ने. सं. ११४६ दिल्लागा चर्हे - गथांमुगः चःह्रे

कोलम्बिायाय् तःधंगु भुखाचय् लानाः सीपिं १३२ म्ह थ्यन

एजेन्सी – पश्चिमीको लम्बियाय् ७.४ म्याग्निच्युडया तःधंगु भुखाय् ब्वयाः १३२ म्ह मनूत सीगु पुष्टि जूगु दु । भुखाय् ब्वयाः मेपिं सलंसः मनूत घाःपाः जूगु दु । भुखाय्या कारणं थ्यंमथ्यं १५०० गू भवन क्षतिग्रस्त जूगु खँ धाःगु दु । छेँ दुनाः थीथी थासय् मनूत ल्हानाच्वंगु कारणं उद्धारकर्मीतय्सं उमित मालेगु व उद्धार यायेगु ज्या न्ह्याकाच्वंगु दु । अधिकारीतय्सं भुखाचय् लानाः सीपिनिगु ल्याः थहां वनेफुगु नं धाःगु दु ।

कोलम्बियाया भूगर्भ सेवा विभागं बिउगु जानकारीकथं स्थानीय ईकथं सुथसिया ७ः३४ ताः इलय् चोको प्रान्तय् केन्द्रविन्दु जुयाः थ्व भुखाय्
ब्वःगु खः । पश्चिमी कोलम्बियाया सलंसः किलोमिटर तक भुखाय्या धक्का लाःगु खः । भुखाय्या धक्का भेनेजुएला, इक्वेडर व पानामातक लाःगु खः । भेनेजुएलाय् निलाः न्ह्यः तिनि ब्वःगु शक्तिशाली भुखाचय् लानाः ६३०० म्हं मल्याक मनूत सीगु खः ।

कोलम्बियाय् शुक्रवाः तिनि पदभार ग्रहण याःम्ह न्हूम्ह राष्ट्रपति एबर एलार्दो डेला एस्प्रीएयां देशय् आपतकालया घोषणा याःगु दु । राष्ट्रपतिं उद्धार व राहतया ज्यायात प्रभावकारी रुपं न्ह्याकेगु निंतिं प्रतिबद्धता नं व्यक्त याःगु दु । कोलम्बियाया थीथी सहरय् कफ्र्यु नं तःगु दु । अथेहे देशया नागरिक उड्डयन निकायं थीथी विमानस्थल क्षति जूगुलिं उडान नं स्थगित जुयाच्वंगु धाःगु दु ।

सामाजिक सञ्जालय् खनेदुगु भिडियोय् राजधानी बोगोटालिसें थीथी सहर तसकं भुखाचं संकूगु खनेदु । भुखाय् ब्वयाः तःतःजाःगु भवन नं दुनावंगु खः । कोलम्बिायाया कफी उत्पादनया निंतिं नांजाःगु सहर पेरेराय् दकलय् अप्वः क्षति जूगु दु । थ्व सहरय् जक ६५ गू भवन दुनाच्वंगु दुसा ४० म्हं मल्याक सीगु दु ।

कोलम्बियां भुखाय् लिपा ग्वाहालिया निंतिं अन्तर्राष्ट्रिय समुदाययात इनाप याःगु दु । अमेरिकाया विदेशमन्त्री मार्को रुबियों कोलम्बियायात छगू करोड ५५ लाख डलरया आपतकालीन ग्वाहालि यायेगु घोषणा याःगु दु । युरोपेली संघया प्रमुख उर्सुला भोडेरलेयनं उद्धार व क्षतिया मल्यांकनय् ग्वाहालि यायेगु निंतिं युरोपेली संघया कोपर्निकस स्पाटे लाइट सेवा परिचालन यायेगु खँ धाःगु दु । इजरायल, मेक्सिको व फ्रान्सं नं कोलम्बियायात उद्धार व राहतय् ग्वाहालि यायेगु प्रस्ताव तःगु दु ।