे खँ ल्हासें वय्कलं धयादीगु दु । चीनं कोरोना भाइरस महामारी न्यंकूगु दाबी यासें ट्रम्पं डब्ल्यूएचओ चीनया दबाबय् ज्या यानाच्वंगु द्वपं बिया वयाच्वंगु खः । विश्व स्वास्थ्य संगठन हे चीनया पूरा नियन्त्रणय् दुगु दावी वय्कःया दु ।

मेखे अमेरिकी राष्ट्रपतिय निर्वाचनय् डेमोक्रेटिक पार्टीपाखें उम्मेदवार जुयाच्वनादीम्ह जो वाइडनं छगू ट्विट यासें यदी थः राष्ट्रपति जुल धाःसा राष्ट्रपति जूगु न्हापांगु न्हि कुन्हु हे डब्ल्यूएचओया सदस्यता कायेगु घोषणा यानादीगु दु ।

सम्बन्धित बुखँ

LEAVE YOUR COMMENTS