थिमिइ प्यन्हुयंकं भैलः प्याखं क्यनीगु
थिमि (नेपालभाषा टाइम्स) – थ्व हे वइगु भदौया निगूगु वाःपाखे मध्यपुर थिमिया तुलंननिइ प्यन्हुयंकं भैलः प्याखं क्यनीगु जूगु दु । श्री गणेश सांस्कृतिक समाजपाखें वइगु भदौ १४ निसें १७ गतेतक प्यन्हुयंकं परम्परागत भैलः प्याखं न्ह्यब्वयेत्यंगु खः ।
प्यंगू त्वालं पालंपाः क्यना वयाच्वंगु भैलः प्याखं प्यन्हुयंकं चछि चछि क्यनी । प्याखं क्यनेगु निंतिं व्यवस्थापन समितिं पत्रकार व स्थानीयवासीतय्त ब्वनाः जानकारीमूलक ज्याझ्वः यासें प्याखं क्यनेगु बारे सार्वजनिक जानकारी बिउगु खः ।
मध्यपुर थिमि नगरपालिकानापं स्थानीय दातातय्गु आर्थिक ग्वाहालिं थ्यंमध्यं ५० गू लख खर्च यानाः कुम्हाःननि, तुलंननि लागाय् थुगुसी उगु भैलः प्याखं क्यनेत तःन्हु न्ह्यःनिसें अभ्यास जुयाच्वंगु उगु इलय् जानकारी बिउगु खः ।
थुगुसी भैलः प्याखनय् प्याखंम्वःकथं ज्यापुंगः विनिस प्रजापति, न्हापांम्ह भैलः विज्ञान प्रजापति, लिउ भैलः रिजन प्रजापति, न्हापांम्ह दांगी निराजन प्रजापति व लिउ दांगी कथं विमल प्रजापति जुइगु पत्रकार सम्मेलनय् जानकारी बिउगु दु ।
ऐतिहासिक, सांस्कृतिक भैलः प्याखंया बारे जानकारी बियादिसें ग्वसाः खलःया श्रीकृष्ण प्रजापतिं मध्यपुर थिमि लागाय् परम्परागत भैलः प्याखं, भैलः प्याखं, लाय्कू भैलः प्याखं व नगदेश भैलः प्याखं यानाः प्यंगू थासय् प्यंगू कथंया भैलः प्याखं चलनचल्तीइ दुगु जानकारी बियादिल । प्यंगू पुचःया गुरुपाखें प्याखं ग्वसाः ग्वया वयाच्वंगुलिइ थुगुसी कुम्हाः त्वाःकथं नांजाःगु कुम्हाःननि, तुलंनति त्वालं पाः कयाः प्याखंया निंतिं ब्यवस्थापन यायेगु ज्या जुयाच्वंगु दु ।
ज्याझ्वलय् नवासें मध्यपुर थिमि नगरपालिकाया प्रमुख सुरेन्द्र श्रेष्ठं मध्यपुर थिमि नगरय् समुदायया ग्वाहालिं हे सांस्कृतिक सम्पदा संरक्षण जुया वयाच्वंगु कनादिसें थुकथंया क्रियाकलापं पर्यटकतय्त नं सालेमाः धयादिल ।
उपप्रमुख विजयकृष्ण श्रेष्ठं परम्परागत चाया थलबल व थीथी हलंज्वलं दयेकेगु ज्याया निंतिं जीवन्त संग्रहालय जुयाच्वंगु मध्यपुर लागाया पर्यटन विकासया निंतिं आः सेरामिकया प्रवद्र्धन यायेत चिनिया प्रविधि दुत हयाः प्रशिक्षकतय्पाखें अनया छगू विश्व विद्यालयया ग्वाहालिं थन सेरामिक प्रवद्र्धन यायेत्यनागु कनादिल ।
समाजया नायः विजय प्रजापतिया सभापतित्वय् जूगु ज्याझ्वलय् मध्यपुर थिमि नगरपालिका ४ वडाअध्यक्ष बालकृष्ण प्रजापतिं मध्यपुर थिमिया लोप जुइत्यंगु सांस्कृतिक सम्पदातय्त पुनःजागरित यानाः पर्यटन प्रवद्र्धन यायेगु ज्याय् स्थानीय जनता थः हे सक्रिय रुपं न्ह्यचिलाच्वंगु कनादिल ।
थगुने नगदेय्या भैलः प्याखं क्यंगु खःसा थुगुया प्याखंयया निंतिं थौंकन्हय् तुलंननिइ न्हियान्हिथं अभ्यास जुयाच्वंगु दु ।
LEAVE YOUR COMMENTS