कोरोनाया खोप काःपिंत १०० डलर बिइगु अमेरिकी राष्ट्रपतिया घोषणा

एजेन्सी- अमेरिकाया राष्ट्रपति जो बाइडेनं कोरोनाया खोप काःपिंत १०० डलर बिइगु घोषणा याःगु दु । राष्ट्रपति बाइडेनं अमेरिकाय् संक्रमण हाकनं अप्वया वःगु व खोप काइपिं मनूत म्हो जुयावंगुलिं दक्व राज्ययात खोप काइपिं मनूतय्त १०० डलर बिइत आह्वान याःगु खः । बिबिसीं बिउगु जानकारीकथं थ्व ध्यबा ‘अमेरिका रेस्क्यु प्लान’ं दयेकातःगु कोष मार्फत बिइगु जुइ ।

अमेरिकाय् कोरोनाया डेल्टा भेरियन्ट हाकनं अप्वयाच्वंगु दु । छुं ई न्ह्यः राष्ट्रपति बाइडेनं अमेरिकाय् खोप कायेधुंकूपिंत मास्क अनिवार्य मजूगु घोषणा याःगु खःसा आः हाकनं राष्ट्रपति बाइडेनया प्रमुख चिकित्सा सल्लाहकार डा. एन्थोनी फाउचीया सल्लाहकथं खोप कायेधुंकूसां मास्क अनिवार्य यायेगु बिचाः यानाच्वंगु दु । अथे हे संघीय सरकारया कर्मचारीतय्सं नं खोप कायेधुंकूगु प्रमाण क्यनेमाः धाःगु दु । खोप कायेत अस्वीकार याःपिं कर्मचारीतय्त जागिरं धाःसा लिमकायेत नं राष्ट्रपति बाइडेन धाःगु दु ।

अमेरिकाय् बिहिवाः जक ९२ द्वः सिबें अप्वः कोरोना संक्रमित खनेदुगु खःसा ३८३ म्ह मनू सीगु दु । अमेरिकाय् स्वंगू करोडं मल्याकं मनूतय्त कोरोना जुइधुंकल सा खुगू लाखं मल्याकं मनूत सीधुंकल ।