शान्ति निकुञ्जय् एसइइ उत्तीर्णयात भिंतुना व सिरपाः देछा
येँ (नेपालभाषा टाइम्स) – शान्ति निकुञ्ज माध्यमिक विद्यालय व शान्ति निकुञ्ज पूर्व विद्यार्थी संघया मंकाः ग्वसालय् ब्वनेकुथिपाखें एसइइ उत्तीर्ण ब्वँमिपिंत भिंतुना व सिरपाः लःल्हायेगु ज्या वंगु शुक्रवाः जुल ।
पूर्व विद्यार्थी संघया नायः अनिता मानन्धरया सभापतित्वय् जूगु ज्याझ्वलय् ब्वनेकुथिया प्रधानाध्यापक राधेश्याम श्रेष्ठं ०८२ सालया एसइइ परीक्षाय् ताःलाःपिं पीन्हय्म्ह ब्वँमिपिंत ख्यें सगं व मतिनाया चिं लःल्हासे भिंतुना देछानादीगु खः । उगु इलय् एसइइ परीक्षाय् थीथी विषयय् उत्कृष्ट ल्याः हयेत ताःलाःपिं ब्वँपिंत थीथी सिरपाः नं लःल्हाःगु खः ।
ब्वनेकुथिया पुलांम्ह ब्वँमि शिवबहादुर नेपाली प्रधानं नीस्वनादीगु ‘साइन्टेक्ट अवार्ड’ मनिषकुमार शाह व सुष्मा श्रेष्ठयात, भुवनेश्वरकुमार प्रधानं नीस्वनादीगु ‘रामेश्वर लाल सिरपाः’ व ‘भीमकुमारी सिरपाः’, सुनिलकृष्ण श्रेष्ठं नीस्वनादीगु ‘प्रेरणा सिरपाः’ न्याम्हेसित, कृष्णलाल प्रधानं नीस्वनादीगु ‘हर्ष–कृष्णलाल प्रधान सिरपाः’ गुंगू तगिमय् उत्कृष्ट ल्याः हयेत ताःलाःम्ह रसिना खत्रीयात लःल्हाःगु खः ।
एसइइ परीक्षाय् ताःलाःपिं ब्वँमिपिंत इमिसं प्राप्त याःगु जीपीएया लिधंसाय् दातांपिंसं दां व हनापौ लःल्हानादीगु खः । अंग्रेजी विषयय् ४ जीपीए हयेत ताःलाःपिं झिंखुम्ह ब्वँमिपिंत ‘रामेश्वर लाल सिरपाः’कथं म्हतिं द्वःछि तका, निम्हेसित ‘भीमकुमारी सिरपाः’ व विज्ञान विषयय् उत्कृष्ट ल्याः हःपिं झिंप्यम्ह ब्वँमिपिंत शिवबहादुर नेपाली प्रधानया निगू निगू सफू नं लःल्हाःगु खः ।
LEAVE YOUR COMMENTS