चीनया शियान शहरय् लकडाउन
एजेन्सी- कोरोना भाइरसया संक्रमण तच्वया वयेवं उत्तरी चीनया शियान शहरय् लकडाउन तःगु दु । थनया छगू करोड ३०लाख मनूतय्त छेँय् हे वनेत स्थानीय अधिकारीतय्सं निर्देशन बिउगु दु ।
डिसेम्बर ९ निसें म्हिगः तक अन १४३ म्हेसिके कोरोना पुष्टि जुइवं सरकारं लकडाउन तःगु खः । बुधवाः घोषणा याःगु लकडाउन लिपा आः छखा छेँ नं छम्ह मनू निन्हुअतः जक आवश्यक सामान न्यायेत पिहां वये दइगु जूगु दु ।
चीनं कोभिड पूवंक नियन्त्रण यायेगु निंतिं कडा रणनीति नाला वयाच्वंगु दु । वइगु फेबु्रअरीइ शीतकालिन ओलम्पिकया ग्वसाः ग्वयेत्यंगु चीनं आवंनिसें कोभिडयात कयाः उच्च सतर्कता नाला वयाच्वंगु दु ।
आःया प्रतिबन्ध कथं शीयान निवासीत विशेष परिस्थितिइ व स्थानीय अधिकारीतय्के अनुमति कयाः बाहेक मेबलय् सहरं नं पिहां वनेदइमखु । थ्व लकडाउन गुबलय् तक कायम जुइ धयागु नं धाःगु मदुनि ।
शीयानया शान्शी प्रान्तय् च्वंपिं लखौं मनूतय् परीक्षण याःगु दु । ताःहाकःगु दूरीया बस स्टेशनत बन्द जुइधुंकूगु दुसा सहरपाखे वनेगु लँय् नं कडा जाँच जुयाच्वंगु दु । अथेहे शीयान विमास्थलं जुइगु फुक्क उडान नं स्थगित यायेधुंकूगु दु । अथेहे अत्यावश्यक बाहेकया फुक्क व्यापार, व्यवसाय बन्द जुइधुंकूगु दुसा सरकारी कर्मचारीतय्त छेँय् नं हे ज्या यायेत धायेधुंकूगु दु ।
स्थानीय अधिकारीतय्सं शीयानं आः न्यनाच्वंगु कोरोना भाइरस डेल्टा भेरियन्टया खः । अन ओमिक्रोन दु कि मदु धयागु बारे धाःसा स्पष्ट रुपं छुं धाःगु मदुनि । सरकारी सञ्चारमाध्यमतय्सं थ्व वालय् शीयानय् निगू महामारी न्यंगु धाःगु दु । थन कोभिड बाहेक रक्तस्राव जुइगु व ज्वरो वइगु नं न्यना वनाच्वंगु दु ।
थ्व ज्वरोयात स्थानीय रुपं इलय्ब्यलय् खनेदइगु ल्वय् कथं कयातःगु दु । अथे खःसां थुकिया मृत्युदर धाःसा उच्च दु । थुकियात उत्तरी चीनय् न्यनीगु मौसमी ल्वय् धयातःगु दुसा थ्व अप्वः थें ग्रामीण इलय् खनेदइ ।
LEAVE YOUR COMMENTS