कोरोनाय् भिटामिन डीया प्रभावकारीता बारे परीक्षण

एजेन्सी – बेलायतया वैज्ञानिकतय्सं भिटामिन डीं कोभिड १९ लिसे ल्वायेगु प्रतिरोधी क्षमता अप्वयेकीगु खँ ला धयागु परीक्षण यायेगु निंतिं स्वयंसेवीत मालाच्वंगु दु। सहभागी जुइ न्ह्याःपिं मनूतय् छेँय् खुलातक न्हियान्हिथं भिटामिन डी नयेगु निंतिं वासः छ्वयाहइ । थज्याःपिं मनूतय् दकलय् न्हापां भिटामिन डी म्हो जुयाच्वंगु दु कि मदु धयागु निं परीक्षण याइ ।

चिकुलाया इलय् भिटामिन डी झन म्हो जुइफुगुलिं थ्वयां न्ह्यः हे बेलायतवासीतय्त थप भिटामिन कायेत सुझाव बीधुंकूगु दु। थ्व सुझाव धाःसा सर्वसाधारणया स्वास्थ्य अवस्था बांलानाच्वनेमा धकाः बिउगुखः, छुं खास संक्रमण पनेत धाःसा मखु। विशेष यानाः यक्व उमेर दयेधुंकूपिं, अप्वः तौल दुपिं, अश्वेत व एशियाली मूलया मनूतय्के भिटामिन डीया कमी खने दयाच्वंगु दु। थ्व समूहया मनूत कोभिडया गम्भीर विरामी जुइफुपिं धकाः जोखिम समूहय् तयातःपिं खः ।

भिटामिन डीया परीक्षण बार्ट्स च्यारिटिया ग्वाहालिं क्वीन मेरी युनिभर्सिटी अफ लन्डनया अनुसन्धानकर्तातय्सं यायेत्यंगु खः । मुख्य अनुसन्धानकर्ता डेभिड जोलिफं धयादीगु दु, ‘थ्व परीक्षणं भिटामिन डीं कोभिडपाखें बचे याइ कि याइमखु धयागु न्ह्यसःया निश्चित लिसः बीगु सम्भावना दु ।’

‘भिटामिन डीया छ्यलेगु निंतिं यक्व खर्च यायेम्वाः, थुकिया छ्यलाबुलाय् उलि खतरा नं मदु। यदि थ्व प्रभावकारी प्रमाणित जुल धाःसा थ्व कोरोनाभाइरस विरुद्ध युद्धय् विश्वयात यक्व हे ग्वाहालि याइ’ वय्कलं धयादीगु दु ।